PAHOSS hna muang leh traffic jam

Aizawl khawpui chhung traffic a lo thawl zawk theih nan kan sorkar chak tak chuan PAHOSS hmangin chak takin hma a la mek a. Tunah hian PAHOSS hmang hian sum tam tak theh chhuah a ni tawh a, mimal parking siam theite hnenah cheng nuai tam tak pek an ni tawh a ni. 

Hetih mek lai hian PAHOSS hmutu tam tak hian duh aiin hma an la chak lo deuh nia ngaih theih turin motor parking awm theihna tur in an sak hi a chak lo hle mai. Veng hrang hrang­ah he scheme hnuaia in sa ho hian tun aia chak deuh zawka hma an lak theih nan sorkar hian engtin emaw nawr deuh se a duhawm hle mai. 

PAHOSS hnuaiah hian cheng nuai 50 chuang dawngte pawh an awm nual tawh a, mirethei te’n nuai 3 an dawn hmain Aizawl mi hausa zingah a thlawn liau liauin garage sakna tur PAHOSS hnuaiah nuai 100, nuai 50, etc chuang dawng te an awm tawh a. Hetiang taka pawisa tam kan sorkarin a theh chhuah hnu hi chuan khaw­pui chhung traffic jam pawhin zia­awm lam pan ve deuh tura ngaih a ni. 

Hetiang taka tam sum kan seng a nih chuan sorkar lamin an scheme tihhlawhtlin nan an tum tur pawisa an pe chhuak char char a, a dawngtu lam­in an tih tur an tih ve vat a ngai ta a ni. Parking House Support Scheme (PAHOSS) atan hian cheng vaibelchhe 10 (nuai 1000) sorkarin a dah nia hriat a ni a, hemi kaltlang hian Aizawl mi hausa eng emaw zatin a nuai 100, nuai 50, nuai 30 chuang te an dawng tawh hlawm a, hetiang taka tam pawisa kan sorkarin a seng a nih chuan a vil zui hna pawh hi uluk deuh zawka kalpui theih ni se a duhawm hle. 

Sorkar hian Aizawl khawpui traffic jam tih reh a tum a, Covid-91 do na tur khawl pawh lei ngam lo khawpin traffic jam tih reh tumin hma a la nasa a ni. Theih tawpin sum leh pai tam tak sengin hma a la tawh a, a tihpuitlin hna thawktu turte erawh chu PAHOSS pawisa dawngtute hi an ni. 

Sorkar kaihhruaina chak tak hnuaiah PAHOSS sum dawng­tute hian an pawisa dawn chhan ang ngei hian thil dangah pawisa hmang khaw­tlai loin motor parking awm theihna tur in hi sa vat hlawm se. A vil zui hna pawh theih anga chakin kan sorkar hian kalpui ve bawk se; a ṭangkai thei ang ber leh awmze nei takin PAHOSS pawisa hi hmang vat ang u.