Arvind Kejriwal-a hlawhtlinna vanga thinrim!

Whatsapp group pakhatah hian politics vangin an inhnial laih laih a. Delhi Chief Minister atana Arvind Kejriwal hneh taka a tlin thu vel an sawi laiin Mizorama ruling party worker ṭhenkhat chu an lo thinur em em ringawt niawm takin Whatsapp lamah an inhnial a. Ka nuih kur kur rualin a phenah khan Mizoram vanduaizia ka zuk hmu thei lawi si a ni. Chuta an inhnialna chu "Delhi CM leh kan CM hi inthleng dil ila, CM hmasa pek belh bawk ila," tih lam hawi a ni pek a! Delhi CM an awhzia an sawina a ni ber a, kan CM neih mek leh neih tawhte an sitna ṭawngkam a ni bawk - chu chu tuna ruling party lam tan chuan ngaih theih chi a ni lo hrim hrim a ni. 

Mizote hian midang kan fak rual hian keimahni emaw, tute emaw hi sawisel tel hram hi kan ching ṭhin a, a ngaithlatu tan chuan a ngeiawm bakah thin a khei zak ve ṭhin. Delhi CM hlawhtlinna sawi mai kha a tawk mai laiin tuna Mizoram CM leh CM kal chhuak ta kha mei nei takin an han khak tel hram a, chu chu an party worker tan chuan a thinrimthlak reng a, Arvind Kejriwal hlawhtlinna kha sawi hle hle se midang pawi an sawi lo ni mai tur tihte ka riltu lama chuan a lo lang tel nghal bawk a ni. 

Kan sawi pawp ta sa sa bawk a, mahni vei zawng a nih manah han sawi belh zel ta ila. India rama BJP sorkarna state hrang hranga tla ta duai duai han sawi apiang hian Mizoram lamah hian tlema lo lawm lo hi an awm tel ve zel ta mai pawh hian ngaihtuah a ti thui vawng vawng ka ti. BJP an sual, Mizorama BJP hi an sual tih ka sawi tum lam ni lovin India rama Hindu Lalram din tumtute an tlak avanga Mizorama BJP pawh ni si lo party pakhat an lo ngui deuh ruai mai hi chu Mizo Kristiante nen chuan a inhmeh lo tih lam hi a ni ka rilru chu ni. 

CAB/ CAA lamah khan Mizoram a huam tak loh avanga CAA lo fak ta mai mai te, Muslim sualzia lo sawi chiam chiam kha chu kan ruling party lam ṭang an ni ta zel kha mang a ti ang khawp mai ka ti. A chhan chu CAA kha Mizoram min huam loh pawhin dan ṭha lo tak, National Council of Churches in India (NCCI) pawhin a duh lova a do a ni a, a ṭhatna lo sawi tumte kha a zia lo khawp mai. Tunah hian politics avangin kan sakhua leh hnam hi kan dah hniam tal tiala hriatna a lo lang nghal a, Mizote leh Kristianna survive tir kan duh chuan chumi nêk chep hrah lotu CAA leh Uniform Civil Code tihte sawi ri hi chu kan hlat hret hret a ngai a, Central sorkar lama Ruling Party an nih vang hian an hmaah dawl zawrin i zawr lo ang u khai. 

Arvind Kejriwal chanchin sawi pawha BJP zawk an hniam em avanga lo thinrim mai pawh Mizo zingah an awm chho ta hi ngaihtuah chian a ngai a ni. Kan ram leh sakhua hi a him tur a ni a, kan ram hi kan dah pawimawh a ṭul a, kan sakhuana pawh hi party chungah kan dah a ngai a, tunah hi chuan party hi kan dah pawimawh luatah Arvind Kejriwal pawh BJP hnehtu a nih vangin kan ngei dawn dawn a nih si hi.