V/C, L/C INTHLAN HUN CHU...

Nakkum mai, 2020 kum tir lamah V/C, Local Council kan thlan hun a lo thleng leh dawn ta der mai chu a ni a, tun aṭang hian rilru lo siam lawk a ngai hle awm e. Khaw tin leh veng tinin kan khua, kan veng tana ṭha tur awma kan ngaihte ngei candidate-ah vawrh chhuak ila. Mi tam tak chuan khawtlang lam ngaihtuah lem lo hian mi ṭha, nungchang ṭha nia kan ngaih ringawt hi kan thlang leh fur mai awm e! 

Ram ril thingtuai pawh hi a diptu thing lian tak tak avangin a ding zen ṭhulh mai a, han la dawn ila a awmna a ril ṭhin si a, lak peih ni hek lo - hmanna vak awm lovin an ding ngil ve ringawt zel mai a ni. Chutiang bawk chuan mi ṭha tam tak hi chu mi pawi sawi lem lovin an nung ve mai a, hman tlakna tak tak an awm awm love. Chuvangin, inthlan hunah pawh rilru put thiam viau hi a ṭha hle ang a. 

Ka sawi duh ber chu kan V/C leh L/C a hmeichhe tana seat hauh hi a ni! Hei hi khaw tam tak leh veng tam takah chuan lu tihaitu tak a tling thei awm e. Thingtlang khaw tam takah chuan kan hmeichhe tam berte hi chuan inchhung khawsak ngaihtuahin khaw­tlang awpna, rorelna lama han ṭhut ve an hman lova, tin, chutih rualin a thiam pawh an thiam lo. 

A nihna takah chuan Siamtu siam dan phungah reng pawh hmeichhia chu inchhung lam ngaihtuahtu, awm nem zawk, pasalte a innghat a, an pasalte chu lalpa ti hial tura a siamte an ni. Hetiang a nih avang hian member pakhat lek han lak chhuah tur pawhin a buaithlakin lu a hai duh hle ang. Kan sorkar lamin hmeichhe dinhmun chawikanna leh tihzahawmna lam an ngai pawimawh pawh hi a fuh vak lo awm e. 

Hmeichhe tam tak pawh hian hmeichhe seat hauh hi chu an duh vak lo. Tih laiin a tling tak tak leh mipa pawhin an tluk phak loh chu an awm narawh e, chung mite tan chuan seat hauh sak pawh ngai lovin an fawr chhuak ve nawlh thei tho a ni. Sairang nu Pi Theresa Rothangpuiite, Pi Indira Gandhi, Pi Mamata Banerjee etc. te ang hi chu ruat seat an tan siam a ngai ve lo, an fawr nawlh zel mai zawng a nih hi! Thingtlang khaw tam takah chuan hmeichhe candidate han luah tur hi hmuh zawh a har em em a, a luhai thlak mai piah lamah khaw roreltu fel neih loh phahna hial pawh a thlen thei rum rum awm asin le! 

Tin, V/C term rei ta lutuk hi a veiawm hle bawk awm e. Tun hma zawnga kum 3 term kha a tawk viau a, kum 5 em em hi zawng a rei lu lam deuh a ni. Thingtlang khaw tam takah hi chuan an in chhang kham hman lutuk deuh a ni ber e. V/C member-te tan lah hlawh nei mang hlei lova kum 5 tal tap mai mi rel bura awm chu a lo hrehawm ve bawk a. Hlawh an neih loh mai bakah an lawman lah a beitham lutuk bawk nen, V/C ṭanglaite ngei ngei pawh hian rei lutuk an ti hi an iak an iak ve tho hlawm nia! Chuvangin, tun kan inthlan leh hunah hi chuan an term pawh hi kum 3-ah bawk khan tlak hniam thlak tir leh ni sela a ṭha hle awm e. 

Kan inthlan dawn hun atana sawi hmaih theih hauh lohva ka hriat chu kan lehkhathiam neih, thingtlangah chuan HSLC passed chinho angte hian candidate hi chang hlawm se tih hi a ni. Tunah chuan ram a changkang tawh a, engkim mai digital hmanga tih a ni a, tih laia heti lama tlang chhuak lo lutuk khaw hotua kan dah a nih ngat chuan hmasawnna chu a ṭhuanawp hle dawn tih hria ila. Tin, sorkar lehkha kal vel pawh hrethiam thei nghal mai chi, plan leh policy pawh duang ve mai thei ang chi tur hi ni hlawm se, tichuan khaw­tlang hmasawnna chu a ṭhuanṭhu reng bikin a rinawm lo. 

Tun inthlan tur hi chu uluk takin in buatsaih ang u. Ka ziah chhan ber - hmeichhe tana seat hauh hi kan sorkar hian nuai bo ngam se.