Kan CM tualzawlah Vaiho an pungkhawm maw?

Tun hnaia ka thil hriat zinga min khei ber chu kan Chief Minister Office tualzawla vai pawl hmelhriat ngai hleih loh mi 100 chuang an pungkhawm tih kha a ni. A thlalak te ka hmuh phei kha chuan ka ṭek chhuai a ni ber a, a pawi ka tiin ka thin a ur a, eng vanga Vaiho hian min zuam ta viau nge an nih? tih rilruah a lo lut nghal a. Kan YMA lamin ngaimawh lo ang maia an ngawih bopui tih ka hriat phei hi chuan he ram hian chhantu a ngaiin Zoram hmangaihtute a taka pen chhuah a hun takzet a ni. 

Kan CM kawta Vai pung­khawm khan enge an tih? kan tih chuan, Tuikuk (Bru tiin tunlaiin an sawi) ho thlavanga an hauh a, an la ti ta deuh deuh a, Vai pungkhawm mah kan ngaimawh tawh naka laiin zak miah lova Tuikuk thlavang kan tualcharah ngei, chutah pawh kan CM office kawtah an rawn hauh ngam hi Mizo thinlung a tina takzet a ni. Hei chu politics-a lak chi pawh a ni lo e. Tuikuk thlavang hauha kan khawpui bera punkhawm hrim hrim hi Mizoten kan duh loh hulhual tur a ni a, chutah pawh a pungkhawm hi Vai pawl  Bharat Hitraksha Abhiyan (BHA) an la ni zui an ti. He pawl hi ka hriat vawikhatna a ni a, ka hriat meuh chuan kan rama office pawimawh leh kan hotupa ber hnathawhna kawtah an lo pungkhawm a nih chu! 

MZP ho zawhna kha kan Home Department lam chhan tur em ni? Tute nge kha Vai pawl rual kha ILP lo siamsak? Social media lama kan lo hmuh ve chu kan Police hotupa pakhat khan an lo luh tur kan hre lo kha a ni a, tak tak a ni thei dawn em ni? Mizorama an lo luh tur hi hre lo pawh ni se, khati zatin High Sikul field an pelh kha chuan CM office-a secutiry duty te khan ral khel dar vuain an tiding ngei ngei tur a ni. CM chenna in leh a office panin Vai 100 chuang chu Police hriat lovin (Police hotu pakhat sawi hi a tak a nih chuan) an kal thei a nih ngai chuan kan CM hian amah vengtute hi a sawn darh vek a, a thlak nghal a ngaiin ka ring. Mi 10 pawh ni se CM office-ah an kal dawn chuan Police-in an hriain an hnawt ṭiau tur a ni. Tuna kalte hi mi 120 chuang an la ti ta deuh deuh a, kan CM office a ni heng Vai pawl hian an pan ni. 

Central YMA lam pawh zawhna ka zawh ve duh chu politics hawi zawnga miin an kal pui hmain heng Vaiho lo lut chungchang hi anmahni hian buaipuiin umzui nghal rawh se, hei hi in ti thei ang em? Political party-in an umzui chuan politics-a pawl leh pawl inpuhna satliahah kan chhuah leh mai dawn. Kan sorkar hian eng vangin nge Vai 120 chuang lo lut a, CM office-a kal tur hi an hriat loh? Kha thil thleng kha September 6/7 emaw niin an sawi a, social media lama a darha mi nawlpuiin kan hriat kha chu a hnu daihah a ni. He thil thleng lian tak mai thup bo tumna awm hi eng vang nge ni ang? 

MZP pawh zawhna ka neih leh chu Vai pawlin kan CM office an luh khung tawha thuchhuah rum tak siam kha an duhtawk mai dawn em ni? An umzui dawn lo em ni? MZP thuchhuaha zawhna awm "Tunge ILP siam sak?" tih leh, "Police-in an hre lawk lo em ni?" tih te kha umzui zel a ngai a ni. Mizo pa ka nih angin kan state hotupa ber office kawta Vai hmelhriat loh pawl an pungkhawm thei hi chu ka lai a na khawp mai. 

Meghalaya hi entirna atan han hmang ta ila. Shillong velah hian Mizo tam tak an awm a, anni hian harsatna nei se Meghalaya CM kawtah inhawr khawmin an pungkhawm ngam ang em? A teuh lo mai. Hei hi chu Mizo harsatna chungchang a la ni ta zawk a, tuna kan sawi hi chu Tuikuk thlavanga hauh turin state hrang hranga Vaiho an intelkhawm a, kan CM office-ah an lo kal ngam a nih chu mawle? 

Hei hi state ralmuang kan nihzia kan sawina a nih dawn chuan, Vaiho an duh duh huna an lo luha an punkhawm theih dan zawnga ralmuan hi ka Mizo thinlung duhzawng a ni lova, a mawia sawi mai mai lova a tak taka "Pathian leh kan Ram tan" titu kan hnam sipai martarte kha an thinlung a va na dawn em.