BJP hi an hlauhawm tak tak em?

Kumin Lok Sabha in­thlanah chiang takin BJP-in hnehna an chang a, anmahni a seat 300 chuang an la thei kha a chhinchhiahtlak hle. A awmzia chu party dang puihna tel miah lo pawn sorkarna an siam thei tihna a ni. Rajya Sabha-ah pawh an dinhmun an sawh ngheh zel avangin an thil tum leh an election manifesto ṭhenkhat na taka kalpui an tum tih an sorkar hun chhung rei lo aṭang pawh hian a hriat theih. Chung zingah chuan J&K Constitution ṭhiah leh National Register of Citizens an kalpui hmanhmawh dan hian a tichiang awm e. 

Hindutva hi engnge tiin Hindu ho hi zawt ta ila, an sawifiah dan a inang lo nuai maithei, an kalpui duh dan pawh Hindu ve satliah leh RSS ho chu a inpersan viau thei bawk. Hindu Rashtra (Hindu Lalram) din tumna a awm em ti leh ta ila Hindu kulmuk deuh chuan an tum viau a ni thei a, Hindu ṭhenkhat chuan thil theih a ni lo tih emaw tum lo tiin min chhang ngei ang. Amaherawhchu, Hindu tam zawk inlungrualna tur chu Hindu culture chawisan te, sakhaw dang a bikin Muslim leh Christian te an pun chak loh nana hmalak te, Minority ten chanvo ṭha an neih ve nuai bo a hun tawh tih te leh Hindu te pawn chanvo ṭha an chang ve tur a ni tih te chu an inthurualna tur a ni ang. Indian Constitution a Secularism chu Hindu ni lote hamṭhatna tura hmansual a ni tiin secularism ngei pawh chu siamṭhat emaw paih bo hial pawh an tuipui ang. 

Heng zinga an ngaimawh ber pakhat chu kan Missio­nary-te hnathawh hi a nih a rinawm. Modi sorkarna hnuaiah kan Missionary-te tawrhna leh harsatna neuh neuh a pung a ni tih chu Inrinni zan inkhawm a ṭawngṭaisak ṭhin te chuan an hriat a rinawm. Rajnath Singh-an Hindu chu Hindu a ni mai tur a ni, Christian chu Christian a tih te leh Mass conversion hi tihtawp a ngai a tih te chuan a nemnghet. Hetih mek laia Mizoramah BJP ten Missionary cell an din thut mai hian mak tih a hlawh a, an din chhan an sawi zinga mi Mizoram aṭanga chhuak Missionary-te data a khawn khawm ṭhin ang a tih te chuan ngaih a ti ṭha lo zual. 

India ramah hian sakhua hrang betute, ṭawng, culture, thlahtu (race) leh hnam chi peng tam tak kan cheng za a. Chu mi inang lo tak takte chu kan danglamna karah lungrual taka kan chenho tlan theihna turin Indian Constitution-in ruahmanna fel tak a siam kan ti thei awm e. Chu ruahhmanna chu Hindu-te zingah hnawk tih a hlawh ṭan mek a, Constitution-in minority leh tribal-te humhalhna leh hamṭhatna a pekte chuan ngaimawh a hlawh chho ṭan ta a. Tumah tihbik awm loa he rama mipuite hi ang khat vek kan ni tih chu an pawm dan a ni. 

BJP leh RSS-ten Hindu Nationalism hmachhuanin Hindu mipuite thinlungah thiam taka an tuh avangin chutiang rilru pu chu an pung chho ta zel. Modi sorkarna hnuaih Uniform Civil Code, one nation one election te chu kalpui tumna a awm a. Constitution hran nei Jammu and Kashmir pawh ṭhiah a ni tawh bawk. Mizoramin Article 371G kan neih te, tribal kan nih vanga reservation kan neih te leh kan Inner line permit thleng hian a derthawng thei em tih chu zawhna awm thei a lo ni ta. Home Minister Amit Shah-an Art 371 khawih chet a ni lo ang ti mah se democracy palzuta an thil tih duh dan en hian an duh a nih chuan harsatna awm nei loin an ṭhiah theih a rinawm. 

Majoritarianism: 

Majoritarianism chu a tam berte duhdana rorel tiin hrilhfiah ta ila. He ramah hian Hindu an tam ber avang leh Hindu-te inpumkhatna (example Ayodhya temple sak) zawnga hmalak thiamin ro an rel avangin he rama tam ber Hindu-te ṭha tih leh duhdan chu a lal telh telh dawn niin a lang. Chu duhdan chu Mizote tan him lo tam tak a awm thei ang. An hmalakna dodal zawnga khawsa emaw sawiseltute chu ram hmangaih lo anti-national ah an chhuah zel mai a ni. 

He rama Minority leh hnam ze hrang leh hnuaihnung zawkte zalen taka an awm theihna tura sulsuttu JL Nehru ngaisang lotu an pung telh telh a, chutihrual chuan Mahatma Gandhi thattu Nathuram Godse ṭantute awrawl pawh a ring telh telh kan ti thei ang. 

Missionary, Graham Staines te chhung­kua hal­hlum­tu zinga inhnam­hnawiha puh Pratap Sarangi leh Hindu firfiak ni ngeia puh Sadhui Pragya Singh te Minister leh Parliament member hial an lo nih tak avangin BJP second term hi India ram tan a pawimawh a, keini Mizote pawh kan ṭhanharh a kan chhehvela thilthleng te kan ngaihven deuh deuh a ṭul awm e.