KA HRIATTHIAM LOH 1

Tun ṭumah hian ka hriat­thiam loh leh mak ka tih ṭhin tam tak zinga pakhat chauh ka’n sawi ang e. A dang chu a remchan dan ang zelin. Mahse, kei hi mi chhiar tlem leh chim chin hniam tak ka ni a, ka hriat loh a nih ang ngeiin a hre zawkten in rawn sawi fiah dawn nia. 

Polythene/ plastic: Khaw­vel pumah, India ramah, Mizoramah leh Aizawlah plastic bungrua leh polythene hman hi ṭha kan ti lo em em a. Theihpatawpin mi chi hrang hrangin a ṭhatlohzia an sawi a, a then fai hna lah kan thawk nasa. Aizawlah phei chuan polythene ṭhenkhat chu hman khap te pawh a nih tak hi. 

Chuti taka thil ṭha lo leh hlauhawm, pawi nasa tak thlen thei leh kan do rawn luai luai, a do zawnga sawi thiam lah kan tam em em si chu khawi aṭanga lo awm nge maw a nih le? Van aṭang hian amahin a lo tla nge, he khawvelah hian amahin a lo tam em em ringawt em ni zawk le? Chuti a nih loh chuan heti taka kan buaipui thil hi a siamchhuaktu leh rawn keng luttu chu an awm ngei a ni awm si a. 

Engatinge a siam chhuaktu leh rawn keng luttu chu an khapa an tih tawp mai loh? Nge chutiang chu a harsa lutuk a, a buaithlak lutuk zawk? A siam chhuaktute hian a ruk thei ang berin zanah, an bed room-ah an siamchhuak ṭhin nge, khawvel pawn lam product em ni zawk? 

Heti zozai siam chhuak tur chuan hmunhma zau deuh te, khawl eng eng emaw ri vung vung leh khu luai luai, mihring leh lirthei pawh chhuak leh lut, che vel chu an awm ngei awm si a. Electric current awm theihna chin a ni ngei bawk awm si a. Eng anga biru pawh ni se, a siamtute leh phur chhuaktute kal theihnaah chuan a zawngtute pawh kal theih awm tak.

Kawng sira kuhva khawr zuar mai mai tur pawhin licence ek e bal e, fee kan tih ṭuah hum tawhna khawvelah hian chutianga lian factory/ firm te chuan sawrkar aṭanga phalna engemaw, licence, registration te pawh an nei ve dim diam ngei awm si a. Sawrkar danah chuan licence leh registration neite factory/ firm te thil siamna leh siam chhuahte chu a kaihhnawih department in endik tur ni awm tak a ni bawk si. Ka buai tulh tulh mai! 

Chuti taka he lei mihringte tana hlauhawm leh pawi thei, kan buaipui leh em em si chu engatinge he lei mihringte bawk hi kan siam chhuah tir/ Mizoramah kan lak luh tir reng? A ṭhat lohzia te, a hlauhawmzia te leh hmang tawh lo tura zirtirna leh thenfai hna, India ram mihring tluklehdingawn khat aia tam fe te hnena tlangaupui tlangaupui lo hian; India ramah chuan a siam chhuaktu chu maktaduai khat pawh lo ni se. Chung mite zawn chhuah leh tihtawpsak chu tluklehdingawn aia tamte hnena sawt mang si lova ka, tha leh hun sen ṭeuh ṭeuh ai chuan, polythene/ plastic hman khap kawngah chuan a awlsamin a sawt zawk dawn lawm ni tihte hi ka lo ngaihtuah buai ve em em a. 

Tin, Mizoram emaw, Aizawl­ah emaw chuan a siam­chhuaktu chu an awm ve lo maithei. Chuti a nih chuan a rawn keng luttu an awm a ni mai. Chuti a nih chuan, polythene/ plastic ṭhat lohzia nasa taka au au puitu leh tha tam tak thawhtute hi Mizoram lo luhna gate lamah hian lo duty sela emaw, sawrkar mi leh sate emaw hian uluk takin lo check zel sela. Zikhlum laimu chhunga mi leh Tanakha bur chhung mawng lam zatvea ruihhlo te reuh te pawh man chat chat thei tan chuan, polythene/ plastic bawm lian pui pui chu lo man zel a awl zawk ngei ang. Aizawl khawlai dawr chhunga mi leh kawngkam chawhmeh zuarte aṭanga man tur veh veh ai chuan a tih chi deuh lo maw? Ṭawngkaa sawi ringawt hi chu mihring zahve pawh hian kan bengkhawn bar emaw chu le? 

Nge, an sawi ang he hu hian a lo hlauhawm tak tak lo a, politics ang deuh hian sawrkar leh mipui lamah hian mi chi hnih, ‘mi eizawnna tihchhiat ai chuan lo siam chhuak mai mai se, a remchang bawka i hmang mai mai ang u’ ti pawl leh ‘kan do ngei tur a ni. Polyethene/ plastic khap lamah hian i’n che vel vak teh ang u’ ti pawl an awm mai zawk em ni tihte hi kei mi mawl lo buai vena tawk chu a ni e.