LIRTHEI PARKING ATAN KAN ZUAH PHAL LAWM NI?

Bazar pui (Sabji Bazar) chu sak ṭhat turin hma lak mek a ni. Tunah hian a ṭhiah hna zo tawhin, a hmun laih rual leh lung rem hna thawh mek a ni. Hmanni chu bazar puiah ka kal ve a, ground floor zawl duai maiah chuan, two wheeler an lo park dal mai a, a remchang hle a ni. 

Aizawl khawpui tawt lutuk hi buaipui tham a ni tawh takzet mai. Kan kawng a zim si, motor parking kan mamawh dan hi kan hmu tlang vek a, a kawng awm thei ang ang dap a hun a ni. Tuna kan dinhmun: Kan khawpui hi a tawt tawh em avangin, motor nei pawhin, ṭul feah lo chuan, khalh chhuak duh lovin, two whee­ler kan hmang rim tawh zawk. Traffic jaam a zia deuh vang a ni. Mahse chu pawh chu parking lamah harsatna a la awm cheu. 

Dawrpui hmuna kal khawmte tana Two wheeler parking awm thei chu, Millenium Centre, Dawrpui Biak In bul, Bara Bazar phei, Dawrpui Biak In thlang, Sakawrpului, Saron veng chho, te an ni. Heng parking kan neih hmun hi, a khat hneh em em reng mai a, khawi hmun mai pawh sawn, park dawn chuan darkar chanve te nghah phawt loh chuan, kan park nghal thei tawh lo - khat tak a ni. 

Mite chuan: Mi state-ah chuan, Bazar pui hmunah, tuna Zodin Cinema hall hmuna parking building siam kan tum ang saw, in lian tak, chhawng emaw zat an sa ut ṭhin. Chu chuan bazar kal a ti nuam em em. Lirthei tam tak a park theih avangin, keini angin harsat­na em em an nei ve lo. 

Kan rawtna chu: Tuna bazar in kan sak thar turah sawn, ground floor chauh saw chu, Two wheeler parking atan zuah theih ni se. Ruahmanna kan siamin kan ruahman tel lo a nih pawhin, siam thar leh harsa lo tak tur a ni tho. 

Motor erawh chu a panna kawng kan zuah tet em avangin, mipui tan harsatna a siam thei dawn, duhthusam pawh rawtna siam ngam a ni tawh lo zawk. Two Wheeler parking atana kan zuah phal a nih chuan, power house kawng aṭanga lut thla in, bazar pui aṭanga saron veng panna kawng phei saw chhuah nan hmang ila, khawng kamah sawn thil zawrh phal loh ni tawh se, harsa lutuk lovin parking panna a awm thei ang. 

Kan hmabak: Tunah pawh parking kan neih hmun zawng zawng chu, engtik­lai mai pawhin a khat tlat reng mai si a, kum tin lirthei kan neih thar dan ngaihtuah phei chuan, kan hmabak chu huphurhawm tak a ni. Kan rawtna hi ti hlawh­tling hram ila chu, hun kal zel atan kan inchhir lo ngawt ang le.