KS Vrs VOTERS

Kanan hmeichhia nawhchizuar Rahabi kha tun lai ṭawngkamin khawpui Service (KS) hmasa ber bible-a kan hmuh theih chu a ni. (Joshua 2:9-13). Nawhchizuar mah ni se, Pathian mi ram enthlatute chhanchhuaktu a ni a; Pathian a tih hle tih a chiang. Misual bera kan ngaihte pawh hian Pathian tilãwm nun an lo nei thei reng mai! Fel taka lang leh inngaihlu êm êmte hian Pathian ram an luah vek dawn lo tih chu thil chiangsa a ni.

Kum 2400 BCE vela Rahabi-te'n nawhchi an zawrh lai khan  temple-brothel  Sumerian puithiamho chenna Uruk khawpuia mi te; kakum temple milem pathiannu Ishtar hnena hlan thianghlimte chu KS chi thum (3 grades)-te inzawrhna  tawmbûk ber a ni.

Rahabi Jeriko nula bãkah hian Aspasia, Grik lal ina nula khawi suamhmang nupuite, Phryne, Grik ina nula khawi te, Thaïs, Grik lal ina nula khawi, Alexander the Great-a hnun laia mi te, Theodora, Byzantium lalnu hun laia mi te, Su Xiaoxiao, Chinese nula kum zabi 5-na hun laia lal ina nula khawite chu KS lãr zualte an ni.

Kum 1500c-1815c inkãr lai vel khan KS lãr leh hmelṭha tak tak 7 lai an awm a; kum zabi 19-na lai khan 12 an awm bawk a, kum zabi 20-naah chuan 20 zet an awm tawh. Tunah phei chuan khawvêl pumah KS eng zat tak awm tawh ang maw? Hriat vek sên pawh a ni tawh kher lovang. Mahse, hengho hian Covid-19 hripui hi an tuar nasa ber nia ngaih a ni. A chhan chu an hna hi LAC Ladakh phairuama Indian Army leh China sipai PLA -te inpawmchilh anga inpawmchilh ngai chi a nih avang leh fawh thianghlima chibai inbûk chi a nih avangin an eizawnnain a tuar nasa hle a; an robãwm leh sum hmuhnate nen social distancing zawma new normal-a an nun a ngai tawh si a ni. Thil duhawm lo tak ni mah se, khawvêl awm tirh ata Isua lo kal leh thlengin KS-ho hi an awm dawn a, zu leh ruihlo ang bawkin khap rêm ngawt chi a ni lo.

KS kan duh loh êm êm lai hian kohhranho pawh hian sawma pakhat leh thilpekah nawhchi zawrh man kan lo têl ve reng thei tho bawk tih hi kan hriat a ṭha hle.  Tun hmain Mizoramah nawhchizuar an awm nual ṭhin rãwlthar kan nih ṭantirh lai chuan Aizawl upper bazar phei saw "Nawhchizuar lane" tih a ni ṭhin. Kum 2000 hnu lam aṭang khan nawhchizuar tih ṭawngkam hi Khawpui service (KS) tia  thlak thleng tan niin a lang. A hming chauh a dang a, a nihna occupation/profession erawh thuhmun reng a ni. 

Heng KS-hote hian an taksa chu zahthlak taka siamin an inti-itawm a, mipain an dãwr duh tur ang bera incheiin an inti-itawm a; an taksa chu eizawn nan ber an hmang ṭhin. Khawvel mipui tam berte'n hmusitin thiam lo hle thin mah ila, piansualna chi khat, sim hleih theih loh thil an pianpui avang leh ei bãr zawn nana an hman ber a nih avangin khawvel awm chhungin an awm ve reng dawn a ni. KS kan hmuhsit êm êm lai hian anmahni ang bawka bawlhlawh, mahni zahawmna vawnghim ngam lo an tam hle. Inthlan dawn apiangin hetiang mi hi an pung hluai ṭhin lehnghal a.

Kan hma lawk february 16/2021-ah khian Aizawl Municipal Corporation (AMC) seat 19 luahtu tur mipui aiawha roréltu tur kan thlang chhuak leh dawn a. India khua leh tui dik tak kum 18 tling chinte chuan - The Constitution (sixty first amendment) ACct 1988. 21 years to 18 years. 21 Mar 2018-in kan hlutna (voting right) Article 326 of the Constitution of India-in dikna chanvo a pek angin MP, MLA, AMC, LC/VC member-te thlang chhuak turin zalen takin India khua leh tui dik takte chuan an dikna chanvo an hmang ngei tur a ni. He an dikna chanvo hi duhthlanna thianghlim tak nen ram hruaitu tlak, roreltu tlak ngei nia an hriatte chu vote hmangin an thlang chhuak tur a ni.

Hetiang hi India danpuiin dikna chanvo a pek ni mah se, mi tam takin anmahni dikna chanvo hmang thei lovin sum ngainatnaa an khah liam ṭhin avangin KS-ho ang bawkin an zahawmna 'voting right' chu an hralh ṭhin. 'Mi hausain mi rethei ro an relsak a; Tin, pûktu chu a puktirtu chhiahhlawh a ni.' (Thuf.22:7).

Nov 3, 2020-a USA President 46-na inthlan tumah hlei hlei khan mahni hlutna hralh -selling vote- chu hmuh tur a tam a nih kha! Kum 2014 India Lok sabha inthlanah pawh khan vote leina tur tangka vaibelchhe tel teh meuh man chhuah a nih nawk kha! 

Tunah pawh he chawchah tenawm tak hi politic platform aṭangin lang lo thei ang berin an rawn paipãwn leh ngei ang tih chu a rin lawk theih a. An ṭawngkam chuan tu ma'n vote lei an tum ngai lova; vote hralhtute paw'n a langah chuan vote hralh an tum ngai lo. Mahse, vote thlak dawn zanah meuh chuan ãr nghal vena invên ngai khawpin MPF unit ṭhenkhatte chuan an buaipui hle ṭhin tih hriat theih a ni. Hetiang a nih chhan hi India khua leh tui rinawm lo an tam lutuk vang a ni. KS anga an taksa mualpho taka zawrh duh lo inti siin, an dikna chanvo hlu tak voting right erawh hralh an pawisa leh miah ṭhin si lo a nih chuan KS-ho nen engmah lêm chuanna an nei lo tihna a ni.

Hetianga an dikna chanvo humhim zo lova an tihchingpen/hralh ṭhin avang hian ramhruaitu ṭha, ram hmangaihtu dik tak leh mi retheite chanvo humhimsaktu tur roreltu an thlan chhuah theih loh phah ṭhin a, a tawpah chuan anmahni bawkin hrehawm tiin an tuar a, an kun leh tlawk tlawk ṭhin a; inchhirin bãn a chen tih zawng zawng an nei leh ṭhin. Inchhir viau mah se awmzia a nei tawh ṭhin lo. Kum 14 UT kan nih hnuah kum 34 State puitling kan ni leh tawh chungin India ram state hnufum ber leh intodelh lo ber kan la ni tluang zelte hi voters-te'n an hlutna hralh an chin ṭhin rah chhuah vek a ni. Candidate-te'n therhlo leh hlawh lam an rawn paipãwn a, mahni vote hlu tak chu a nihna anga hmang thei lo turin sum leh therhlo hmangin an thunun a, anmahni duhthlanna dik pawh hmang thei lovin, zu, uisa, pocket money, contract lem, thlarau compensation, sorkar hna lem, development lem, Central scheme lem, chhung tina pawisa sem tur lem, etc te'n an rilru a bawh buai a, an duh loh zawng tih hre reng chunga vote an thlãk ṭhin avangin a tawpah an ṭahpui leh si ṭhin a ni.

Chuvangin, India khua leh tui ṭha i nih chuan AMC inthlanna lo awm turah pawh hian i dikna chanvo (voting right) dik taka hmang turin mahni inthunun la, Aizawl khawpui hi SMART CITY puitling, India ram khawpuite zinga chhuanawm ber leh mawi ber, ṭha ber, awhawm ber most beautiful smart city nihtir thei tura i ngaih leh duh zawng ram hmangaihtu dik tak thlang chhuak thei turin political party membership nihna atchilh bãnsanin i dikna chanvo hmang ngam la, tichuan, India ram leh Mizoram hmangaihtu, khua leh tui ṭha i lo ni dawn nia.