DAN CHU DAN NI MAI SE...

Kan chenna Zoramah ringawt pawh hian dan hrang hrang a tam ang reng viau mai a, mihringin kan hman tura kan duan a ni hlawm vek lehnghal a, a duangtu te ngei ngeiin an han bawhchhe lui leh ṭhin erawh dan zahawm tak chuan ngaihhlutloha awm phah ta ṭhin hlauh erawh a pawi ṭhin. Dan hnuaia leng vek kan nih avangin dan pawisa lotu chu kan dah langsar lo thei lo ṭhin bawk si a, a tute pawh mai tan dan chu lehkhabu keu ngai loh ang maia char beh tlat ni zawk mai sela a tih theih rum rum hial awm e. 

Dan eng chi pawh mai hi duan a har a, dan siam tawhtute hi an fakawm a ni. Nimahsela dan chu midang tana duan erawh a awlsam ang reng viau thung bawk a, zawm vetu nih lem loha kan tan dan chu duan a nih loh erawh chuan a hlu lo lehzualin dan chuan pawisak a hlawh ngai lo thung ṭhin. Hetiang deuh hian kan Minister thar pakhat chuan a Department enkawl bik te tan dan thar - zing dar 9:00 a office thlen tih chu a han pharh ta hluai mai a. Mi tam tak ngaihdan turah chuan kan Minister thar chu a ṭha dawn hle mai, hna pawh thawh tak tak a tum tih a hriat e; office hour pawh tidanglamin zing dar 9:00 ah office thlen a ti a ni. 

Staff te tan pawh hnathawhna hun a tam ngei dawn bawk a, an Department chuan hma a sawn ngei ang maw le? Tih ngaihdan a awm thei ngei ang. 

A lehlam kawnga ngaihtuah erawh chuan chu dan thar, ho tea lang pawh nisela dar 10:00 am pawha office thleng mumal hman lo fo ṭhin tan chuan phurrit a tling nghal mai a. Thawktute thinglunga ṭhahnemngaihna a awm tak tak chuan si loh chuan hna-in hma a sawn phah lem chuang hauh lo ang. 

He Dan duang chhuaktu hi tu pawh nisela ṭhahnemngaihna avanga duang nge a nih a, sorkar thar hmel mawina atan chauh? tih pawh ngaihtuah tham tak a nih theihna a awm. Minister ber tih pawh chu a ni maithei bawk a ni. A nih hlauh phei chuan khauh taka lekkawh tur nge zelthel taka zawm tur ni ang? Dar 9:00 am a kim lo chu hrem tur nge ni a nuih liam mai mai tur zawk? Engtia rei hman tur nge ni ang? Tih te thlengin keia lo ngaihtuah vak vak tur phei chu awm hauh lo mahsela ka thinlungah a awm zut zut mai. 

Ka beisei dan takah phei chuan Minister ber hian dar 9:00 am office thleng ta zat zat sela chuan hnain hma a sawn phah ngei ka ring. Chutiang ni loa a bial chhung khawilai hmun emawa a lo fatu daih zel ṭhin erawh chuan officer te tan chuan zelthel a awl viau tho ang te ka ti mai mai bawk. Hetiang hian tunhnaia kan Minister pakhatin office hunbi a tih danglam chungchang kan han sawi ta vak a, lo thlir zel phawt ila. Heng Department hi Mizorama Department ṭhang duang ber an nih ṭheuh pawh ka beisei a, Zoram hmel ti mawitu an nih ngei ka ring bawk a ni. 

Dan chi hrang hrang a awm a, Bible-ah pawh dan 613 lai kha Pathianin Israel fate a pe a ni. Chutiang bawkin kan tan pawh dan chi hrang hrang a awm a, zawm tur tam tak a awm a ni. Nimahsela dan hi ṭha in hlu hle mahsela zawm erawh kan harsat tlat thung. Hnai te han sawi ta ila: Aizawl khawpuiah traffic dan ṭha tak kan hmang a, mipui leh motor khalhtute tan pawha zawm har miah lo leh him zawk tura duan a ni. Motor number tlan loh hun thlenga dan nei kan ni a, nimahsela chu dan ṭha tak chu ṭhenkhatte hi chuan zawm har kan tih mai piah lamah dan pela kal chu engemaw riaua ngai te kan awm ve leh hram tho mai. 

Ka hriat chian em em pakhat han sawi ila - Civil Hospital-ah mitthi a awm a, chuta kal tum chuan mi pakhat chu chawlhhmun aṭangin a rawn chho dawn a, a motor number tlan loh ni a ni si a, traffic police Deptt. a hmelhriat hotu pakhat chu a phone a, a ni chuan Chawlhhmun aṭanga Civil Hospital thleng chuan a rawn clear sak ta vek mai a, a thleng chu intithei taka nui chungin a sawi ham ham mai a, ngaihtuah a tih thui hle a ni. 

He motor khalhtu leh Traffic police hotu hi an demawm ve ve ka ti. Dan chu dan ni mai sela, dan pela kal chu dan bawhchhiatna tiin a bawhchhe lui chu hrem ta mai sela dan hi kan hlut ngei zawk ka ring. Hetianga dan chunga kal hram tum kan awm ṭhin avang hian kan dan ṭha tak te hi ngaihhlut a hlawh loh mai bakah thil dangah pawh dan palzut kan tum ta ṭhin a ni. Dan kengkawhtu pawh chuan tumah thliar bik awm loin dan chu khauh takin kengkawh mai se, anmahni pawh an zahawm ngei ang. 

Vawikhat erawh chu keimah ngeiin ka tawn a awm a, Civil Hospital leh chhim lama KT Khuma Building inkar kawng ngil laiah hian motor kalna dal loin reilote hi two wheeler ka park leh zauh ṭhin a. Ni khat chu traffic duty pakhat hian min man a tum tlat mai a, ngaihdam ka dil ngial pawha min man a tum tlat si-ah chuan ‘Ni e, nidangah pawh ka park zauh zauh ṭhin a, min man in tum ngai chuang lo a, tunah pawh park lehin lehkha ka lam zawk a ni mai a, min man i tum tlat a nih chuan dan ka bawhchhia a ni ang e, min man mai rawh’ ka ti a, chutia ka han tih chuan min chhuah leh ta mai bawk a. Chutia min chhuah leh mai chhan chu min khawngaih vang nge? Dan a nih zawk vang? Tih chu tun thlengin ka la hre chuang lo a ni. 

Hetiang hian thil dangah te pawh kan dan neih te hi zawm ṭhata hlu a zawm ṭhat loha hlu lo mai an niin nang leh keia vang hian kan dan neih te hi mawia mawi lo mai an ni. Danin mitin min huap avangin kan dan nei te pawh hian tumah thliar bik nei lo sela. America President fanu kumtlin hmaa zu in pawh dan a nih loh avangin an man ang mai khan kan dan neih te pawh hian milian leh mite tumah thliar ta lo sela mitin te hian kan ngaihlu ang a, kan zah ngei ang. 

Minister pakhatin parking place hmun ni loa motor a park tlat a, motor hmalama ‘Minister’ tih in ziak awm ngei chunga dan bawhchhiat luih chu nuam zawka a hriata intihtheihna zawnga a ngaih tlat chuan he kan ramah hian hmasawnna tur ala tam hle tih a hriat mai a ni. Chutiang bawkin kan ram hruaitu tura kan thlan chhuahte hi ruai sa bel an vil avanga fak hluak tur pawh a ni kher lo. An nihna leh an hnaah fakna tur an awm a, ram hruaina kawnga an thawh ṭhat chuan inthlahrung hauh loa fak mai tur a ni. 

Office kalna atan sorkar motor hmang loa taxi emaw two wheeler taxi hmanga kal pawh nisela an hnathawh lama fakna tur a awm chuan loh chuan ha lang var sur chunga thaw rimtui chuang lo ang maiin mipui rawngbawl tlak a ni lo tihna a ni mai. Dan chu dan a nih ang ngeia zawm mai tur a nih angin fak tur leh fak loh tur te pawh hi kan hriata engemaw hleka chiai mai ṭhin kan nih ṭhinna paih bo a, social media lama vawrhdarh chiam te pawh hi sim tum teh hlawm ang u. Dan chu dan ni mai se.