Tinreng bawm...

Mau hman ṭang-kai: Hmanlai chuan bang atan te, chhuat atan te, chungdal (Thil­thek inchung dapin an khuhna hi) atan te, kawngkapui leh tukverh kawngkharah te kan hmang ṭangkai em em ṭhin. 

Pa themthiam deuh­te chuan Pate leh Papui-ah te an tah a, Arbawm leh Artui­bawm­ah te Thilpumah te leh a dang eng engah emaw an hmang ṭangkai viau ṭhin. 

Sap hovin min rawn awp hlim leh kan Missionary Sap te pawh khan an awmna tur Bangla-ah te leh khaw hrang hranga Bangla an sakna atan Mau hi an hmang nasa a. Chung zinga mi chu Serkawna Mission Sap Bangla pathum la ding te, a bangah Thumbawh-kaihsawihin, Ceiling atan mau an hman chu hmuh theihin an la awm a ni. Rawng hnawih thata enkawl ṭhat chuan an tlo hle. 

Tun hnu hian heti taka mau hman ṭang­kai hi bansanin vai siam tiles te, bricks te, plywood te, rangva etc. in kan thlak ta deuh vek a.

Lunglei Bazar venga kan In hi chhawng hnih ceiling te chu Mau ka hmang a. Thumbawh-kaih­sawih tah thiam an lo vang tawh hle a, ṭum hnih ṭum thum hlawhfa ka thlak a, kan puitlin hram a ni. Hei hi 1996 -98 khan a ni. A bangah pawh Mau bawk hman ka tum a, mahse Mizoram ruahtui leh thli tamna, kum tin ṭo lo hawng ṭhin nen, Sap ho Bangla sak anga uluk leh tlo tur ang tlin dawn si loh chuan, tiin tuman min advice lova ka ti ta lova. Ka bang ṭhenkhat erawh chu thing - Saphuhawng (ruah theh loh lam) in ka ti hram a. 

Vaiho chuan paper siam nan leh furniture siam nan te hmang ṭangkai thiamin nasa takin kan ram mau an tawlh ṭhin a. Keini pawhin khawl hmanga thil tangkai lehzual siam nan kan mau neih te hi kan hmanzai a ṭha hle a ni. Vai company (emaw ni) te nen kan sorkar hian hetiang zawnga hmalak an tum thu te news-ah kan hria kha a tihzia hle a, a ṭha e. 

Mau lama tui CM kan nei leh ta bawk a, kan rama Mau hi sum siam nan te i hmang ṭangkai zel teh ang u. 

Alu leh dal: Mizo­ramah i ching ve ang u. Alu phei chu hman­ah pawh kan ching a, a ṭha duhin Lunglei khawpui pawh Theiriat leh Sairep alu-in min chawm thei a nih kha. Dal (dailuah) erawh chu a chinna tur hmun ṭha leh a tih puitlin dan Agriculture Dept. in min hrilhin min zirtir sela, tih thu Lunglei Dailies leh Vanglaini-ah ka ziak tawh a. 

Hmanni lawk thlenga kan Agricul­ture Minister R. Lal­zirliana hnenah khan personal letter-in ka va rawt pui tawh bawk. Sorkar ngeng chhun zo lo hle mahse ṭul leh ṭha ka tih em avangin hmanni khan kan Agriculture Minister thar C.Lalrinsanga ka sawipui leh a. Ani chuan ṭha min lo tihpui a, purun sen leh var te pawh uar ta ila, te a lo ti hial a ni. 

A lo hriat zui zel theih nan Chhimbial Chhantu hmingin ziakin kan thehluh leh a ni. Heti zet chuan kan Sorkar thar, a ngaihna hria hian hma a lak ngei beisei teh ang u. Kan ei sen loh kan thar hunah kan hralh thei dawn a ni.