Laptop leina nei lo secretary rual!

Ni 23 September, 2019-a sawrkar thu chhuak No D-2018/1/2014/SAD(G) in a tarlan dan chuan. Sawrkar milian Secretary, Joint Secre­tary leh Under Secretary rualte chu an laptop leina man re-imburse (pek let) an nih tur thu kan hmu a ni. 

He order hi mipuite hmuh­sitna order a ni, tih ngaihdan lo nei hialte pawh awm mah se an demawm lutuk hauh lo ang. He order-in a tarlan dan chuan, Secretary rual leh an chunglam te chu an laptop leina cheng 80,000, Joint Secretary rualte chu 60,000 ṭheuh leh Under Secretary rualte chu cheng 40,000 ṭheuh pek let an nih tur thu a chuang a ni. 

Tuna kan sawrkarah hian, Department 42 lek enkawl turin Secretary rual mi 32 teh meuh zuk awm a! Joint/ Addl Secretary leh Under/ Deputy Secretary te nen phei chuan khaw te din tham an awm khawm a ni. Laptop lei tur hi mi 160 vel lo ni ta se, Laptop lei na'n cheng nuai 96 vel hman a ngai dawn tihna a ni. 

Hetianga Laptop leina tur pawisa hi uicho mawngkua aṭanga chum chhuah a ni lo a, van aṭanga rawn tla emaw lei hnuai aṭanga laih chhuah emaw lah a ni hek lo. Sawrkar sum aṭanga lei tur a ni a, sawrkar sum chu mipui sum a nih avangin, mipuite hian kan sawrkar milian Secretary rualte chu Laptop kan lei sak tihna a ni dawn a ni. 

Kan Secretary te hi an hlawh leh hamṭhatna an dawn te aṭanga chhutin, Laptop lei sak ngai khawp hiala rethei an nih a rinawm lo a, an hnathawhna atana an hman tur Laptop na na na chu lei ve thei dinhmuna ding tura ngaih an ni. 

Tin, kan Secretary te pawh hian mipui sum hmanga leisak kher ngai lo hian anmahni hman tawk Laptop te mai mai chu an kawl ve fir ferin a rinawm. Mipui sum hmanga Laptop lo lei hi mipui rawkna a ni a, mipui sum hmanga duh tawka nuam lo tawlna anga ngaih theih a ni. 

Hetiang mai maia sawrkar sum hi hman ṭhin a nih chuan, Laptop leina aia ho-ah pawh hian hman zel a nih a hlauawm a, i dodal tlat ang u. Mipui pawh hian hetiang thil a lo thlen hian direct takin kan fairelbel rawn nghawng lem lo mah se, kawng tam takah chuan hetiang pawh hian kan chhungkaw dinhmhun chu a sawi pha tho tho a ni tih i hria ang u. Ṭhalaite pawh hian social media a mi chanchin mai mai ngaituah a, khel ringawt lo hian, kawng dik loa mipui sum sum hman a nih dan te hian kan beng verh se, rilru nat nachang te hi hria in, hetianga ram hnuk khawih cheng nuai 100 deuhthaw man hi i vei zawk ang u. 

He thu hi Secretary rualte demna thu a ni lo. Chutihrual chuan, hetiang thu a hlawhtlin theihna atana a bultumtu erawh chu dem loh theih a ni lo. Hetianga tih mai ai hi chuan an Office Desktop Computer hmanlai te tal hi lilam vek nise, chumi sum tling khawm hmang pawh chuan laptop hi lei nise mipui rilru na pawh a zia deuh ang. Ni khata cheng 700-800 hlawh pha awrh mistiri pawh a hnathawhnaah a mistiri bungrua te chu intum tura beisei an nih laia nikhata cheng sang tam hlawh Secre­tary rualte hnathawhna hman­rua mipuiin kan lo tum sak daih bik chhan tur a awm lo e. 

MNF sawrkar hi a sawrkar hmasak anga nuam tawl chunga a kal a nih chuan rei a daih hauh lo ang. Leiba kan ngah a, kan budget-ah hmasawnna hnathawhna tur a tlem si. Kan sum hnar te hi central a tuikhur phai thei lo a tui thal tur awm anga la sawi mawm tlat chi pawh a ni lo. Tunah hian Modi sawrkar hi sum leh pai-ah a hniam em em a, Indian economy chuan kum 7 chhunga a hniam ber ṭum 5% a thleng a ni. 

Hei baka chhiat lehzual tawh ngaihna hi a awm lo, chuti chunga khulam vauchhera helama ṭul lo a pawisa lo hman chiam leh nuam lo tawl chiam hi a chi loh a ni. Ram leh hnam i hmangaih ang u.