"Pathian leh kan ram tan"

Mizorama ruling party in huaisen taka thupuia an hman "Pathian leh kan ram tan" tih hi political party pakhat thu sawi ve satliah ni lovin thu awmze ril tak nei a ni. A ṭo bul a chin chhuakin chhui thiam ve lo mah ila MNF-in an ram mut laia Mizoram hi India hnuaia awm ni lovin ram bung khat hrang a ni tia an beih laia 'ram' an vei ṭawngkam kha a lo ni daih tawh a, a hlut dan leh a ropui dan hi kan chhut ngun poh leh kan hmu thiam ang. 

Mahni nunna hial pawh chân ngamin tuna kan Chief Minister te ho rual kha ramhnuaiah engmah nei lovin an han tlan lut sup sup mai a. India sorkar an do ngam chhan kha chu "Pathian leh kan ram tan" tih hian a kohin a ko a, an hma lamah hun duhawm tak nei thei lehkha zir zo hlim te te Mizo tlangvalte kha an ram chhanhim tumin an liam ta zung zung mai a ni, kha kha he thu ropui "Pathian leh kan ram tan" lo chhuahna bul hi a nih si chuan a thu hi a rilin a ropui a ni. 

Party ṭhenkhat hi chu Vairama zung kaih an ni a, an ṭo bul reng pawh Pathian nena inzawm anga chhal ve theih an ni lo a ni. Party tharlam te te an awm bawk a, hei pawh hi MNF party nena khaikhin ralah chuan a ṭobul aṭang rengin a inang lo a ni. Chuvangin, "Pathian leh kan ram tan," ti ngam party hi chu tun hnaia party ding thar ve te te te nen chuan khaikhin rual a ni lo. 

A lo pian chhuah dan pawh hi remruatna fel tak leh inpekna thuk bik leh huaisenna leh tawrh­chhel­na aṭanga lo piang a ni daih asin, he MNF party hi chu. Chuvangin, miin "Pathian leh kan ram tan" an tih chhung chu midangte nen hi chuan a insan hleih a ni tih hi kei ni ṭhangtharte hian kan la hre ve phak tak tak lova, mahse a ṭobul kan zuk chhiar ve phak chin aṭang hi chuan MNF in "Pathian leh kan ram tan," an tih avang ringawt pawh hian party naran ni lovin ram hmangaihna thuk ber aṭanga rawn irh chhuak party danglam leh vohbik a nihzia a lang chiang. 

"Pathian leh kan ram tan" ti chungin haisenna, rinawmna leh dikna nen kan ram hi enkawl zel rawh se tiin kan au a ni.