Budget corrupt sa em ni?

WhatsApp ah he thu hi ka hmu a, a ziaktu a inziak lova, khawi aṭanga an copy nge ka hre lova, chutih rualin a dik a nih si chuan kan budget system dik loh zia leh kan sorkar inrelbawl dan dik lohna hai lang tu tur a ni tel bawk si a, a ngai ngaiin mipui hriatah ka han thawn chhuak ve teh ang. A ziaktu kan hria a nih chuan rawn thual nawn nghe nghe thei se public interest atan a ṭha hle awm si a:

Kan budget hi corruption tih ngei ngei ngai budget a nihna kawng tam tak awm zinga a langsar ber chu POL chungchang hi a ni.

Motor kan hman nasat poh leh petro­leum, oil and lubri­cants (POL) kan hmang tam lo thei lo a. Kan sorkarin motor a ngah lutuk tia sawisel fo pawh a ni a. Department tinin motor an neih leh an hman nasat thin hle laiin kumin budget-ah hian Fisheries, LAD, PHE, Transport, Sericulture leh Food, Civil Supplies and Consumer Affairs te chiahin budget-ah POL an nei nia!

Engtinnge kan tih ang? POL tur pawisa neite hian an indaih dawn lo tih a chian sa hi chu thuhran nise a nei lo te hian eng­tinnge an tih ang?

Khawi aṭang emaw pawisa an pawt dawn tih a chiang a. A nihna takah chuan pawisa hmanna tur duansa aṭanga pawhhek a, chinkual hi Pre­ven­tion of Corruption Act in corruption a tih zingah a tel a. Mi fel tak takin sual vang ni miah lova corruption an tih phah tur hi a pawi ka ti.

Engatinge tun thlenga thil anih dan tura kalpui har miah si lo budget lanmawi tir tum vanga hetianga kan la tih fo mai le?”

Khi khi ka thu dawn chu a ni a, miin thil an lo chik tawh a, mi hi an awm mai mai lova, kan ram rorelna vawn fung chelh tute hian uluk takin he Zoram tan hian ro hi rel thei se, a nih loh chuan kan phawrh mualpho nasa dawn a ni, thla ruk vel lek chhung pawhin nuihzahthlak leh awm lo tak tak hmuh tur a tam chho ṭan a ni.