Mipui thleng phak

Tuivawl bialtu MLA Lalchhandama Ralte, minister of state chuan tun hnaia a bial a fannaa a thusawiah mipui thleng phak hna tam zawk thawh an châk tawh thu a sawi a, "Tun sorkar term hi kum hnih leh thla khat chhungin Covid-19 avangin thla 11, inthlan avangin thla 4 hnathawk thei loin kan awm... tunah chuan hri léngin ziaawm lam a pan a, sum leh pai dinhmun pawhin ziaawm lam a pan beisei a ni. Mipuite thleng phâk hna tam zawk thawh kan châk tawh hle," a ti a; SEDP pawh sorkar sum a ziaawm veleh kalpui turin sorkar a insan mar mek thu a sawi. 

Mizorama rorel mektu sorkar hi a vanduai hle mai a, an sorkar hnuah hna­thawhna hun ṭha an la nei meuh lo niin CM pawhin a sawi ṭhin. A minister-te pawhin hei hi an sawi fo tawh a, thil awm dan pawh a nih hmel. Hnathawk turin pawisa lo awm tehreng pawh ni se, hnathawh theihna hun ṭha an la nei loah an inngai a, chuvangin an kalna apiangah hnathawhna hun an la neih loh thu hi an sawi ṭhin a ni. 

MNF-in sorkarna vawn fung an chelh hnua hna an thawh nasat vanglai tak nia lang chu an sorkar hlim kum 2019 kum tir tê kha a ni. Khatih hunlai khan kawngpui an thawm ṭhain an sial thar a, building an sain hna pawh an sem chhuak nasa; a chhan lian tak chu hnathawhna tur sum a awm vang a ni. 

Tunah hian hna­thawh theihna hun ṭha pawh awm tehreng se, a thawhna tur sum a awm loh chuan hnathawh a harsa dawn a, Covid-19 avangin duh angin sum an hmu tam thei lo a, an vanduai hle a ni. Hetihlai hian SEDP-ah sum ṭhahnem tak sorkarin a dah a, hei hi Covid-19 hripui len vanglai pawha khawih chet loha awm reng kha a ni. Mipui thawhkhawm sum hmangin sorkar damdawi-ina hman tur khawl te lei a ni hial a, SEDP sum tur chu an la dah ṭha niin a lang. 

Heng AMC sumte hi sem chhuakin mipui thleng phak hna an thawh hun hi mipuiin an nghakhlel tawh takzet a ni. A eng chin hi nge 'mipui' tih chu hma­sawnna hna an thawh zarzotu leh an sem tur dawngtu chinah a teh theih ang.