Hei le, a ‘kaikuang’ chu!

Kan mit bul hnai seta thil awm hi hmuh chian a lo har a nih hi. Ni eng zarah thil kan hmu thei a, mah se amah ‘ni’ ber pawh chuan amah leh amah a inhmu thei hauh lo. Isua pawhin ‘mahni mita khanchhuk hmu thei lo’ chanchinte pawh a sawi kha! 

Mizoram Assembly Budget session 2019-ah kan ram roreltute khan Mizoram school education chu a ‘ṭha tawk lo’ tih an pawm tlang niin a lang. Eng pawh ni se kan dinhmun in hriat chian phawt hi hmasawnna atan rahbi hmasa a ni a, a lawmawm e. Eng vanga ṭha tawk lo nge tih erawh an chhanna a phirsi deuh. Headmaster leh zirtirtu an puh deuh ber. A ṭhen chuan “Zirtirtu, zirlai, nu leh pate hian mawh an phur tlang vek a ni” an ti. 

Zirlaite leh nu leh pate hi chuan an zawl tawkah mawhphurhna chu nei ve bawk mah se, anni ai chuan zirtirtu mawhphurhna hi chu lian ber bawr tak a ni. ‘Zirtirtu mawhphurhna chu lehkhabu bung leh changa ziak kim hleih theih loh khawpa tam a ni’ ti ta ila, kan daw vek bik lo vang. India ramah phei chuan ‘zirtirtu’ awmzia hrilh fiah nan ‘teacher’ tih ringawt hi an duh khawp tawh lo. ‘Naupangte tan ṭanpui vartu hnai reng, an taksa, rilru leh thlarau lam mamawh tinreng chhawp hnaih saktu (facilitator)’ an ti hial tawh a ni. ‘Mawh-tin-phuri nu’ an ni ber e! Mahse... 

Zirtirtu aia mawhphurtu bulpui zawk leh lian zawk an la awm cheu tih i hria em? Zirtirtute hi anmahni duhthu-a rawn chawr chhuak ngawt an ni bik lo - anmahni siamtu/ dintu (sawrkar) te, chher hriamtu (teacher educators/ academicians etc) te leh enkawl zuitu (directors/ supervisors) te an la nei duah mai. School education pumpui ṭhat tawk lohna mawh phur tur chuan zirtirtute hi chu an te tham deuh a ni! Zirlaite hi zirtirtu kutchhuak anga kan sawi phawt chuan, zirtirtute pawh hi sawrkar kutchhuak an ni ve mawlh ang. Chuvangin, school education ṭhat tawk lohna-ah hian a mawhphurtu bulpui ber chu sawrkar leh a enkawltu School Education department peng hrang hrangte hi an ni lo thei lo. 

‘Zirtirtu thatchhia’ tih te, ‘zirtirtu zu rui’ tih te chu thil awm ang lo lutuka ngaih a ni ṭhin. Zirtirtu atan hian sawrkar chuan a diltute zinga a tling leh tlak ber nia ngaihte a thlang chhuak ṭhin a; chuti chunga zu ruih ching te, mahni thawhna hmuna awm peih lo te, aikal lak ching te etc an lo la awm fo a nih chuan, a thlangtu (sawrkar) chuan a thlang thiam lo hle tihna a ni mai. 

General education lama tling tawk ‘qualified’ (HSSLC/ BA/ MA) vek thlan chhuah an nih bakah, an hna tur atan bika chher hriamna ‘professional training’ (D.El.Ed/ B.Ed/ M.Ed) nei vek an ni. Educational philosophy hmangin mihringte tana education hlutna leh pawimawhna an zir a, educational psychology, pedagogy leh teaching technology hmangin ‘zirtir dan’ an zir bawk. Zirna ruangam (edu. system) leh harsatna (edu. problems) thlengin uluk taka zirtir an ni. 

Thinlung buklung hmang thiam, zirna pawimawhzia hre chiang, zirtir dan kawnghmang hre tak mai (trained teachers) te chuan ‘zirtir’ chu an thil chak ber a ni fo tur a ni. Chutih laia ‘trained teacher thiam tawk lo’ te, ‘trained teacher aikal la’ te leh ‘trained teacher kal lo kim’ te hial pawh an lo awm ta hi a mak hle mai. Sawrkar hian zirna a vei tak zet a nih chuan hetiang mi awm ṭha peih lo, teaching community tihminghliautute chunga a tihtur chu ti mai teh se. 

Tin, an kutchhuak ṭhenkhat ningnel tak tak avang hian kan Teachers’ Training Institute te hi bih chian an ngai hle-in a lang. Thlarau tel lovin, tui chauhvin, huh hluamin an lo ‘baptist’ ṭhin emaw ni dawn le? Kutchhuak ṭha ngei ngei, ‘quality assurance’ nei thei tura siam vat a ṭul hle. Hna thiam tawk lohna hian tui lohna te, thatchhiatna te, chhuanlam siam thiam riauna te a hring chhuak ṭhin. 

School administration lam hi a ngulpui laiding deuh ber chu an ni e. Mi ṭhenkhat chuan “Mizoram School Education hlawhchham chhan ber chu ‘administrative failure’ vang a ni” an ti hial. Chhawrdawh hrang hrang (circle, sub-division, district, etc) awmin, fu-ke nei kim ve thlup si hian a che chak vak lo chu a nih hi. Inspection/ supervision tak ngial pawh mumal takin neih theih a ni lo hi a mak hle. 

School Education Administration-ah hian hmathlir (vision) te, hmuh chianna/ hriatchianna (conviction) te, ruahmanna (planning) te, rel fel zung zung theihna (administrative efficiency) te, enkawl leh vil zui thiamna (managerial skills) te hi hmuh tur a vâng hle a nih hi. 

Sawrkar ber hian neitu thinlung tak tak pu se; a kut-ke (directors/ academicians etc) te hian thiamna tluantling nei vekin inpekna tak tak nen thawk bawk se chuan ‘zirtirtu ṭha lo’ thawnthu hi a lo reh mai ang.