DEMOCRACY Vs MONECRACY

Ni 11 January 1994-a Gospel Centenary kan lawm khan Rev. Dr. H.S Luaia chuan, "Tangka hi ṭawng thei sela chuan Mizoramah ka lal ber a ti ang,” a ti a. “Isua Krista chu Lalber a ni” tih thupui atan Mizoram Baptist Kohhran chuan a hmang a ni. Rev. Dr. H.S.Luaia chuan Mizoramah hian Krista ni lovin pawisa hi a lal ta ber a nih hi, a ti ni. Gospel centenary kan lawm aṭang hian Krista hi Zoram tluanah hian lo lal tawh rawh se kan ti a ni. 

David C. Korten, American Economist, hmingthang tak chuan khawvelah hian company lianten ro an rel huna khawvel awm dan tur a suangtuahna chu a lehkhabu, “When Corporations Rule the World (Company hovin khawvel ro an rel hun chuan)” tih a ziakah hian a tarlang chiang hle. Kum 1995 khan lehkhabu hralh tam ber lawmman (best seller) a dawng nghe nghe. Prof Korten-a hian khawvel economic system hi 1956 vel aṭang khan a lo zir tawh a, chu chu he lehkhabu-ah hian a au chhuahpui ta a ni. Archbishop Desmond M. Tutu, Nobel Peace dawngtu chuan khawvela rahbeh leh chimral meka awm te, kalphung dik lo avanga retheite leh neksawra awmte chhanchhuahna tur thu he lehkhabuah hian a awm avangin chhiar ṭheuh tur a ni, a ti hial a ni. 

Khawvela mi hausa 1% chauh hian khawvel mipui zawng zawng neih let hnih an nei a, 1.1 vaibelchhiaten tui in tur thianghlim an nei lova, 1.1 vaibelchhia ten chenna in ṭha an nei lo. 1.1 vaibelchhia-in kawr ṭha lo tak leh secondhand kawr an hak laiin Corporations ho chuan ei sen loh, hman sen loh an nei chung pawhin khawvel hi a sawr fu mek zel a ni, an duhamna hian chin leh tawk a nei lo, a ti a. He lehkhabu published aṭanga kum 30 a lo liam meuh chuan America election pawh Corporate hovin an control ta a. Georgia state-a 2020 Senators inthlanna hnuhnung ber (run off election) Senate control tur thlannaah khan $443,210,000 (Rs 32,292,283,300) lai sem ni hial awmin an chhut a ni. Hei hi America history-ah record a ni. America democracy chu a hlawhchham ta, demo-cracy chu Money-cracy-ah a chang zo ta ni. 

Greek ṭawnga democracy (demos + kratos) hi vantlang rorelna tihna a ni ber a, mipui satliah miretheiho chu Greek ho chuan oxlos an ti; demos an ni pha lo. Vawiina democracy kan tih hi -dan, policy, hruaitu thlanna, hmalakna tinrenga vantlang ngaihdan leh duhdan directly / indirectly a sawi theihna sawrkar a ni. Mipui aiawh hruaitu thlanna chu zalen leh dik (free and fare) a ni tur a ni. Democracy hmu chhuaktute (founders) ho tum dan chu kan kal pensan thui ta hle mai. America ram ropui, mother of democracy kan tih ṭhin, mimal zalenna leh mihring dikna humhalhna ramah pawh democracy chu a fail chiang ta hle a ni. 

Mizoram dinhmun i thlir ve teh ang. America-ah chauh pawh a ni lo, Mizoramah pawh hian democracy hi moneycracy-ah a chang mek a ni. Party ten candidate an han zawn hian mifel, dik leh ṭha aiin mihausa an duh fo mai. Kan han inthlang a pawisa sem tur nei lo tan chuan a tlin theih tawh loh, hei hi keimah ngei pawhin ka tawnhriat a ni. Voter te pawhin sum tlemtein an zalenna leh dikna an hralh a. Therhlo tlemte avangin  chhia leh ṭha hriatna thiang tak kan hmang thei tawh lova, hei hi mahni inbumna, kan rinna phatsanna dik tak a ni. Kan Kristianna chu kan dah ṭha a, election chu gambling (pawisa khelh) in kan khel chiam  ta mai a nih hi. 

Mi ram angin company lian nei ve lo mah ila, private company, consul­tative firm te, contractor hausate chet dan i han thlir teh ang. 

(1) Minister-te an tham lungawi: Tun din hmunah chuan minister-te hi tham lungawi awl berte zinga mi an ni. Election campaign nan sum an mamawh a, sum hi an hnawl phal meuh lo. Kan state minister te Bank Account leh in leh lo hi en ila lung a awi lo. Chutih rualin mi dik leh ram tan inpe zo - entir nan, Nipendra Tripura Chief Minister kal ta te, Abdul Kalam, India President, Lal Bahadur Shastri, India Prime Minister-te chu lunghahna nei lo khawpin ram leh hnam hnam tan inpe zo a ni. Hetiang hi an awm tho mai - Zofate zingah pawh Upa Liansailova chu tuman a eiruk hi ka ring lo niin ka hria. 

(2) Bureaucrats (Officer lian ho) nen an in thurual: Bureucrats hote chu officers-te nen inthurualin an project chu State project angin an kalpui a. Tichuan, bureaucrats-ten percent engmaw zat an ei ve leh ṭhin; hetih rual hian officer rinawm tak tak an awm tho mai. Ka ṭhianpa chu Tuirial Hydel Project compensation buaipui lai khan an ko ve chhen a ni awm a, 'coffee no khat pawh he project avang hian kan in si lova,' a tih ka hre reng mai. Chutiangin officer clean deuh deuh ka hmu nual mai. 

(3) Delhi thuneitute an tham: Delhi lama approved ngai a nih chuan Delhi lam thuneitute an han zawl leh a, percent hauhin emaw sumfai pe in emaw an be rem leh a. 

(4) Contract hna an thawk: Project approved a nih chuan tender-in emaw, tender lem lo pawhin an company chuan contract an thawk leh ta a ni.

(5) Mipuite pawhin sum kan dah lal: Inthlan dawn hian kan nihna dik tak a petu leh a dawngtuah a lang ṭhin. Sum sem tel lo hian inthlan hi ti ngam hlawm ila aw...sum kan sem ang a, kan chak leh mai ang, tihna rilru nen inthlan kan hmachhawn a. Mipui pawhin sum pe tamtu apiang kan thlan chhung chuan Mizoramah hian diknain thu a nei ngai dawn lo. 

Hemi awmzia chu kan mihausaten Mizoram sawrkar chu sumdawn nan an hmang tihna a ni. A bul aṭangin thamna in an ṭan a, a tawp thlengin thamnain an kal a ni. A chang chuan minister-te hian kan company neitute hi an tlawn zawk emaw ni tih tur a ni. Hei hi tih dan tur a ni emaw kan ti ta mai dawn ni te hian ka hre ṭhin. 

Building ṭhenkhat sak a ni thei e, kawng laih a ni thei e, mahse hei hian hmasawnna tluantling a thlen miah lovang. Kan tax system dik sela, mi hausaten an tax chawi tur chawi sela, education, agriculture, innovative industry lamah te ṭan la ila, kan ṭhang ṭha zawk ang. Hetiang system hi a dik lova, State Sawrkar a tinepin a ti mualpho a ni. Hetiang system-ah chuan rethei tan hmun a awm lo. Company leh mimal hausa duh zawng leh tui zawng apiang Sawrkar pawhin a tuipui ve zel mai a ni. Ei leh bara kan la intodelh loh lai leh kan education system a chhiat hle laiin, mihausa 20% chauhvin kan ram sum leh pai 80% an control a ni. 

Phul lem (artificial grass) phah te hi development ber emaw kan ti ta mai em ni? 

Hetiang ti lo hian Sawrkar kal dan a dik a, management a ṭhat chuan nasa takin hma kan sawn thei a ni. Kan mihausate leh thuneitute ṭangrual hian kan ngaihsan zawng (value system) an tichhia a, lunglam an ti vai zova, kawng dik loah min hruai a, beidawng lungawi (complecent) takin min siam a, kan tum kan ṭhelh a ni. 

Entir nan, kan ramah building technology a danglam ta. Hmanah chuan maurapin kan sa a, tichuan Assam type-in kan sa leh a, tunah cement concrete building kan sak a lo ṭul ta. He hna thawk tur hian Mizo hnathawktuten thiamna (skill) an nei lova, tichuan nitin cheng nuai tam tak Karimganj phai vai hovin kan pawisa an hlawh ṭhin a ni. Kan workshop-a mechanics te pawh Manipuri deuh hlir an ni. Skill training ṭha tak, national certification pe thei kan mamawh. Kut hnathawktute pawisa tlemte insem policy hmangin kan hrai rui a, che thei lovin an zeng zo ta ni hi. Ṭhangharh in i tho thuai ang u.

Natural resource nei lem lo, mahse ram hmasawn tak tak entawn tur an a awm ṭeuh mai. High- Skill based ram ṭhenkhat Singapore, Luxemburg, Japan, Finland, Korea etc. Samsung Industry-ah chuan “Resources may be limited, but human creativity is never (Resource an tam lo a ni mai thei, mahse mihring finna leh thiamna hian tawpin tai a nei lo) tih hi an tar a. Zoram ka hre chhuak a, resources kan nei tha lo a ni mai thei, human creativity and skill hi kan develop a ṭul a ni. 

Mizoram leh Mizo mipuite hma­ngaihtu tak tak ram leh hnam leh miretheite leh thingtlang khuaa cheng mipuite tichangkang dawrhtu, kan va mamawh em! Moneycracy thuneihna leh rorelna ni lovin, mipui rorelna leh thuneihna dik tak kengkawh duh tak tak hruaitu kan va mamawh em!