Zan curfew - hlip rawh se

MNF sorkar chak tak chuan Covid19 hripui a do mek a, vanneihthlak takin mipuiin sorkar kan thlawp ṭha bawk a, a do han lam pawh niin a lang. Hemi kawngah hian thil ṭha tam tak sorkar hian a ti tawh ang a, thil ṭha lem lo tih chhunzawm tlak lo pawh an ti nual bawk a ni! 

Chhun lamah mipui duh ang tawkin kan chhuak mup mup thei tawh a, Traffic Jam free a siam kan tum mek Aizawl city chhung kawngpuiah te pawh traffic a jam nasa leh tawh hle mai. Kan hotupa in Traffic jam free Aizawl siam min tiam chungchangah hi chuan Covid19 hri len zual lai kha kan teuh lai ber a ni deuh mai awm e! 

Tin, zan curfew kan la tih ṭalh hi awmzia a awm tawh lo riaua hriatna ka nei. Chhun lamah duh tawkin mi an chhuak vak thei tawh a, zan lamah Covid hi a hlauhawm zual tih lam pawh a ni ber awm si lo a, zan curfew hi hlih mai a hun tawhin a lang. 

Zan curfew ni lo se tleirawl chhuak vak an tam leh dawn tih chu a chiang reng. Zu rui vak vel te leh bike ri ring deuh deuh tlan puat puatho kha an rawn inlar leh vat ang. Mahse hengho hi kan khung bet reng thei dawn chuang lo, zan curfew lah tih reng theih a ni hek lo. 

Kan han sawi lan takte chauh pawh hi zan curfew hlih hun hunah an rawn inlar leh dawn tho tho; harsatna dang pawh a awm belh dawn. Chuvangin, bike ri ring tlan chak leh tleirawl hawklak te hi chu a vengtu tur police kan nei a, khawpui ralmuanga siam hi an hna pawh a ni.  Sunday curfew hlih vang chauh pawh hian PS lamah hna a tam sawt maithei, mahse curfew reng theih a ni tlat lo. 

Tunlai hian khaw-kar kawng laih a tam a, curfew hmaa Aizawl lut hman lo an awm ṭhin ang, let ngawt chi a ni si lo. Chuvangin, zan curfew 8:30pm tih hi chu a hma mah mah - kan hlip hreh a nih pawhin dar 10 ah te sawn hlat a hun. 

Zan curfew hian  eizawnna tam tak a tiṭhuanawp avangin kan inkhuahkhirh chhan ber hri leng a lo ziaawm takah hian zan curfew hi uluk zawka ennawn a hun e.