ZIRTIRTU SEMRUAL

Zirtirtu semrual (Pupil Tea­chers Ratio - PTR) hi sikul naupang tam dan azir zela awmze nei taka zirtir­tu semrual a ni, Right to Edu­cation Act, 2009-in a phut leh tihmakmawh a ni a tih theih awm e. Sikul pakhata zirtirtu tawm khawm awmze nei lova hmun danga sawndarh chiam hi RTE (PTR)-in a tum a ni lo. Chuvangin, mi tam tak phunnawi satliahte hian a awmzia an man pha lo deuh niin a lang. 

RTE Act, 2009-in a tarlan danin Primary Sikul tan 30:1 a ni a, upper primary Sikul tan 35:1 a ni. RMSA Framework angin Secondary sikul tan 30:1 a ni bawk. RTE Act, 2009 ang chiah hian PTR hi kalpui ni tak tak ta se, a bikin sorkar P/S; M/S & H/S zingah hian Headmaster tiamin zirtirtu pahnih (2) chauh nei an tam hle ta ve veng. Mahse, subject hrang hrang thlir chunga zirtirtu dah an nih ṭhin avangin zirtirtu aia zirlai tlem zawkna sikul hriat tur a awm ta nawk mai zawng a ni e. 

RTE Act, 2009 ang taka chhut chuan zirtirtu lak belh ngai miah lovin kan la awm thei niin a lang. Heng bakah hian RTE Act, 2009 kalhin zirtirtu engemawzat chu an­mah­ni hna ni lo, office lamah deployed an ni bawk a, hengte nen phei hi chuan zirtirtu an tam tawh hle niin a lang. Engpawhnise, ministry apiangin zirtirtu semrual hi dik taka kalpui tur angin an insawi chamchi ṭhin. Mahse, Pute: Dr. H. Thansanga; Rokamlova; Liansuama; Zoramthanga; F. Malsawma; Lalsawta leh H. Rohlunate'n School Education an enkawl ṭheuh tawh lai pawh khan zirtirtu semrual hi chu an khawih hlei thei lo niin a ngaih theih. 

Ṭawngkaa an sawi fo pakhatah phei chuan Pu Liansuama hun lai khan zirtirtu semrual chiam a ni a, thla 6 chhungin an post ngaiah an haw khawm leh hman vek nia sawi a awm. Hei hi thu dik a nih ngat phei chuan tunah pawh hian PTR emaw zirtirtu semrual chu a taka kalpui a har viau dawn niin a lang. Ministers leh Sorkar thuneitute ai hian party mipui leh NGO, pressure group te hian thil dik aiin dik lo hreta nawr luih kan ching nia a lan avangin thil dik kal tlangpui ngam lovin thinglubula zawng dan an sawi ang maiin kan dang bet a, an tan thil tih a har ṭhin a ni. A chang phei chuan kohhran secretary letterhead-te pawh hmuh tur a awm nawk ṭhin a nih hmel. Chutih rualin, roreltute zingah pawh hleih nei, mi pamham leh therhlo it avanga thudik kal tlangpui thei lo an awm nual thei bawk. 

Tunah pawh hian zirlai pawl aṭang leh NGO etc aṭangtein zirtirtu semrual kalpui vat turin sorkar an nawr mek tih hriat a ni a, mah se a hlawhtling meuh ang em tih chu 'Pa' chauh lo chuan a hre lo. MLA tinte'n  zirtirtu sawn chhuah tur list an han en ang a, an bial chhung aṭanga zirtirtu sawn chhuah tur an tam viau chuan an rilru a hah viau maithei. A chhan chu inthlan leh thlir rãn a ngai tlat ṭhin. Zirtirtute zingah lah minis­ter leh block level-a hmelhriat nei ṭha tak takte'n an theih dan kawng kawngin (indirect)-in thuneitute an han zar buai ve leh ang a, transfer order chhuah hnuah pawh ni se cancell order chhuahtir tumin an han nek buai leh ngei emaw a ni ang a, vawiina tih a tuka sut leh a awm leh niai nuai dawn a nih hmel hle. 

Hetiang hi kan dinhmun dai phak tawk a la nih avangin zirlaite hmakhua chu a eng tehchiam chuang dawn lo niin a lang. Chu ai chuan kumpuilingletin transfer order buaipui reng rengin kan vir buai tlang ang a, intihpui tur leh tihpuitu tur zawng rengin kan inhambuai dawn niin a suangtuah lawk theih a ni e. Kum 2017 khan Arunachal Pradesh sorkar chuan PTR a kalpui a, zirtirtu pakhat Natio­nal Award hial dawng tur chu a transfer order a chhuak a. A ngaihdan an zawha a chhannaah chuan, "Transfer hi ka sawisel ni lovin ka award dawn ni tur nen a inkawlkalh hi ṭha ka ti lo tih mai chauh a ni" a ti. Hetiang hian mi inpete nun entawn hian ram leh hnam, zirlaite hmakhua ngaihtuah chungin zirtirtute hian sawn an nihna hmun apiangah ihe lovin an hna thawk se. Mipuite leh politician-te pawh hian a ni lo zawng hian ṭan lak pui tawh lo ila tun ai hian zirna hian hma a sawn ngei ang. 

Hetih lai mek hian ram­tuileilo, hrisel ṭha lo leh dinhmun phet tlat tih danglam harsa bikte erawh zirturtute zingah an awm tih kan hriat tlan a ṭha awm e.