VAI BUH EI ṬHEUH ṬHEUH

Tu pa sawi dan takah ar hmai tiat lek pawh, hei hi ka ram tih sawi tur nei lo mah ila, kan ram hi awmhmunah ka lo vei ve em em a, chu chauh a ni lo, kan nudan ṭhenkhat ṭhalaite hlimpui leh ṭawngkam thlengin ka vei ve ṭhin, kan vei vena hian ṭapchhak zawl pawh pel lo mah se, a vei lo te ai chuan a ṭha hrim hrim tihna hi ka la nei tlat zui a, chu vangin hetiang thu te pawh hi ziak ngam chauh ka ni. 

Mizo te hi, mi ram leh hnam te nena khaikhin chuan kan la tam tawk lo pawh a nimai thei; mahse, mihring tlem leh tama inteh chu sirah hnawlin hma kan sawn chak hle a, kan changkanga hmasawnna duhin khawchhak leh khawthlang aṭangin pur kan chaw lut a, a ṭha pawh a tam, a chhia pawh a awm nual niin a lang. 

Changkanna tehna hi a huam chin hre vek lo mah ila, zau tak chu a nih ka ring ṭhin, mi ṭhenkhat eng vaka kan ngaih loh te hi veng leh lamah chuan mi changkang, mi tak bawla bawl chi te an lo ni leh lawi a. Tunlaiah media khawvelah kan insut pel suau suau a, changkanna khawvel kan ti a, media lama hmun lum chang leh like leh followers ngah hi changkang kan tih chuan kan nulate changkanzia kan hre thei awm e, mi ram nula te chu an hnathawhna leh zirna, an eizawnna kawnga an hlawhtlin avangin facebook, Instagram adt. like leh followers an ngah phah ṭhin a, keini Mizo ṭhalaite chu kan hlawhtlinpui lam aiin kan sexy pui avanga like-tu ngah hi kan tam zawk hial ang em? 

Mizo nula pakhat chuan Aus­tralia-ah Chartered Accountant (CA) Mizo zinga hmasa ber turin harsa takin a zova a chhuanawm em em a, Instagram lamah chuan mi zali vel chiah in an follow zu nia mawle. Hei hi sawi chhan kan nei a, kan ngaihsan zawng leh mi chhuanawmte kan umzui dan te hi a huang kan zauh a hun deuh tawh em? Mizo zinga CA hmasa ber RS Roneihpuii hian social media lama tlak tum tumin thu leh hla, thlalak chu a post ngai miah lo nain, a chunga kan sawi ang khian mi chhuanawm te umzui dan leh harsa tak aṭanga hlawhtling an nihn a hi, kawng hrang hrangin kan ngaihsanzia te, mi bik an nihzia te hi kan tarlan thiam angai hle. 

Tualchhung model leh zai­thiamte chiah hnungzui tur kan ni chiah em? A ni chu a lar a lawm chuti zat chuan a thlalak an like a, chuti zat chuam an follow tawh asin tih hi tehfung pakhat a ni tlat tawh si a, kan nun hi a pawn lang ta mah mah em aw? Tin, kan changkan dan hi hnam zepui kan pi leh pute aṭanga kan neih tawh Zonun zemawi kalsana changkang kan ang ṭhin. 

Social media bawk han sawi leh ta ila, tual chhung milar te pawhin an thlalak sawifiah nan emaw, an veizawng an sawi ve chang pawh a, Mizo ṭawng aia sap ṭawng an han hmang ngat ṭhin te hi changkanna nge ni a? Hnam phatsanna, tute pawh hian kan hnam nun zemawi kan chhawm nung thei a, kal chhuak chi an awm laiin kal chhuak ve lo te pawhin kan awmhmun aṭanga ram leh hnam tana ṭangkai taka kan thawh ve theihna chu kan 

ṭawng hlut kawngah te, hnam dangte hmuh ve tur pawha Mizo ṭawng hman te, hman uar zel te, hnam dang ṭawng aia ngaihsan thiam te hi ava hun tawh em. 

Sawi tur hi a tam ṭhin sawikim lah a theih hek lo, tlem lai deuh a, Mizo mipa leh hmeichhiate social media lama kan inhnialna te kha a va ho tak em? Hnam dang pasal an neih avanga mahni awm hmuna lo insawh khawng Mizo mipa tamtak kha chhungte chawmhlawm kan ni leh lawi a, media hmanga kan hmeichhiate hnam phatsantu tia ṭawngkam kha tak taka an khum ṭhin te pawh kan harh a ngai ta. Eng vangin nge keini Mizo mipate aia hman dang mipa kan nulaten an thlan fo tih hi kan ngaihtuah chhuah a hun tawh lawm ni? 

Kan nulate’n hnam dang pasal an neih apiangin phatsantu tih leh inthlan kan lai lovang tih ngawt te hi hnam siamṭhatna atana kawng ṭha ber a ni em? Phatsantu chu an dem awm rualin eng vanga phatsan nge an nih? Mizo mipaten kan chhan a ngai ve ta e. Sum an duh, nawn chen an duh vang i ti em ni kha, mipa zawng zawng chu kan ni vek lova, a hnathawk peih lo apiang leh hlawhtling lo apiang te hi ṭawng pawr kan nih ṭhin avang hian sawi tho a ngai niin ka hria. Nilenga chhungte thawhchhuah sa ring ve mai tan chuan kan nula ten pasal atan min iai a ni ta ve ang! Khaile, Mizo mipate puan ven sawi chhing ang u le, ram leh hnam damna chu a ram neitu mipate rilru put dan hian a hril thui teh asin. 

Kan nulate pawhin zir tur an ngah ve ta, hnamah an chian a ngai a, hnam hmel mawina chu i make-up hman lam a ni lo, i nun dan kha a ni zawk. Hnam dang tlangval laka i khawsak dan kha a va pawimawh em, hnam dangin Mizote min enna darthlalang chu i nun kha a ni asin. Pawisa i nei lova, make-up leh thawmhnaw man to i awt a, chung thilte chu i neih chuan nalh ve mai turah i inngai bawk a, chutiang nei tur chuan hnam dang mipa karah sum i lo zawng palh ang tih ava hlauhawm em. I neih sum leh paiin a tlin loh chuan i tan nalh leh hmelṭhat tih loh a him zawk tih hria la, a nuam ringawt i um duh avanga hnam i phatsat ṭhin vang a lawm, i bula awm ve lo, Mizo tlangval thinrimin i thlan kan lai lovang an tih fo ṭhin. 

Tumah hi han indem bik thei kan awm lova, a thiam lo zawk chal han pensak tur pawh kan awm rih lo, tute pawh hi hnam hmel lanna kan ni thei a, mawhphurhna sang tak nei vek kan ni. Social media lama Mizo leh Mizo, mipa leh hmeichhia kan inbeih chiam ṭhin te hi sim ang u, hetianga kan awm fo avang hian alawm, mi laklawh tuai tharlam kan ngah tak em em ni. 

Kan tlinlohna lai leh kan induhkhawp lohna laiah te chuan kan inhrilh tur a ni a, tunge thu ṭha dawn haw ngai le? Mi sahuat lai zawn sak char char a, kan hmu ta maw tih a, inbeih chiam hi a fuh lo deuh em? Milar an awm ang a, a lar lo pawh kan awm ang, mi changkang an awm bawk ang, a nalh an awm ang a, nalh lo deuh pawh kan awm ang. Retheite avang hian hausate hi an hlu mai chauh a ni tih hre chungin hna kan thawk ve ang, hmel a siamṭhat theih loh; mahse, nunchang erawh kan siam ṭha thei. Mizo kan ni a, tunah rih chuan kan vai deuh thaw mai hian vai buh ei ṭheuh kan ni a, indah sang tur leh hmuh hniam bik lutuk tur hi kan awm rih lo e.