BAIRABI ZOPHAI RAMRI LEH MAU NURSERY

Tunhnaiah Zoram mipui hriat vak lovin Assam lam hian Zophai-ah link road an rawn lai a, sumo te pawh link road-ah hian thui tak an rawn service tir nghe nghe. Hei bakah hian Mizo loneitu chhungkaw 6 aṭanga 10 bawr vel chu an buh leh thlai tharte la ngam lovin Assam lam thuneitute hian an vau bet a. Heng Loneitute ram enkawl belkhawm hi bigha 200 chuang lai a zau a ni awm e, leilet mai bakah sangha dil sah ngam lo te pawh an awm. 

Mizoram sawrkar, Agri­culture department-in nikkum lamah power tiller (leilehna khawl) 4 dahsak in Zophai leilet a laihsak ten hetianga an hnathawh rah seng hleithei lova an awm ta mai hi sawrkar thuneituten ngaihven se a duhawm hle. Bairabi khaw daiah hian Mau nursery pakhat a awm a, he mau nursery hian mak deuhna a nei tlat mai. A khaw mi ṭhenkhat thil hre chiang deuhte chuan kan Chief Minister Pu Zoramthanga ta ni awmin an sawi. Bairabi hmar lam VCP enkawl sak a ni awm e, an la ti ta deuh deuh. 

He Mau nursery-ah hian tu ta nge, eng tihna hmun nge tih te, nursery hming emaw hriat theihna tur signboard emaw thil ziak engmah intar a awm lo. Hlawhfa engemaw zatin mau ṭiak phunna tur an lo buaipui a. Thlam ṭha pangngai tak a awm bawk a, chumi hmuna awm mi pakhat a neitu nia inchhal chu thu tlem kan zawt a. A neitupa a inchhal ber hian a mau/ rua chin chu eng mau nge, kan CM sawi lar tak Raw lian chi, Dendrocalamus brandisii, SEDP hnuai a chin tura sawrkar sawi kha nge,  tih pawh engmah a hre lo, chuti chung chuan a chi ṭiak pakhat Rs 30 zelin, nuai 1 an chah mek thu a sawi lawi a.

Sawrkar aṭangin hetiang buaipui tura contract emaw aggrement pawh an nei lo, a ṭiak supply tura tender chhuah hun a chhang ve mai tur an ni awmin a sawi. Hetianga sum tam tak senga a ṭiak order thei bawk si, a neitu nia inchhal  bangbo ang reng hle bawk si te hian he mau nursery awmna Bairabi mi ṭhenkhat sawi anga Chief Minister Pu Zoramthanga ta, midang a enkawl tir mai mai an tih chu a ti rinawm tulh tulh zawkin a lang. 

January ni 5, 2021 khan Bairabi khaw tawntirhah Lei (Bailey Bridge) thar hmanhmawh takin Chief Minister-in a hawn, tun thlenga lirtheiin an la zawh theih si loh te pawh hi mi ṭhenkhat chuan CM hian Bairabi Mau Nursery tlawh chu a tum tak zawk a ni a, chumi ringawt chu a te tham si a, a phenah programme phuahchawpin a mau nursery tlawh thup nan he lei hman theih a la peih fel loh hi an hawn tir tel ta mai niin an sawi. Hei pawh hi tuna a nih dan en chuan thu belhchian dawl leh awihawm tak niin a lang.

Dan ang tak emaw ziak emaw chuan he mau nur­sery neitu hi kan Chief Minister hi a nih a rinawm lo a, mahse a ta ngei nia an sawi hi a dik hmel hle.