MNF SORKAR vs CONGRESS SORKAR SUM ENKAWL DAN

Tunlaiin Pu Zoram­thanga kaihhraui sorkar leh Pu Lal Thanhawla sorkar chhunga Mizoram mipui sum an enkawl dan khaikhinna belhchian dawl tak tak chhiar tur kan hmu ta fo a, piont khat chauh sawi ve ila.

MNF sorkar chhung zawng, Pu Laldenga CM aṭanga vawiin thlengin Finance minister chu Pu Rama hi a ni a, hun reilotê Pu Lalchamliana MoS-in a puih ve tih loh kha chu, a mal chelh tluan parh a ni. Chief Minister ni chunga finance  a chelh tel tlat avangin MNF sorkar chhunga Mizoramin sum harsatna a tawk a, sawisel a kai a nih pawhin CM leh Finance chelh kawptu chu, mawhphurtua puh a nih pawhin thil awm lo lutuk a ni lo. 

Mizoramin CM kan neih tawhte Pu Ch. Chhunga (L), Pu Ṭhena (L), Pu Laldenga (L) te khan CM leh Finance an chelh kawp ngai lo. Pu Hawla'n thla rei lote CM leh Finance a chelh kawp a, India ram state CM zingah pawh CM leh finance chelh kawp sawi tur an vang hle awm e. Kan CM Pu Rama pawh hian Finance hi chu midang kutah hlan vat se a ṭhat ber ka ring. 

Keima hmuh danah chuan MNF MLA sawmhnih leh pasarih zingah hian Pu Zorama tluka Finance minister atana ṭha leh tling panga an awm. 

Pu Lalthanhawla sorkar kum sawmhnih chuang kha, term hnihin thliar ta ila. A term khat chhung zawng khan Finance a chelh ngai lova term hnihna a rawn chelh veleh khan Pu Rama tih thik ni awm takin Finance chu a kawp ve ta a. Finance a kawp aṭang khan Assembly House-ah Finance minister-in pawisa a hmanna a hriat loh thu a sawi ta fo mai. 

Eg: MNF sorkarin MIP sum nuai sawmriat zet a hnutchhiah chu, Cong­ress party-in Aizawl khawchhung Congress unit hrang hrangah vawk vulh ṭanpui nan tiin a sem ral vek a. Chu pawh chu Assembly House-ah CM leh Finance minister MPCC President ni bawk, Pu Hawla chuan, "Ka hriatpui lo" a ti a nih kha. 

Pu Hawla hian a mualpho lutuk a hlauh tak avang khan, Finance Department chu Pu Liansailova a hlan ta a. Pu Liansailova hnuah Pu Lalsawta'n Finance Dept chu a enkawl chhunzawm ta a ni. Pu Hawla hian Pu Rama angin Chief Minister  a nih chhung zawng khan Finance Dept hi chelh ve ta se, sum enkawl an thiam leh thiam loh thuah hi chuan an ni pahnih hi khaikhin chauh tur ni awm tak a ni. 

Pu Hawla vanneihna em em chu, Finance minister ṭha tak tak Pu J. Lalsangzuala (L), Pu Liansailova leh Pu Lalsawta te a nei hi a ni. Ka hmuh dan leh pawm danah chuan, district council aṭanga vawiin thlenga kan ram hruai tura kan thlan chhuah tawhte zingah, mi sawm eirukna leh hlemhletna laka fihlim ziak chhuak dawn ila, an ni pathum hi chu an tel lo thei lo. 

Pu J. Lalsangzuala (RIP), Finance minister a nih lai khan Lunglei Grater water supply scheme hna kha Shubash company-in an thawk kha a ni a. An pawisa lak tam tawhzia leh, an hnathawh tlemzia kha ram pum ti ti a ni. Pu Hawla khan a chhui chiang turin comission a din a, comission chuan an hnathawh leh an sum lak inmil lo lutuk avang khan cheng khat mah pek tawh loh ni rawh se, tiin sorkar an hriattir a. Mahse Pu Hawla hian Finance minister rawn lo leh hriattir hmasa miah lovin, Finance Dept ah Shubash company te hi cheng nuai zali sawmkua pakhat pe turin a ti a, an pe bawk a. Hemi avanga Pu J. Lalsangzuala (L) rilru na lutuk khan Mizoram rorelna sang ber Assembly House-ah "Pawisa hi a hman lohna turah kan hmang nasa lutuk a, Mizoram nu leh pa anga ngaihtuahna ka neih phei chuan awhhlumna hruihrual awrh ang ka ni" a ti hial a nih kha. 

Chuvangin, ram mipuite hian hun kal tawh aṭanga vawiin thlenga ngun taka thlirin, thu dik leh a nihna dik tak hre turin i zir chiang ṭhin ang u.