Bawngkawn ram hi sawifiah a ngai, PIL thehluhna tham

Hman deuha sawi hlawh tak Bawngkawn kawng peng ṭhuam lun lai tak mimal kuta a luh dan leh politics-a thil inpuh tawn dan kal kual vel leh tuna a lo zauh tak danah hian mipuiin tun thlengin thu dik kan la hriat loh avangin sawi fiah mai ni lovin chhui fiah a ngai. Dan hremite tan PIL thehluhna tham a tling. 

Facebook lamah docu­ment awm ang ang ka han hai let a, chutah chuan hetiang hi kan hmu a ni - "Vanglaini 25.09.2017 : Congress Ṭhalai chuan thuchhuah siamin, MNF president Zoramthanga chuan Bawngkawn ram mimal hnena hralh a nih chungchang sawifiah ngam loah an puh. 

Congress Ṭhalai tarlan danin, MNF Party-in Septem­ber 14, 2017-a total bandh an buatsaih ṭumin, Mizo Hnam Rûna thuthar thehdarhtute a kawmnaah MNF President hian “Bawngkawn ram chung­chang chu kâr leh lamah document nen thlap press conference ka ko ang” ti zawngin a sawi. 

September 18 - 23 chhûng MNF president chuan press conference a nei lo tluan ṭhak tih sawiin Congress Ṭhalai chuan, "MNF president hian kâr leh emaw 'remchâng hmasa' tia a sawi tel kha a chhuanlam dawn em ni? 'Rem­chang hmasa' chu eng hun nge tih kan zàwt nghal," an ti. 

Congress Ṭhalai chuan, danin a phal loh leh terms & conditions pawh Revenue Director leh MNF aiawhin an ziah fel tawh hnua MNF Party hruaitu ṭhenkhatin mipui chhawr tur kawngpui zauhna tur an lo hralh chu pawi an tih thu tarlangin, mipui ram hi a nihna dik taka hman a nih ngei theih nan an hralhna pe lèta sorkar hnena he ram hi hlàn leh turin MNF hruaitute an phût," tih a lo lang a, hei hi chu political party thukhawchang a ni a, a dikna leh dik lohna hriat theih a ni lo. 

September, 2017-ah khan Vanglaini chanchinbuah 'Lalchhuana Renthlei' tiin 'Sawi ninawn loh Bawngkawn ram' tiin article sei tak a ziak. He a thuziakah hian point hrang hrang a pe a, a hre chiang hle niin a thuziakah hian pawisa zat, mimal hming, political party hming a ziak lang vek a. A thuziak aṭanga a lan dan chuan Bawngkawn ram lei, hralh, hralh chhawn leh a kal velah hian thil dik lo lian tak awm a ang hle. Hei hi MNF President chuan a document nen a sawifiah tur thu Press mite hmaah a sawi a, tun thlengin a la sawifiah lo niin a lang. 

1. Bawngkawn ram MNF sorkarin a lei, a hralh danah dik lo a awm a nih chuan, eng vangin nge Congress khan an sorkar lai khan court-ah an kal mai loh? 

2. MNF President-in press mite hmaah a document nen a sawi fiah tur thu a sawi tawh a, a la sawi fiah leh si lo. Eng vangin nge Pree mite hi an ngawih mai mai? An beng hriatah, "Kan sawifiah ang," tia sawifiah leh si loh hi Press mite tan ngawih mai maina chi em ni dawn? 

3. Congress khan an sorkar lai khan he ram hi an nei let leh thei ta thova, tu hnen aṭangin nge an lei? engtin nge an lei? khawia pawisa nge an hman? engtin nge an tih kual vel? tih hi mipuiah puanzar a ngai ve tho a ni - Congress pawh hian ngawih chuh lo se.

4. Social media thu kal kual vela tute emaw in hlawkna an tel, ram hralhna an tel tihte hi a dik em? Mimalin eng vangin nge hlawkna an tel? Sawi fiah thei chuan sawi fiah a ngai. 

5. Mizoram dan hre mite hian he thil hi public interest dik tak thil a ni tih hi an hai ka ring lo. Mi pawisawi an hlau a nih chuan an dan hriatna hi an pawisa hmuhna atan chiah hman an tum, tiin kan puh mai loh nan he thil hi ngaihtuahin PIL thehluh a ṭha lo maw?