FREE Wifi POLITICS

Zirlai zawng zawngin internet an mamawh tawh a, mi pakhat top up man chu,  thla thum pawh daih lovah Rs.500/- sen a ngai a, chhungkuaa kan insen ral hi a tam lutuk, Free wifi kan pe ang che u min ti. He free wifi politics hi a thluk chu a mawi raih raih khawp mai, mahse hla thlan hlawh lo tak tur chi a ni. 

Cheng nuai 95 senga free wifi kan pek chhuah kha, inter­net mamawhtu mi engzatin nge chhawr ta? Free wifi kha eizawn nana hmang ṭangkai mi pakhat tal an awm em? Enjoyment atan a lo luang ral mai mai zawk lo maw? 

Free a dawn theih hrim hrim hi ram changkang tehna a ni em? America-a Zofa pem thlate khu, an khawsak a nuam hlawm tawh khawp mai a, mahse free a thil an dawn vang a ni hauh lo. 

Phone bill leh electric bill tamzia ringawt an sawi zawk, citizenship la nei pha lo khuan, green card an dawng a, chungho chuan free-a an dawn chu medical lamah a ni mai. Citizenship an neih tawh phei chuan, sorkara tax pek tur an ngah viau zawk.

Rajiv Gandhi Prime Minister a nih lai khan, Tripura-ah khuan Nipen Charaborti Communist party an chak khawp mai a. Rajiv Gandhi kha inthlan lo awm leh tura rawn campaign-in, Rs. 5000/- sem a rawn tiam a, mi retheiho kha Congress-ah an inpe ta sup sup mai a, an tlin phah reng bawk a ni. 

Khatih laia Rs. 5000/- kha chu tam ve tak a ni. Tlangmi ho khan free-a pawisa an dawng kha hman dan pawh an thiam lo, Hotel-ah te chaw an ei sek mai a, in khatah Radio pahnih te an nei hlawm vel mawle! Free-a thil dawn hrim hrim hian mi nun a tichhe zawk a ni ang, ram changkang kan tihte hian free an uar ve miah lo. Thawh rah hlawk lam an uar zawk. Hlawk taka thawh tur hna an siam thiam a, sorkar lamah tax ṭha takin an pek tir thung. Mi hausa tax tling khawm hmang khan, mi retheite an chhawm­dawl hlauh a, an system a fuh bik em a ni. 

A thlawna thil sem hi ṭul lova sum luan ralna mai zawk a ni. A thlawna sem thiam ai chuan, hna thawh tur siam thiam a ṭangkai zawk. Mipuiin kan hlawkpui tur lam hi ngaihtuah zawk ila, chu chu hmasawnna rahbi pawimawh a ni zawk. 

Covid hri leng avangin, zirna school lam chuan online class an kalpui a, Free wifi a innghat chu mi tlemte chauh an ni ang. Free lova mipuiin kan kalpui ve theih hi chu, free-a pek hram va tum lo ang u. Free wifi politics hi, bawlhhlawh phur motor-a phurh bo tir daih chi a ni zawk lo maw? AMC-ah tu pawh rawn sawrkar se, Free Wifi atan hi chuan sum rawn hman belh tawh lo hram se, a aia ṭangkai tih tur a tam em mai.