Jammu & Kashmir chungchangah Tinge in ngawih reng?

Modi-a leh a ṭhiante'n ruahmanna felfai taka keimahni ang deuha Constitu­tion-a chanvo hran nei, Jammu and Kashmir tana dik lo taka an chet a: an chet dan pawh nikum June aṭanga lo inṭan daih tawh, seat 89 awmna assembly-a pawl pahnih, BJP MLA 25 leh PDP MLA 28 thawk dunin an siam sawrkar chu MLA 25 nei BJP-in a thawhpui duh tak loh avanga nikum June 20-a Jammu and Kashmir chu Governor's Rule-a a lo awm a, Governor's Rule chu thla ruk thleng hman theih ni mah se, December 20-a thla ruk dang awh tura President's Rule-a an pawh sei a, thla hmasa July ni thuma President's Rule chu an pawh sei leh a, President's Rule-a an awm mek laia Pathianni zana house arrest-a an ram (ram ti mai ang) hruaitute an man a; mi pali aia tam punkhawm khapna thupek an chhuah a, a tuk Thawhṭanni-a Jammu and Kashmir-in kan danpuia chanvo hlu tak, temporary-a an neih, President's Rule lai chuan President-in a duh duha a tihtawp theih chu, an ruahman lawk ni ngeiin a rin theih. President's Rule an pawh sei avanga President's Rule-a an awm lai taka an chanvo an han chhuhsak hmiah a. 

Anni anga chanvo hran nei, a bikin keini leh Nagaland dinhmun derthawnzia a tak ngeia hriat tur a awm mek lai a; kan Mizoram sawrkarin eng thu mah a sawi ve lo hi, a mak ka ti a ni. India ram pumah breaking news tiin news channel tin­reng­ah an sawi a. Internet-ah duhthusama tamin an sawi a, state hruaitute ram pum huapa hruaitute ngaihdan an sawi chhawng a, an zawt kual a. Kan MNF sawrkar erawh a ngawi tlat thung. Twitter te hi tunlaiah chuan Pu Donald Trump-a vang hian thil thleng pawimawh leh hmalakna mipuia puanzarna hmanruaah an hmang ṭhin a. Chutiang chuan kan Pu Zorama pawh hian Twitter chu a hmang ṭhin a. Thihna thu te, mi pawimawhte nena meeting an neih thu te leh a thil ngaih pawimawh ve hrim hrim te a post ṭhin. Tun ṭuma Jammu & Kashmir chungchangah erawh a thusawi engmah hriat tur a awm lo a ni. 

Kan chanchinbu lian ber Vanglaini-ah te chuan China-a kea kalte chawimawina lam Pu Robert Romawia'n a buaipui chungchang bak a la inziak lo. Ani hi, inla central fu si, breaking news siam nuam ti viau si, hetiang state buaina leh constitution lamah hian a ngawi kur mai a. Vai news ti maia kan hriat North East Live te'n zawh an tum pawh a, an hlawhtling thei lo tlatte hi chu a zia lo deuh a ni. A enga pawh chu ni se, nationalist inti tan chuan puah ṭhak hun a ni. MNF aṭangin Press Release erawh hmuh tur a awm si lo. Hetianga kan sawrkar a kal zel chuan kan ram hi kan la chân thei tak tak dawnin a lang. Hmana independent sual fighting spirit kha a bo tawh nge, sum spirit lam a thawk chak tawh zawk nge. Eng nge ni chiah ang? Sawi teh u, tinge in ngawih reng? 

PRISM lam chuan an dem thu an au chhuahpui tawh a, Congress pawhin "Jammu & Kashmir ang mai a chin phar kan nih loh nan leh, chutiang thil tih tumna a awm loh nan Mizoram Pradesh Congress Committee (MPCC) chuan theihtawp a chhuah dawn a. Chutiang tur chuan Kohhran mai bakah political party hrang hrangte leh NGO-te, Mizoram mipui zawng zawngte thawhpuiah kan sawm" an ti hial asin. 

Rulling party hi engah nge in ngawih reng? Mizo mipuite hian kan thlavang hauhtu kan mamawh asin. BJP nen hian in lo thawk dun tak tak zawk em ni? Central sawrkar an nih vanga pawisa hmuh loh hlauh vangin ui mei khup ang maiin in dawih zawk em ni! Tun hi huai hun a ni asin. Tun hi ram tan huaisen taka ṭawng hun a ni bawk. Kan party hrang hrang hruaitute chu an ṭawng chhuak tawh e. Tinge MNF hruaitute hi in ngawih reng bik? Kan thla a va muang lo ve!