Ram hruaitute ṭawngkam a nuihzatthlak em?

Tun hnaiah Minister hlui pakhat, tuna MLA ni lai mêkin Chief Minister Pu Zoramthanga thusawi chu lalèk deuhin fiamthu thawh nan mi tam takin an hman thu leh an nuihzat thu an party pisa-ah a sawi a. Chu chu MNF sorkara Minister pakhat chuan an party mipui kalkhawm hmaah a rawn chhâng a. Ram hruai tum dana vision mumal pawh nei peih lote’n Chief Minister Pu Zoramthanga thusawi te fiamthu thawhnan hmang tawh lo tura thurawn an pek thu a sawi chuan tunlai titi a siam tam hle mai. 

Ram hruaitu ni tur leh ram hruai hna keng tur hian thil pawimawh ber pakhat nia lang chu thusawi thiamna (oratory skill) hi a ni awm e. Thiam vak loa thusawi te pawhin an tum chiang taka an tih lan thiam tal a ngai a. Tuichilh bík an neih a zirin an sûkthlék ah mipuiin ram an hruai tum dan kan lo man thiam mai ṭhin. A sawi tlawr thiam leh a pau nasa na zawngah mipuiin ngaihdan kan la hran lo niin a lang a, an thil tihah kan en zâwk ṭhin. Pu Ch. Chhunga kha pa zaidam leh pa biak nuam tak, mi pawi sawi lem lo pa invawng fel tak a ni a. A thusawiah han nuihzatna lai tur emaw, ti mah mah leh sawi rum mah mah tia han hriatrengna tur a tam vak lo, mi chak leh tharum thawh ngai ná mi erawh a ni lo tih pawh a hriat a, zahawm takin a hun a hmang zoah a ngaih theih. 

Brig. T. Sailo kha sipai bang a nih vang nge, thu pe aw kha a pâwl deuh ṭhak ṭhin. Thu thluaithlum lem lo, a nihna ang anga sawi mai, thu tam tak sawia tlak duah lem lo, ram hmasawnna tura hmathlir a neihte tarlang mai ṭhin a nihna kha amahah a langsar a. Mizoram hmasawnna tura ngaihtuahna sêng mi a nihna pawh kan hriatzui zel dan tur a nih hmel. CM ni rei ber, Pu Lal Thanhawla pawh pa ṭawnghmang thiam taka sawi tur a ni lem lo. Chutih rual chuan, huaisen taka thusawi ṭhin a nihna kha a fakawm a. Ram hruaitu ṭhenkhatin tih ena an en chiah loh, a ruka an vei leh sawi sep sep, NGO leh Kohhran pawl lian ber pawh ná takin a hunah chuan a khak fawk mai a. Sorkar hnathawkte pawh a dím lem lo.

Tin, Pu Lal Thanhawla thusawiah hian dimdawina leh pehhêlna lam pawh a tam vak lo, tunlai ṭawng takin a ‘frank’ viau zel a. A cabinet minister zingah pawh zin dawna department pawisa ṭham chîng an awm nia a hriat thu pawh a sawi chhuak mai a. Mizo mipui nâwlpui a duhkhawp lohna pawh a sawi chamchî a, NLUP a hlawhchham chuan Isua a mualpho ang tih te, compensation hnam kan ni tih te, insawipui hnam kan ni tih te a sawi ṭhin. Chutih rualin pa hnuk no ve tak erawh a ni thung. 

ZPM hruaitu Pu Lalduhoma hi pa ṭawnghmang thiam leh heti lama mi bík nih tling a ni a. A thusawi a ngaihnawm a, a thusawi nemnghet leh ti awihawm turin a ‘technical’ deuh hlek te, a ni leh thla, a kum leh darkar te nenlama tarlang ṭhin a ni a. Chutih rual chuan finfiah hleihtheih loh mi tuin emaw a sawi, phuahbelh deuhreuh va nuihzatthlak thei ang bera sawi chhâwn a chîng hian a dah sân phah lem lo. Oct. 20, 2010 AMC inthlan dawn Congress leh ZNP ṭangdunin campaign kick off, Vanapa Hall-a an neih ṭuma a thusawi phei chu a lulaí deuh mange tih tur a tam mai. Kha khan amah a vaw let nge, tun hi a thleng a! 

Tuna Mizoram Chief Minister, Pu Zoramthanga pawh hi thusawi thiam tia hriat lar a ni a. A thusawi a ngaihnawm a, Bible thu a hre hle tih pawh a thusawi aṭangin a man thiam theih. Chutih rualin thu uar mah maha puhna a lian a. Tun dinhmun aia nakin hun lo la thleng tur a sawi tamna leh, thil lo la thleng thei, la thleng si lo a sawi uarna hian mi tam tak a hneh tâwk lo deuh niin a lang bawk. Hetih rual hian mi taima leh thil chhût peih, ataka thil ti mi a nihna kan hre chho tulh tulh dawn niin a lang a. A tuichilh em em Mizoram economy siamṭhatna tura rua leh mau hman ṭangkai a sawi pawh, a sawi hnu Congress sorkarah NLUP, NEDP hmangin ram ei leh bar siamṭhatna tura rua leh mau hman ṭangkai tumnaah nasa taka kalpui a ni a, mahse, Pu Zoramthanga angin an tuichilh chiah lo. 

Tin, Pu Zoramthanga thusawi fiamthu thawhna angrenga an hman tam tak hi chu phuahbelh liau liau, a sawi ni mai awma ngaihtheih, a sawi ni si lo te a ni. ‘Mau châng nei lo kum khata vawi hnih tuai thei,’ han tihte hi vawi khatmah a la sawi loh, mahse pawl lehlamin uar tak leh Assembly House meuhah pawh zawhna an zawh duh hialna khawpa dah ‘zero’ an tumna niin a lang a. ZNP president Pu Lalduhoma’n ‘thingpui sihna khawl kal thei,’ a tih leh, ‘Sapthei sâwrna khawk kal thei,’ a sawi te pawh, Pu Zoramthanga kâ aṭangin vawi khatmah hriat tur a la awm lo a, an party thuchhuah ah pawh hmuh tur a la awm ngai lo. 

Thusawi mi te chuan an thusawi ti fiah turin entirna leh tehkhinthu tam tak an hmang ṭhin a. Lal Isua Krista meuh pawh tehkhinthu hmanga thusawi ṭhin a ni a. Pu Zoramthanga hian a thusawi tehkhin nana a hman te hi nuih ti za fe fe, fiah si, a ngaithlatu mipui mutchhuak te chawhharhna tur tam tak a awm a, amah pa hlim thei tak, hmel hlim sarha thusawi ṭhin a lo ni bawk nen, a nuihzatthlak zâwnga lo kuaiher duh te’n chu chu an lo melh ru ve reng a ni ber a. Chu chu politics-a kan inbeih vel dan a la ni mai awm e.

Pu Zoramthanga thusawi te fiamthu thawhnan mi tute’n emaw hman an lo tum palh a nih pawhin, chu chu ram mipui tam ber te pawm dan a ni chiah lo ang. A chhan chu thla 7 kal ta, 2018 MLA inthlanpuiah a party chu MLA bial 40 ah MLA 27 (67.5%) a tlinpui thei a. Amâ bial Aizawl East-I ah candidate 6-in vote tla 19,551 an insem a, chuta vote 8358 (42.7%) chu a hmu thei bawk a. Mipui kutthlak danah ram mipui rilru chu a chiang ber fo a. 

Chuvangin, tun hnaia Congress sorkara Minister hlui leh, a ni mêk te’n CM Pu Zoramthanga thusawi fiamthu thawhnana hman leh hman loh chungchang an sawi hi chu an awmna pâwl a inan loh vangah ngai mai ila, a hahdamthak mai awm e a...