ZUANG LAWR

Awle, chutia political party hi Kohhran ang thawthanga i en a, pawl sawn miah loh i tum a, vote na pawh sawn miah loh i tum a, party sawn ṭhinte i ngaihnep a, zuanglawr tia hmuhsit ṭhin i nih chuan mite hian eng vangin nge an kohhran an sawn loh tih 'bapui thuk phum' hi i la man lo a ni zawk lo maw, ka ti. 

Kohhranho lu ber chu Isua a ni a, ani chu thianghlim famkim sawisel bo, demna tur awm lo a ni a. Kohhrana pastor te, upa te, ṭhalai hruaitute chu kan mihringpuite an nih avangin humsual dai te, lawilo deuh te, dem kai te pawh an awm thei. 

Amaherawhchu,  Krista, kan lu ber chu dem kai a nih ve loh miau avangin amah chu kan thlir tlat a, chak lo chung chungin kan entawn ve hram hram a, chuvang chuan Kohhranah kan nghet a, kan che ngai lo zawk a ni. 

Khai le, political party te hi Kohhran anga nghehna tur anga i ngai a nih chuan hei hi han chhang teh, tu nge in lu ber le? In lu ber kha Kohhran lu ber anga dem kai lo a ni ve em tih inzawt la, nangmah leh nangmah i inchhang thei ang. Party ṭhenkhat chu kristiante tan a awma awm chhin miah lohna tur te pawh a ni hial lo maw? 

In lu ber chu Zoram chhunga mi a nih a  Mizoram hruaitu lu ber dinhmun te pawh luah tawh hial a nih phei chuan finfiah mai a awl khawp a. Fellohna kawng khat chauh a nei a nih pawhin darthlalang khi ang deuhvin, a khi laite te hlein, a khi lo lai zau zawk fe mahse thlak a hun a ni mai lo maw? Ram i hmangaih tak tak a, in pu ze ṭha lo lai chu 'change' i duh a, in pu ber chu i change thei si lo a nih chuan i rilru change la, i pu ber change a hun a ni mai lo maw? 

In pu ber chu Zoram chhunga mi ni lova Delhi tlang lama mi daih a nih a, ring lo mi a nih ngat phei chuan, eng ti kawng mahin nang tehlul hian in pute chu i change dawn lo va, chu pawlah chuan keini Kristiante phei chu ngheh chu sawi loh, a tela tel eih chi pawh a ni dawn em ni? 

A nih engtin nge kan ngaihsan USA te hian an tih bik a, hman lai aṭanga party-ah nghet taka mi an awm a, an party mi leh sa ngar ngar an vote theih bik, i ti a ni thei e. Zawhna awm tak a ni. An ni-ah hi chuan mi pakhat tan term hnih (kum 8) bak hotu lu ber President a nih theih loh a, Mizoram Presbyterian Kohhranin Moderator kan thlak kum tin ang hian an President te an thlak reng a. Chuvang chuan party-ah tui thar a luang lut reng tho va, ngheh a pawi ve lo. Pakhat lo ṭha lo deuh pawh ni se, mi thar dangah beisei tur an nei zel alawm. Keiniah chuan chutiang a ni lo va, mi famkim lo an ni tih kan hriat tawh te kha kan tuai hnum thar a, mahni inbum chawpin anmahniah beiseina kan inpe thar a. One ton rawng hnawih thar ang chauh kan ni, lang thar ve fu ṭhin mahse a milage a tam ru tawh tlat! 

Kan system hi chutiang chu a nih avangin hotu tam takin an hmang sual nasa a, an peih chen chen party hruaitu lawkah an ṭhu a, an peih bakah an duhsak zawngte an hlan chhawng ṭhin. Hei hi communist ram Cuba sawrkar kalphung a ni. 

Chuvang chuan mipui kan harh chhuah a, hruaitu ṭha lo kan bantir theih si loh te kalsan nachang kan hriat thuai a ngai - chu chu people's power an tih chu a ni. Khawvelin a mi ngaihsan chu Nelson Madela a ni. A chhan chu hah taka a thawh chhuah President chanvo chu term hnihna bak thawk duh lovin mi dang a kian a, a bansan ngam vang a ni. Kan ram hruaitu lute hian ram pui pui an hmangaih pha lo a nih pawhin an party tal hi hmangaihin mi dang kian ngam ve ṭhin se chuan kan ram hian hma kan sawn ang a, ngaihsan kan hlawh ang maw le. 

Chutiang mi party President kan hmuh hma chuan zuang lawr ngam te, mahni party kalsana mi ṭha zawk party danga mi vote ngam te hi mi huaisen, fak phu an ni zawk hrih tlat. Chuvangin, tun dinhmun teah hi chuan beiseina thar neiin sawisel la kai lo party-ah pawl sawn la, pawl sawn em i hreh a nih pawhin zawlbuka la e tang ve lo party vote la, Zoram hmasawn nan mahni awm hmunah ke i pen ve a ni mai.