HUN HARSAAH!

‘Tuipui dam dapin lawng khalh thiam tak a chherchhuak ngai lova; tuipui dam dapah lawng khalh thiam tak a hriat theih hek loh’ an lo ti mathlawn lo a. Chutiang bawkin hun harsa leh khirhkhan, hun hrehawm a lo thlen phawt loh a, mihringin buai mang­anna leh tawrhna a hmachhawn phawt loh chuan mi pau­khauh leh chak a hriat theih loh a. Hun harsa leh khirhkhan hian mi chak dik a hailang lang ṭhin. 

Dinhmun ṭhat lai chuan hmangaihtu leh ngaihsaktu kan ngah ṭhin. Ram a ralmuan lai leh a nawm lai chuan ram hmangaihtu an tam bawk. Kohhran leh pawl pawh nise a nuam chinah chuan hmangaihtu an kat nuk ṭhin. Hun harsa leh khirhkhan kan han tawh a, ram a lo buai a, kohhran leh pawl a lo pachhiat deuh a, a lo chak leh deuh chiah hian min hmangaihtu leh min ngainatu an lo tlahniam a, tute emaw hnungchhawn leh hnawl, phatsan leh kalsanin kan lo awm a, hmangaihtu an kiam leh duai ṭhin.

Hun harsa leh khirh­khan a lo thlen a, hrehawmna leh buaina, manganna a lo thlen a, chak lohna leh pachhiatna a lo thlen chang pawha ram tana ke pen ṭang ṭang te, ram tana theihtawp chhuaha hmalam pan zel mite hi a nuam leh hrehawmah pawh thinlung taka ram hmangaihtute an ni. Hun harsa leh khirh a lo thlen chiah hian hmangaihtu dik an lo lang ṭhin. 

I dinhmun ṭhatlai, i sakruang mawi lai, i la chak ṭhat viau lai chauha hmangaiha duh tur che nia min hriat chuan i kawppui tur atan min thlang suh la. Hun harsa leh khirhkhan, i nuna hun hrehawm ber leh duhawm loh ber i tawn a, i hma­chhawn hun a lo thlen a, mi tam takin an phatsan che a, an hnungchhawn che a, an hlat che a, i lak aṭanga hla takah an kal bo a, i hmuh theih loh tur a an bihruksan hunah che pawh i kianga awm reng thei tur nia min hriat loh a, ril nghet pu mi ni lo nia min hriat a, rilru dik tak nei mi nia min hriat loh chuan i hmangaihna dawng tur atan min thlang suh la, min hnawl zawk ang che! 

Ram a ral muan loh a, hnam dang nekchepna a tawh hun a lo thlen pawha ram hmangaihna avanga engkim tawrh huam ram hruaitu he ram hian a mamawh. Mipuite pawhin kan ram hruaitute leh ram tana hna thawk ṭha, hmanaihtu dikte ngaihsan i zir ang aw. 

Hun harsa leh khirh i tawh hunah chauh i laka ka rilru put dan dik tak chu i hre chauh ang. Tunah chuan i la hre lo ang - hriat tum viau mah la. Mihring rilru put hmang dik tak hriatna awlsam ber chu hun harsa leh thim hi a ni si a.