SIKUL TAN HUN BAWK HI...

Tunah chuan zirna kum tawp kan thleng leh ta ṭep a, nakin lawkah zirna kum bul kan ṭan leh mai dawn a, kum bul ṭan hunah hian sikul ṭan hun hi engtak ang maw tih hi mi tam tak thlir a ni leh ta. Tunah chuan hla ala sik ang reng viau a, ni pawh ala rei lo a, chuvangin zing dar 8:30-ah ṭan a la ni a, heti chung pawh hian chhungkaw tam tak chu kan buai viau mai. 

Kan sorkar pawh a thar a ni bawk a, sikul ṭan hun turah hian a thara kal hi a theih ang em tih chu mi thil chik mite thlir dan a ni awm e.

Sorkar hmasa khan Zoram hmun hrang hrangah zirna lama thawkte leh nu leh pate khawmin ngaihdan kha a la vak mai kha a ni a. Mahse mi tam zawk ngaih dan leh duh dan chu kalpui chuang lovin, sikul ṭan hma chu a kalpui ta tho ni khan a lang a. Zirlai nu leh pa tam ber, hetia rawn zinga tel ngeite ngaih dan pawh a ni lo viau mai. Mahse kan sorkar khan Aizawl chauh hi Mizoram emaw ti ni awm hrimin, traffic jam tih ziaawm nan ti ni awm takin, sikul ṭan hma chu a kalpui ta kha a ni ber a. Tunah chuan hei kan hmang rei ta fut a, mahse kan Aizawl khawpui traffic jam pawh a ngai reng chu a ni thova. Kei ni, thingtlanga chengte phei chu han jam tur awm ve lo kan ni chungin kan phi li buai ta em em reng zawng a nih hi! 

Zing kan han thova, thawh hlim aṭangin kan buai nghal char char a, naupang sikul tlai hlau reng rengin kan buaipui a, mahni hnathawhna lam tur pawh ngaihtuah hman lek lovin buai a ngai a. Naupang ei hmasak tir a ngai a, buai tuk leh thawh tlai tuk deuh phei chuan kan naupangte chaw kaw puar a ei hman lo lekin sikul kal turin kan nawr liam a. Kamram eng eng emaw kan pai tir ringawt zel a. Hei hian an hriselna lam a nghawng leh bawk si nen. Pum na, ha na tih ang reng an neih phah fo mai zawng a nih hi! 

Khawpui lam pawhin an naupangte chaw ei mang lova kal tir an ngah viau ni a hriat a niin, pum ṭha lo tih ang reng vei an tam phah thu hi sawi a awm fo mai. 

Sikul an han bang a, ṭan hma na na na chu an lo bang hma ngei a, in lamah han kilkawitu tur puitling an lo awm mumal lo leh ta nghal a, tichuan naupang te te te chu an mahniin an sapial tlat ta mai mai fo zawng a nih hi! Thingtlangah ngat hi chuan tih tur dang vak a awm si lova, an tei rawlai vel mai mai a, nu leh pa tan chuan a luhai thlak duh phian zawng a nih hi! Hetianga kan kal zel chuan chhuan khat vel an vei meuh chuan ṭhalai hnawksak leh lak tlak loh tak tak kan nei fur mai ang tih a hlauhawm hle mai. 

Tun kan sorkar khan inthlan dawn khan an inzawrhna pakhatah khan sikul ṭan hun tih tlai kha an sawi ṭhin a, hei tunah sorkarna hneh takin an siam ta si a, he an intiamna hi tihlawhtling turah lo ngai phawt mai ila. Sikul Sessiopn tharah chuan sikul tan hun pangngai deuh, zing dar 9:00 emaw 8:30 emaw-ah chuan ṭan a nih ngei i lo beisei phawt mai teh ang u. Hetih rualin kan zirtirtute pawh hian kan naupangte hnenah hian ngaihsan tur leh ngaihhlut tur dik fah ngun lehzual sela a ṭha hle awm e. 

Kan naupangtena nih an duh turah hian Central Service lam hi sawi uar hle sela a ṭha hle awm  e. Kan zirtirtu tam tak hi chu kohhran upa an ni fur a, sikul lamah lah hetiang lam infuihna pe vak lovin, aw nem dam leh sakhaw mi a lan hi kan tum lutuk em aw pawh a tih theih awm e. Kohhran upa na na na chu zan lamah te inkhawm an lo regu si a, chanchinthar lam an ngaithla hman mang si lova, tihrualin chanchinbu lam current news han bih peih lah an vang fut lehnghal si nen, naupangte tana han hrilh tur thil thar lam an nei vak si ṭhin lo nen, kan naupangte hi an hriatna tipung a, puitlinga chher chhuak tur chuan naupang-te an nih lai aṭanga tunlai taka siam chhoh reng tur a ni si a. 

Chuvangin, he lamah pawh hian tan lak kan ngai fut awm e. Enga pawh chu ni se sikul ṭan tlai turin Academic Session tharah chuan beiseina sang tak nen kan sorkar thar hi i lo thlir phawt teh ang u.