KAN NIHNA DIK TAK

Engmah sawi nachang hre lo lehkhathiam kan tam a, sawi nachang hre em em ropui lem lo kan ngah ta! Ka ngaihtuah a inang lo, ngaihdan pawh a inang lo. Ṭha kan tih anga sorkar a kal loh hian a ṭhenin an sawi chhuak mai a, ṭhenkhat erawh chuan an en liam mai a. Thil thleng ṭhenkhat erawh chu social media lamah kan umzui chiam a, thil serious tak pawh fianthuah te kan chan zo va! Eng kan ti ta nge ni? i han ngaihtuah ho dawn teh ang. 

Kum hnaivai te mai han en pawhin, Takam-ho vangin thisen chhuah hial ngamin kan thinrim a, a hnuah a ngaiah bawk thinrim dan zia takin kan thinrim a, tunah chuan a ngaiah bawk khan kan ngawi ta a! Eng kan ti nge? Kan thinrimnate kha chinfelin a awm ta em ni? Ni lo, kan peih tawh lo a ni ang! Buaina chinfel ai chuan, a thawm len leh len lohah kan buai zawk ni tain a lang. 

Ramri chungchang te hi chinfel lohin nakkumah tuna kan buaina ang hi irh chhuak leh ta se, kan ngawi leh tawh mai ang em? Ramri chinfel hmaa haw tum lo kha haw lo ta reng se eng nge kan an ang? Kan zia deuh ang em? Mimal sawi kan tum lo, mimal dem kan tum hek lo. Entirna rem rem chu, kan hnam tana a ṭhat zawk beiseiin, chhuidawn theihin kan mizia leh tih ve dan ṭhin lanna atan kan hmang mai dawn a ni. Heng mite hi awm lo phei se chu entirna tura awm takngial pawh kan awm dawn lo tihna a nia. Chhe tak tur lehzual a ni, kan nun dan tereuh hi! 

Kan mizia : Tunlai khawvel awm dan dik tak sawi a har ang chiah hian, kan mizia hi sawi leh i dan pawh hi hriatthiam har a ni ta! Thil hi kan hre chak em em a, hre chak leh hre thei nih pawh kan châk a, kan suan kual zung zung a, hre chak leh hre rang nih châk em em si khan, hre chiangtu nih erawh kan tih turah kan ruat lo nge, ṭul kan ti lo? Han inzawt chiangin thupui tak takah sawi ta ila, "A chanve pawh kan hre zo lo" ti ang mai kha kan ni leh ang lawi si!

Mahni hma leh ṭhianho thil chu ni se kan pawngpawrha kan huai em em dawn lai hian, ram hnuk khawih thil tak tak hi chu kan vei phakah kan ngai lo nge ni, a lo berah status-a ni khat vei hi kan duhtawk ta ni maiin a lang hial mai. Mipui zalenna ramah hian kan zalen em em a, kan zalen lutukna chuan mi mangloah min siam ta lek lek mai! Duh duh kan sawi theihna hian sawi tur chin min thliartir lo a, duh duha kan awm theihna hian awm dan chintawk min ti hre ta lo a nih mai awm hi maw... 

Ngaihtuah peih leh sawi peihte rilru a na! Eng nge a chhan? Thil ṭha eng ang pawh sawi se, "A ṭha hle mai" tihah kan tawp san a. ‘Annin ei tur la khawm se, keinin lo ei ila’ ti nimai awm hian, thil ṭha tak tak sawia latute kan en dan chu a ni ta lek mai. Ṭanrual dan pawh hi kan hre ta lo! Thawhho dan pawh kan hre hek lo! Mi langsar nih kan duh luatah, lansarh mawi dan pawh kan ngaihtuah hman tawh lo a nih ber hi! 

Zonun, zonunmawi: Tunge dik lo tia kan in zawn kual chhung leh, mahni inen aia midang nun sawi nuam kan tih lutukna hian, kristian ram tih hming pawh sawi ngam lo lek lekah min siam ta! Sorkar kan dem, party kan dem, a thlangtu mipui zingah hian sawiseltu hi ka tel ve tih hi kan ngaihtuah tel ngai em? Kan duh emaw, duh lo emaw, kan tuh rah, kan thlai chin rah ang ang hi chu seng tur kan ni. 

Pawm tawp i la, kan thlai chin rah hi kan duhthu a sâm lo a nih chuan eng aiah nge a dang kan chin leh mai loh ang? Tunah chuan, a rah kan seng mek a, thlak tumna rilru kan pu a nih chuan si loh chuan, seng leh zel turin inbuatsaih zawk law law ang u hmiang! 

Mizo nunmawi kan sawi lohna chin hi eng chen nge ni ta? Sawi ngam tur khawp nun kan chhuah si loh chuan sawi lo mai tur chu kan ni reng bawk a ni. Chutiang chiah chuan, kan duh loh sorkar hmalakna sawisel tur hian, kan theih ang tâwka dik ve hi kan tum ngai em? Status atana hman zuai a, hriat zui leh tak loh hi kan tih ve chhun a nih si chuan, ngawih mai hi kan tih theih tâwk sang ber a nih mai hmel e! 

Dik lo kan hria, fel lo kan hria, chu hriatna ringawt chu kan ram tan hian a tawk tawh si lo a nih hi. Lemchanna tual lianpuia kan ram chantirtu zingah mawi takin role ka lo play ve reng em? 

Kan pi leh pute khan, harsa taka an din, thisen chhuak khawpa an humhalh leh an lo ven ṭang ṭang kan zoram hi, a tun dinhmun hi lo hmu se, an tu leh fa kan nih hi an awih lo hial ta ve ang! Intodelh si loin kan mawi em em reng a, changkang si loin kan leng ang suau suau a, chawmhlawm state-ah hian kawngpui chêp em emah motor mawi ber ber nen first gear-in kan tawlh dul dul chu a nih si hi! 

Khingbai changkanna chuan tlakranna min thlen zual zel a, kan nulate intihhmelṭhat zualna phenah beidawnna mit meng a lang a, kan tlangvalte pheikhawk branded chuan kan future bright lohzia a pholang lek fang a. Kan inchhawng ropui ber berte chuan thlamuanna min pe lo a, kan thawh peih loh thawktu zak kha rim nam hiam hiam mai vai te chuan, hmusit ru taka Lalmawiememi leh Lemchanga te hi min en ta hrek hrek a nih hi. 

Kan pi leh pu chen a, lung­rual taka râl do za ṭhinte thlah kha kan ni lo’m ni? Thlah chhawng Kristianna mai avanga thlamuanna hian kan khat rei ta! A tawk tawh e. Hawh u, Kristian ram kan ni, chhuan tham zonun zemawi nei kan ni, induhtawk ve thei tura intodelh thei kan ni. Kan lemchanna tual zawlah ngei hian, tunge dik lo tia zawng buai mai mai lovin, a tak ram ngeiah diknain kan ram hi ke i penpui leh teh ang u. Khua kan la tlai lo ve.