Zu tihbo versus Zu tihto

Vanglaini editorial lama ‘Zu Tihbo versus Zu Tihto’ tih kha ka rilrem zawng tak a ni a, zu hi kan tibo thei dawn a nih chuan 100% mai ni lo 200% in khap hi ka thlawp zawng tak a ni a, zu tibo thei si lova a man tito ve tawk vel, zu chhia titama zu zuar ru ti hlawk tawk vel a nih chuan zu khap leh tura hmalakna hi kei chuan ka thlawp thei lo.

 

Zu zawrh leh zu khap chungchangah hian mithiam ngaih­dante kan hre ngun tawh a, ziak mi leh lehkha ziak thiamte thu ziak pawh kan chhiar ngun tawh a, hengte hi kei chuan ngaihnawm satliah ang velah ka ngai. 

Ka mimal ngaih­dan chuan zu hi kan khap a nih chuan in tur awm lo law lawa khap tur a ni, a nih loh chuan Rangvamual zu zuar leh lailapur zu zuar tihlawk tawk vel a ni dawn a ni. 

Kan kohhran mite pawh hian an ngaihtuah chian ve ngai chu MLTP Act awmlaia zu an khap ‘bur’ lai kha proxyvon vanga kan thih zawih zawih lai kha a ni a, Rangvamual lama kan ṭhalaite an tlan lim thlak dum dum hunlai tho kha a ni a, Lailapur lama wine shop te an ṭhan uak uak lai kha a ni. 

Tlang taka sawi chuan titi lama ‘Excise hausak lai’ an tih kha a nih kha maw, khatiang tur tawk leka zu hi kan khap leh a nih chuan ka thlawp thei lo. 

Khap hi a ṭhatna chu kan tih zalen lutuk chuan a mawl mawlah a thawk nâ a, chin lem nei lova zing aṭanga in tum a, an tihpui ngei dawn tih a chian hnu pawha nghei thei tawh chuang lo kan pung kha a ni. Kan han in hlum deuh zawih zawih a, kan inzir chhuak dawn ṭan tawha mahse ‘vote vangin’ zu chu kan khap ṭan leh dawn ta a, zu hi kan khap a nih chuan Lengpui aṭanga lo haw mi lian zin pawh hi check vek ni tawh rawh se.

Tin, dan lova zu zuar hrim hrim hi hmuh tur awm lo law law bawk se, zu tihbo tuma a tawpa ‘zu tito tawk’ sorkar kan neih chuan ka theihna apiangah ka sawisel ang. An khap hlawhtling thei a nih chuan zu khap hi ka fak mawlh mawlh ang. 

Khap hlawhtlin loh ai chuan zawrh law law pawh a la ṭha zawk; khap ve si, zawrh tur awm tho si hi ka pawm thei lo a ni.