Version leh moral reformation

Mihringte kan inhnial fo chhan leh kan inlungrual theih loh chhan pakhat chu he sap ṭawng thumal ‘version’ hi a ni. Rilru puthmang dik leh thianghlim pu-a kan inlungrual theih nân keima version ngatin he thumal ‘version’ tih hi ka’n sawp kual teh ang. 

Ka sawi duh dânah chuan version awmzia chu thil eng emaw kan hmuh dân, hriat dân, ngaih dân, pawm dân, duh dân leh tih dân kan neih sawina a ni. Entirna chi hrang hrang pe ila a fiah ang. Model Kathryn chuan C.Ronaldo chu ka room-ah rawn lûtin min pâwngsual a, min pâwngsual zawhah dollar 375,000 min pe a ti. C.Ronaldo ve thung chuan ka pâwngsual lo. Ama remtihna thlapa inenglo kan ni a ti ve thung. Version inang lo ve ve an neih avângin mipui leh rorêltute an buai zo ta. A nihna takah chuan version pakhat chauh awm tur chu a ni.

Bike leh car an insu a. Bike khalhtu version-ah chuan car hi a tlân chak êm êm a, a tlân lohna tur lam (wrong side)-ah a rawn tlân a, car khalhtu version-ah thung chuan ani’n a car a khalh muang êm êm a, bike khalhtu zâwkin a khalh chak êm êm a, a bike a thunun zo lo a ti. An insut chhan nia an sawi dân version chu a inang lo ve ve a, an buaithlâk zo ta.

A ṭhenin sap thumal ‘glory’ tih awmzia chu ropuinate tihna an tih lâiin a ṭhenin ropuite tih hi a dik zâwk an ti thung a. Version pahnih a awm tlat avângin inhnialna leh inlungrual lohna a lo awm ta. 

Ṭhenkhatin tu nge i hming tih hi sap ṭawnga kan sawi dâwn chuan ‘who is your name’ tih tûr an tih lâiin ‘what is your name’ tih zâwk tûr alâwm ti pâwl an awm leh a. Mi dang lo inhnial lehin, a ṭhenin kan nu (ka nupui kan tihna) tih hi sap ṭawngin ‘my wife’ tih tûr an tih lâiin a ṭhenin ‘our mother’ tih zâwk tûr, kan ṭawng hi chu sap ṭawng ang hi a ni vek hlei nêm an ti thung a. Version inang lo an neih ve ve avângin an buai zo ta. 

Bible lehlin dânah pawh version inang lo KJV, NIV, NRSV tihte a awm. Mizo ṭawnga kan lehlin dân version pawh a inang lo a, kan pawm dân version pawh a inang lo. Kan Chawlhni/ Pathianni pawh a inang lo. Kan inbaptis dân version pawh a inang lo. Kan Pathian hriat dân leh pawm dân version pawh a inang lo. Hei vâng hian kohhran hrang hrang kan tam phah a, version hrang nei, kohhran ni chiah lo pâwl ang chite pawh kan awm nual. Version hian min tibuai hle mai. 

Zu kan hmuh leh hriat dân version pawh a inan loh avângin vawiin thlengin kan la inhnial reng mai. Version inang lo neia mahni version ṭheuh kan pawm chhûng chu kan inlungrual ngâi lo ang. Kan inhnial reng mai ang. Tihian, version awmzia chu kan sawi fiah a nghawng nên.

Kan naupan lai chuan thil kan inzâwt ṭhin a. A chhânna dik chu a zâwttuin hei hi a ni a tih apiang a ni mai. Sawisêl theih a ni lo. Thil dum pakhat zawng turin min ti a. Thil dum chu a tam mai. 

Kan bula meihawl kâwk pâwl kan awm a, arpui dum no hruai lai kâwk pâwl kan awm a, a ṭhenin pheikhawk dum kan kâwk. Mahse, a chhânna dik tak, a zâwttu version-ah chuan banga vahrit hmei dum intâr hi a ni. Chu chu kan pawm thlap. ‘Lifeisnowhere’ tia ziaktu chuan ‘life is now here’ a tihna a ni a, ‘life is no where’ lo tihsak ta ila kan inhnial buai ang. Thil dang kawhtir theih mah ni se thu leh hla ziaktu/phuahtute ziah chhan, phuah chhan leh kawhtir thilte hi pawm ber tur chu a ni. 

Tirhkoh Paula taksaa hlîng kha kan hrechiang chiah lo a; mahse, thil ṭha lo leh nuam lo lam a ni tih version erawh hi chu kan pawm tlâng niin a lang. Chutiang rilru tal put kan tum tûr a ni.

Mi dangte thil tih chhan hre chiang loin keimahni version-in kan lo phuahsak thuai thuai a, hei hi thil ṭha lo tak a ni. 

Ram hruaitu pakhat chu ke-in office a kai ṭhin a, a kal chhan chu ke-a kal hi a hrisêl a, petrol renchemna a ni a, mi dang a zirtirna a ni bawk. Mahse, keimahni phuahchawp version-in fak leh lâr a khêl te kan lo tihsak ringawt zêl a, thil ṭul lo tak a ni. 

Khawngaihtu chuan a mihringpui a khawngaih êm avângin a ṭanpui a, mahni phuahchawp version-in fak leh ngaihsân a duh vâng kan lo tihsak leh a, a rilru hrisêl loh thlâk hle mai. Thu inchuh a awm pawhin original version hriat tum phawt ila. Hriat hnuah kan pawm mai tur a ni. A version dik tak hre reng chunga pawm duh chuang loa phuahchawp version pawm zâwk tlat mi chu a rilru a dik lo tihna a ni. 

Thu leh hla mai ni lo, kan ni tin nunah hian thil hrang hrangah version hi a tam hle mai. Phuahchawp mah ni se mahni version hi kan pawm tlat zêl bawk si. Mi, kan hriat chian lohte pawh phuahchawp version-in a sual hmêl, a thinchhiat hmêl, a chapo hmêl, a pianthar loh hmêl, a lerh hmêl, a eirûk nasat hmêl, a zâidam hmêl, a thil phal hmêl, a kris hmêl kan lo ti zung zung mai ṭhin. Phuahchawp leh zêldin version a ni chungin kan la ring zui. Mi rilru hrisêlte chuan thil eng pawh a nihna dik tak a original version hi an pawm ṭhin a, rinthu leh phuahchawp version hi an ring ve ngâi lo. 

Mimal a ni emaw kohhran a ni emaw pâwl a ni emaw hriat dân leh ngaihdân neisaa keimahni version-a kan thlir chuan a dik lo ang. Phuah­chawp leh zêldin version ni loin original version pawm hi rilru puthmang dikte mi zia a ni.