Mizoram Lok Sabha MP

Kan ti nek nek a, ‘ber thla’ kan thleng leh mai ṭhin ang khan, Lok Sabha pawhin kum nga an lo hmang leh dawn ta reng mai. Mizoramin MP thar kan nei ngei dawn niin a lang a, party ngai pawh tling leh se kan MP ni lai Pu CL Ruala hi a kum a tam deuh tawh avangin a hahchawlh tawh a rinawm. 

MP tur hian Eng­lish thiam te, Hindi thiam te, mi chak te, mi vengva leh hawi zau (bright) te, ‘central dawr thiam’ an tihte hi an ṭhat hmel a, he lam hi kan sawi ṭhin. Kan ramin MP atana a mamawh chu mi dik, dawt sawi duh lo, mi tluang, politics a nih vanga survive tum a, dawt nena che ṭhin hi kan mamawh lem lo. Kan ram mamawh chu mi dik leh pa/ nu dik a ni. 

Kan MP hi Mizo­ram tan chuan cen­tral sorkar nena kan inlaichinna ang­in a sawi theih a, chuvangin a pawi­mawh em em a ni. 

Mi tam takin kan ngaihdan “central-a sorkar ang apiang hi state sorkar-ah an ṭha,” tih chu a dik lohzia hre chiangtu chu Mizoram hi kan ni. MNF term hmasa kha NDA sorkar lai a ni a, eng vak an thlen lova, Congress pawh Manmohan Singh-a sorkar hnuaia an awm khan duat bik leh duhsak bik kan ni lo. Modi a lo sorkar a, Mizoram kha Congress sorkarna hnuaia awm kan ni chung khan min hrêk lova, chuvangin central sorkar leh state sorkar hi party thuhmun an nih kher a ngai lo tih Mizoramin kan hmu tawh a ni. 

Tunah hian cen­tral-ah tunge sorkar dawn? tih hi a chiang lova, thlirtu tam tak chuan Modi sorkar hi tla turah an ngai tawh. Tun hnaiah state lian, BJP rorel­naa state sorkar inthlanna Rajasthan, Madhya Pradesh leh Chattisghar-ah Congress an chak tlat avangin MP lamah pawh Congress-in heng state-ah hian BJP hi an chhuhsak nasa dawn tih a chiang tawh. 

BJP-in MP an ngahna ber chu Uttar Pradesh a ni a, he state-ah hian tualṭo party (ti ve mai ang) lian tak pahnih, mahse an inhala an inbeih avanga BJP an sorkar phah chhan BSP leh SP chuan mak tak maiin thawhhona thuthlung an siam thei ta rup mai. BSP leh SP inkawp hian UP-ah hian BJP kulh an su chim dawn tih a chiang sa bawk. 

Central politics lo khel ve chiam lo hian, Mizoram hian MP atan mi dik, mi tluang, eiru lo tur, dawt sawi lo tur, phuah­chawp thua mi bum lo tur, ram hmasawnna thlen thei tur chu khawi party ami pawh ni se i thlang tling mai ang u. Party aiin a mihring an pawi­mawh zawk a ni.