Kum 30 chuang Mizorama roreltute hi Aizawl enkawl turin kan la duh zel em?

Kum 1987-ah Mizo­ram hi India hnuai ah state puitling ah hlankai kan ni ve a, chumi aṭanga chhiar chuan kum 2021 hi chu kum 34-na a lo ni ta reng mai a, heng kum 34 chhung hian Congress leh MNF in ro an in rel chhawk char char a, India rama state rethei, thawh chhuah nei lo, kawng tam taka hnufum tak state ah min chhuah tih hre tu chu Mizo mipui zawng zawng hi kan ni a, chuvangin Aizawl Municipal Corporation inthlan lo awm turah hi chuan ngaihtuahna thar hman a hun tawh lo maw?

State dang in Chief Minister ṭha tak tak an neih te chu kan lo chhiar ve ṭhin. Kan state pawhin Chief Minister pahnih kan in neih chhawk char char a, mimal taka an sualna sawi tur awm lem lo mahse state dang Chief Minister te chu an ngaihawm ṭhin a ni. 

Politics ah hi chuan kan duh duh ang hian thil a kal tir theih lova, pa fing leh qualification sang tak tak te pawh hi political party chhungah chuan an pute thu thu in an ṭhu tawm ve kuk a ni chauh si a, kan Choef Minister neih tawhte hnuaia thawk tur AMC bawk neih leh hi Mizo mipuite hian kan la duh leh tho em ni le?

Kan ram ṭhanmawh bawk an sawi ṭhin chu eizawnna atana politics hmang kan tam lutuk hi a ni an ti ṭhin tih kan hre ṭheuh ang a, chu mi culture rawn siam tu chu tuna kan politician sorkarna siam tawh te hi an ni ta a ni. Kan ram hian hetianga contract leh supply inchuhna sal tânna aṭanga hruai chhuaktu a mamawh a, a tâng vete chuan an hruai chhuak dawn lova, ngaihtuahna thar siam a hun tawh lo maw? he AMC inthlan lo awm turah hian.

AMC atana pawisa tam tham tak awm te pawh tun hnaiah social media hrang hrangah an rawn pho chhuaka an hmanna kimchang nen, hetiang hian AMC hi kal leh zel se kan duh chuan a ngai hi thlan leh mai tur a ni a, AMC a pawisa awm zozaite hi tun aia ṭha zawka hman kan duh chuan a hmangtu lam hi thlak a ṭha zawk mai lo maw? Mipuiin duhthlanna kan nei a, a ngai anga kal kan duh chuan a ngai pawh an la in candidate leh tho avangin la vote theih tho a ni. AMC thar neih kan duh pawhin a thar vote tur pawh an rawn inzuar a ni.

Congress, MNF, ZPM leh BJP candidate hi mi ṭha tak tak an ni hlawm a, Aizawl khawpuia candidate tura party tinin an thlan chin hi chu zahawm tak tak an ni a, kum 34 chhung kan state kal tawh en hian mimal candidate ringawt en lo hian rorel tura kan duh party thlan hi a ṭha zawk lo maw? 

Kum 34 chhunga Mizorama roreltute hi kan la duh chuan an la thlan nawn leh theih a, kan duh tawh loh pawhin a thar pawh thlan tur an awm a ni.