Engtinnge ni zel ang?

Kum 10 an ral meuh chuan MLA 34 lai nei Congress sorkhar pawh an tla ve ta duai duai mai. Mothar tha kan han chhawr a, thla khat pawh a liam hmain MNF chuan eng eng emaw an ti nual hman mai. 

A la rei lo bawk a, tunah chuan opposition nei lo ang maiin kan la awm rih a. Hetia sorkhar thar ṭha taka a kal mek lai hian khalh ngiltu opposition ṭha kan neih thuai a ngai a.

Bye-Election a lo awm ang a, MP kan inthlang chho ang a, AMC inthlan nakum mai a lo ni leh bawk ang a, sorkhar ṭha leh mipui huapzo kan neih chhoh zel theih nan eptu pawl an ṭan a ngai khawp mai.

Sawi leh sawi hnu, ZPM hi Political Party ang takngial pawha in registered lo an ni a, MLA 7 lai nei angin lang mahse independent-a ding vek kha an ni a, inthlan a zo tawh a, an dinhmun zel tur an tih chian ran hi thil ṭul tak a ni. 

ZNP leh MPC te ṭhiat tak takin ZPM Party-ah inchhung lut vek law law sela, MP pawh independent hlawm tawp lo deuhvin ZPM angin chuh sela, Party recognition pawh har lo tur hi a ni a. Hetia lem lutuk anga kal reng hi chu an tan pawh a fuh lo thei a ni. 

Tun thla hnih khat chhung, MP thlan hmaa an dinhmun an tihchian loh chuan MLA 7 lai nei (Bial 8) si hi an darh leh mai thei dawn a ni. 

Kum 5 te a vei a, MNF sorkhar hi an ṭha viau a nih phei chuan an kehdarh leh mai thei a ni. MNF sorkharin beisei an phak loh deuh veleh a, keini ve aw ti mai thei tura an intelruh sauh sauh a hun khawp mai. MPC party-in luahman chawi ngai lovin office an nei sa a, hei hi rochung nghal mai se, a sam khai mai tur a ni. 

Tun dinhmunah chuan Congress hi han tho leh mai hmel an pu rih lova, chuvangin, MNF sorkhar thar kan thlir mek lai hian opposition hi engtin zel nge an kal ang tih hi thlir tel ve loh theih a ni lo. House-ah te an hriam viau phei chuan sorkhar an khalh ngil thui thei viau ang. A sarhu lai ZPM boruak len lai ngei hian thutlukna fumfe tak an neih thuai a ngai khawp mai. 

Tun ṭuma ZPM vote tute kha chu an hmuihmer lo viau hmel a, mahni hma an sial loh hmelin, ram leh hnam an ngaihtuah hle a ni ang tih a rin zawn theih a, change an duh hlawm tih a hriat reng mai. Tun ai khan inthlan kha thla hnih lek pawhin han tawlh hla leh hret se, sorkhar an siam pha ṭep dawn a nih hmel.

Thil chiang tak chu, Party ruihchilh lo an lo ṭhahnem tawk hle tih hi a ni. Aizawl E-II-a Finance Minister 3-naa a tla thei te kha thilmak a ni a, Aizawl Bial 11-ah Bial 6 ZPM in an la thei mai te kha thil mak tak a ni. Party lian inti tan pawh nakin zel atan inenfiahna tur ṭha tak a ni ang. 

Nakinah phei chuan kum 10 an lal tawh chuan thlak ngei ngei tur angin kan la ngai thei mai ang. Chuvangin, term 2 aia rei lal tur chuan hnathawh ṭhat fe a ngai ang. A theih loh phei chu a ni hauh lo. Hnathawhah mipuiin an teh fo tawh dawn a nih hmel.