Written by
Annex Ruati
In sual si!
Hmun dang ang bawkin Mizoramah pawh sorkar laipui kar nan kawngzawh huaihawt a ni fo va, chu chuan rahṭha pawh a chhuah mek zel niin a lang. NGO hrang hrangte inpumkhat zia hmuh theihin a awm ṭhin a, mipuite pawhin ram leh hnam chhan nan chuan theih tawp kan chhuah ṭhin. A lawmawm e - kan au hla erawh ngun taka ngaihtuah chian a ṭha khawp mai.
Tun hnaia pawl hrang hrangte huaihawta kawngzawh runpui kan neih hrang hrangte hi enlet ila, kan duh leh beisei ber pawh ngaihtuah lek lo va sahawk ta chiam chiam an awm fo mai. Mi tam takin an rilru leh ngaituahna zawng zawng an sen lai a, fiamthu thawh nana poster lo siam tawk lah an bo lo.
Mi ṭhenkhat (lansarh tum?) ten fiamthu thawhna remchang atana an lo hmang ve fo mai hi chu a lungchhiat thlak hle. Ram leh hnam chhan nana tha leh zung, sum leh pai tam tak an sen laia fiamthu lo thawh hi eng rau nge ni ta ang le?
Sorkar laipuia kan thilphut nawr nana kan auhla hman leh poster te hi hnamdang unauten an hriatthiam theih tur (English & Hindi) ni thei se a duhawm hle. Media hrang hrangten nasa zawka an puanzar theihna tur te, a ri an ngaithlak leh mita an hmuh ringawt pawha an hriatthiam theih tura kan chhawpchhuah a ngai a ni.
Tun hnai khan NGO hrang hrang buatsaihin Citizenship (Amendment) Bill, 2016 duh lohna lantirin kawngzawh a ni a, tel pawh an ṭhahnem hle. Hemi
ṭuma kawngzawhtute auhla 'insual si' tih mawlh khan a ni rilru khawih ni. Sorkar laipuia BJP kaihhruai sorkar kar nana theihtawp chuaha tha leh zung, ngaituhna senga kawngzawh a nih laia khatiang mai maia aurual khan rah ṭha a chhuah ang em?
Social media lama a darh hnu pawh khan fiamthuah emaw ka la ti a, mahse a tak tak a lo ni si - ava zia lo tehlul em! A ṭhenin 'Hello China' tih thuziak an lo keng a, hei pawh hi tih fo loh atan a ṭha khawp mai.
Hun lo la kal leh turah pawh ram leh hnam chhan nana kawngzawh huaihawt a ngaih hun a la awm leh ang, chung hunah chuan i fimkhur tawh ang u. Hei lo ram dang kan nei si lo a, hnamdangin min chimral mai loh nan kan inpumkhat zia ilantir zel ang u khai.