Ch. Saprawnga Truck Terminal Parking Fee kha

Vanglaini daily newspaper chhuak ni 21.01.2019 a ‘Parking Fee Collector pakhatin nuai 71 ba’ tihah khan thu dik tawk lo tam tak a awm a, ka han sawifiah dawn a ni. 

I. Ch. Saprawnga Truck Terminal Parking Fee khawn hna hi mi 2 in kan chhang a, a tirah pek kan ni lova, pek zawkin ngun taka a zir hnuah a thawk ngam lova, a second bidder hnenah offer a ni a. Nimahsela bid amount hi a lo san em avangin min tihhniam sak theih dawn chuan kan pawm ang kan ti a, cheng nuai hnihah min tih sak a, (chanchinbua nuai hnih sing hnih) tih hi ni lovin. 

II. August ni 17, 2017 aṭanga bul tan tur kan nih laiin AMC lam hian min tikhawtlaiin min ngaihsak lo hle a, vawi tam tak office a kan kal hnuah agreement pawh thla 4 hnu, Nov 21, 2017 khan min sign pui thei tawk a, hetianga hun rei tak min tihkhawtlaina chhan hi a hnu lamah harsatna min siamsak thei tih hre reng chunga tih a ang hle. 

III. Parking Area kan lak tirh hian SIPMIU/ AMC bawlhhlawh paihna tur (garbage truck) 54 parking area-ah hian an lo ding sa tawh a, heng truck 54 hi thla 3 leh ni 15 an ding a, Nov 30, 2017 thleng an ding a ni. Heng motor-te dinna parking fee aṭanga cut turin vawi tam tak dilin lehkha ka thehlut a, min chinfel pui duh lova. 

IV. Parking kan enkawl lai khan Kawnpui aṭanga Sairang kawng namenlovin a chhia a. Truck te, ke 6 nei chin phei kha chu Tlangkawng Lungdai lama kal SP Traffic pawhin a phalsak hial a, loh theih loha kal chi motor ke 10 nei chin deuh chauh Sairang lamah an kal a. Motor a tlem chuan Parking Fee a lo tlem a, bid amount hmuh phak a har a. Tun hnu kawng ṭhat hnu hi chuan a dan a dang deuh tawh a ni mai thei. 

V. Bid amount hmu phak lova kal reng ai chuan tiin ni 1.3.2018 khan kan in withdraw ta a, kan in withdraw hian an motor dinna cheng 5,51,200 nen avaiin cheng 9,53,300 thehlut ang kan ni. Heng thla thum leh a chanve chhung hian AMC motor 54 hian Parking Area chanve dawn lai an luah a, heng motor-te dinna hi chinfel ni lovin Parking Fee a inhnawh khawm ta a. Bid Amount hmu pha lo mah ila kan hmuh ang ang chhun luh kan tumin, AMC hian an phal bawk si lo. Hei hian a hnu lamah harsatna a siam ta a ni. 

Bid Amount aṭanga chhutin kum khatah nuai 24 lut tur a ni a, kei ni thla ruk lek thawk aṭanga nuai 71 hmuh chhuah AMC in a tum a nih chuan thil mak tak a ni ang. Cheng nuai 9 chuang pek tawh laia nuai 71 ba anga in chhuah hi a mak kan ti khawp mai.