Engtin kal zel ang maw?

December 11, 2018 ah MLA inthlan result puan a ni a, MNF chuan seat 26 lain sorkarna an chang a ni. December 15 ah sorkar thar lakluh a ni a, Chief Minister chuan council of minister ruat fel nghalin, an department enkawl turte pawh sem fel nghal a ni. 

Chief Ministe leh minister-te'n hun awl pawh nei hman meuh loin, hma an la nghal char char a, hna pawh an thawk nghal a, hmalakna tur ruahmanna hrang hrang pawh an siam nghal a ni. Thlan tlin an nih hlima MNF President-in a ngaih pawimawh hmasak tura a sawite chuan ngaih pawimawh a hlawh nghal a, a ngaih pawimawh ber zu zawrh tihtawp pawh a theih ang anga bawhzui nghal a ni.

Kawng chung­changah pawh sor­karin hma a la nghal a, pawisa awm ang angin hmun hrang hrangah kawng siam hna thawh nghal a ni a, sorkar thar an 

ṭang hle. 

Pu Zoramthanga'n campaign au hla-a a hman pakhat kawng chhawng pawh buaipui nghal a ni a, mi tam takin fiamthu thawhna atana an hman hi a tak rama chantir ngei a tum niin a lang. 

Chief Minister Pu Zoramthanga hian kawng chhawng chung­chang hi sor­kar laipui lamah pawh a thlen tawh a, a lawmawm takzet. Hetianga a thusawi bawhzui chat Chief Minister kan nei hi a thlamuan thlak hle. Pu Zoramthanga thusawi kha ngun taka kan ngaihthlak chuan kawng chhawng hi main road (Chanmari - Sikul­puikawn inkar) a siam tur niin a lang. 

Kawng chhawng hi a siam a nih chuan thlamuang taka kan zawh ngam turin a siam turah ngai ila. Lei dawh chim leh ṭhin ang mai mai ang tur chi kawng chhawng kan nei ang tih a hlauhawm a. Chuvangin, sorkar hian a hming chher hialna tur khawpa ṭha leh rintlakin kawng chhawng hi siam se a duhawm hle. 

Khawilai kawng pengṭhuamah emaw kawng chhawng hi siam a nih pawhin thil lawmawm tak a ni ngei ang. Chu­­tihrual erawh chuan khawilai kawng pengṭhuam emaw ringawta kawng chhawng hi siam a nih chuan Pu Zoramthanga thusawi ka hriat­thiam dan nen chuan a inmil dawn lo hle tihna a ni. 

Kan sorkar thar hian kawng hrang hrangin hmalak a tum ruh hle tih an chetzia aṭangin a hriat theih a ni. Hetiang, hmasawnna hna thawh tak tak tum sorkar kan nei hi thil lawmawm tak a ni a, a hlawkna teltu tur chu Mizo mipuite an ni. 

An tum anga sorkar hian hma­sawnna hna a thawk thei a nih ngat chuan kum 5 chhung hian kan ramin hma­sawnna hmel thar a hmu ngei ang.