Written by
PC Lalrosiama
Ṭul fetah lo chuan
Hman deuhah khan fiamthu thiam H Zoliana kha ni tain ka hria Paite pakhat petromax roh chungchang kha a sawi a, a nupui thi a, a petromax chhit an dil a, "Pawimawh fetah lo chuan phal lo reng reng," a ti tlat e a ti a, kan nui dar dar ṭhin a.
A fiamthu thawhtupa leh a thu awm dan diak diak khi ka hre tawh lova, mahse khtiag deuh khi tuna kan ram dinhmun hi a ni.
Citizenship Ammendment Bill 2016 kan chai mek a, kan ram a rum ta mek a ni tunah hian. Chu Mizote tana dan hlauhawm tak pass duhtu chu NDA an ni a, chu NDA-ah chuan central-a sorkarna vawn fung chelhtute ber an te si hi kan buai a, ka hotupa ṭawh chhuak kan ngai chang a ni.
Kan hotupa ber a rawn ṭawng chhuak ta a, ani chuan NDA aṭanga inhnuhdawh pawh an hreh loh thu a sawi a, nimahsela chu chu 'a ṭul chuan' tih a ni ta chauh a ni.
Mizote tan chuan tun hi inlung rual taka kan ṭan ho hun ṭha a ni si a, tunah hian pheikhai rual taka kan beih loh chuan hun ṭha a liam palh ang a, kan buaina hi belhchhah a niin he ram hi nakin lawkah tute emawin dan thar tlawhchhanin dan ang thlap siin min chim ral mai ang tih hi a hlauhawm tawh si a, chutih hunah chuan a tlai tawh dawn si a, chuvangin tun hi kan ṭan rual hun tur a ni.
Ṭan rual dan ki tam tak zinga pakhat chu political party hian an party nihna dah ṭha se, he CAB kan duh loh avangin he bill pu luttu party hi chu kan ramah an awm pawh ka phal lo, tiin i au rual ang u. A chhan chu he bill hi kan duh lo tak tak a nih chuan a bill pu luttu party leh an sangawizawnpui kan rama an awm ve reng hi kan phal bik dawn em ni? tihte rilruah a lang rum rum a ni.
MNF tan chuan tun hi NDA aṭanga in hnuhdawhna hun remchang, hun rangkachak a ni. A chhan chu zep thua awm lova NDA an nih avangin inthlan dawnah ṭanpuina sum leh pai an dawng a, NEDA an nih avangin Meghalaya leh Nagaland lama rorelru party lamin ṭhian ṭha puihna tam tham tak an pe an ti bawk si. Tunah chuan an tling chiang tawh bawk a, NDA leh NEDA hi CAB chhuanlam hmang hian kalsan theih a ni.
Tunah pawh MNF in NDA an chhuahsan loh chuan a ṭul hun hi 'pawimawh fetah lo chuan' tih nen khan a inang dawn tlat a ni.