UI A HLAUHAWM – FIMKHUR RAWH

Mizoram chhung ngeiah, khua leh tui dangte kara awm ve tho sia ui kawlh vulh tlat ho leh, an chenna in kawngka leh gate vela ui an neih thu leh a hlauhawm thu vel tar ho hian eng rilru puin nge an tar ang aw ka ti ṭhin. Mahni mihringpuite tana hlauhawm leh thihna hial thlen thei tih hriat reng kawl luih tlat reng ai chuan, tihral emaw, dah bo daih emaw awm ka ti ṭhin. Chutianga ti si lova, lehkha an tar chhan ni awma ka rinte chu:

1) Rilru chhiat hrim hrim avanga mi dangte tina thei leh tihlum thei ui kawlh nei nih kha ngaihsanawm riauva inhriain, mawl taka chapo vanga tar an ni thei.

2) Mi rinawm lo leh dik lo an nih avanga an rilru chhung lama mi dangte hlauhna leh dawihzepna nasa tak nei chung renga nung an nih vanga tar an ni thei.

3) Sawrkar, khawtlang leh Pathian phal loh chi thil ṭha lo tih nana an in chu an hman ṭhin avanga mi dangte tlawhpawh an duh loh avanga tar an ni ṭhei. 

4) Mahni nihna dik tak ni lo, a lem leh a dera nung ṭhin leh thil ti ṭhin an nih avanga chhungril lama thlamuanna leh inrintawkna an neih loh avanga mahni intih­huaisen (confi) chawp nana tar an ni thei.

5) An pianthar loh lutuk avanga mahni mi­hringpuite tana hnawksak leh hlauhawm nih kha nuam an tih tlat avanga tar an ni thei ngei bawk.

Khitiang bak khi ui kawlh vulh luih tlatna chhan tur tur hi a vang hle. 

Chutianga mi dangte hriattir nana an tar ang ngeia khua leh tui dangten kan hriat tur leh kan tih ngei ngei tur chu:

1) Hlauh em em phawt tur a ni. Chumite chhungkua chu eng thil chungchangah mah tlawhpawh loh tur. Khua leh tui, khawtlang leh inṭhenawm khawvenna leh sakhua leh sawrkar thilah pawh tlawhpawh ngam loh chu; chung thil zawng zawng ṭang chuan ban hmiah tur. En hran mai tur.

2) An inngaih ropuina ang tawk vela ngaihsan tur. An mizia awm chin hriat nan hman tur.

3) Khawtlang leh sawrkarin rinhlelh ruk tlat tur. Dan phal loh leh mahni mihringpuite tan eng thil ṭha lo nge an tih tih enthlak reng tur.

4) Mihring tana hlauhawm leh pawi nasa tak leh thihna hial thlen thei, mahni veng chhung leh ṭhenawm khawvenga a awm tih hriat reng na na na chu khawtlangin an chungah ro rel tur. Keimahni chunga thil pawi tak leh thinurna a thlen hma ngeiin. 

A thu hrimah, mi fam­kim lo lutukte hi chuan ui hi vulh thlazen lo ang u. A neitu leh enkawltu tana kawlh lo, hlauhawm lo leh hnawksak miah lo hi mi dangte bulah chuan an mizia an thlak daih zel tih hi chiang taka hriat tlat tur. Mahni ui ni lo chu tereuhte pawh ni se, tu pawh hian kan hlau va, kan nel lo va, kan ning bawk. Mi dangte laka mahni ui venthawnna chang hriat hi mi famkimte tih dan a ni. 

An nihna tur ang taka thiam taka enkawl leh chhawr an nih chuan ui hian mize ril tak, thiamna leh theihna nasa tak an nei a; chutiang tur taka kan enkawl thei dawn lova, chhungkua, ṭhen­awm khawveng leh khawtlang tana harsatna leh innghirnghona siamtu mai mai atan chuan ui hi i vulh thlazen lo mai ang u.

Bible pawhin hmun tam takah ui a chawimawi lo teh a nia. Thil ṭha lo lam hlirah a hmang a, a dah hnuaihnung teh asin. Inchhung (vanram)-a awm ve lo tur leh pawn (hremhmun)-a awm turte zingah a telh a (Thup 22:15). Ui man pawisa chu thawhlawm leh Pathian rawngbawl nan pawh a phal lo bur a ni. Chuvangin, intihsakhawmi te, sakhaw rawngbawltu leh pastor ui vulh tlat leh ui buaipui viau nihte hi a mawi chiah lo a, speaker leh team-ho uisa heh viau leh, an uisa duh thu pulpit aṭang meuh pawha sawi ṭhinte rawngbawlnate hi a nung mawh viauin a rinawm. Mitin thinlungah hian ui leh ui buaipuitute leh, an buaipui danah hian tehna hi a awm sa vek si a.

Nawhchizawrh man emaw, uicho man emaw, thutiam nan Lalpa in Pathian inah in keng tur a ni lo; a eng ve ve pawh chu Lalpa in Pathian ngaihin thil tenawm a ni - Deuteronomy 23:18.