HNAM PASALṬHA L.MALSÂWMA COLNEY A LIAM VE TA!

A mak mawlh mawlh êm mai! Ni 29 chhûng lekah kan Zoram mi lâr leh mi hming ṭhate kan han chân ta zut zut mai hi a ngaih ṭhatthlâk loh mang e aw! Tûn thla laihâwl khân chanhai, riangvaite hmangaihtu, kan mi hausa hmasa, Pu RTP (Rothangpuia) chu kan lo thlah liam tawh a. Tûnah, Mizoram buai laia a lu lawk berte zînga mi, MNF President hial pawh lo ni tawh, chanchin ngah tak, Pu L.Malsâwma Colney chuan he lei, a khualzin kawng kum 88 zet a zawh hnûah a lo mangṭha ve ta a, ka va ui tehlul êm! 

Miin a chanchin an sawina lehkhabu-ahte ka lo chhiar ve tawh ṭhîn a, a chanchin an sawina rêng rêngah thu sawi a thiamzia leh a thu sawi nuihzatthlâk theih ṭhinzia te an sawi tel ngei ngei zêl. Ramhnuaia a awm chhûng (1966-1979) khân nihna pawimawh tak tak, Senate President nihna te chelhin, National Executive Member te a lo ni tawh a, Pu Laldenga mi ber a ni ṭhîn. Zo hnam tâna a rammut lai, thinthia mutmu pawh a tuah ngam ṭhin loh lai, ei leh in tûr mumal pawh an neih ṭhin loh lai; a, an khaw lam Biate lam pawh ngaiin lunglên vawng vawng châng te pawh an nei ve ṭhîn ang; mahse, thosi leh dosi kârah ram leh hnam tân rammu an ni miau si. Kut ruak ngawta hâw lovin Independence hâwn ngei a tum âwm si a. 

Ramhnuaia an awm lai chuan nula rîmna hun te pawh an nei ve ṭhîn a ni âwm e. Pu Zoramthanga pawhin, “Ngaihzâwngte chu kan nei ve dêm dûm a!” a tih kha. 

An ṭhianpa (?) hian nula hmêlṭha ve deuh hi a ngai­zâwng a, ani, L.Malsâwma Colney, vâl senior, kum 35 pelh tawh chuan rammut laia nula rîm leh ngaihzâwng neih tih vêl chu a ngaithei lo ṭhîn hle a, an ti. An ṭhianpa nula rîm pawh a lo khak fo ṭhîn a ni âwm e. An ṭhianpa chuan chutia Malsâwma Colney-ina a khak fo chu a ning ta deuh a ni ang, “Nang, nula pakhat pawh hmangaih thei lo khân ram leh hnam ka hmangaih e, te i lo ti vei a,” a ti hial e, an ti.

Ramhnuai aṭangin kum 1979 khân a lo chhuak a, Democratic Party (DP) a zawm a. Amah hi Mizo êm êm, Mizo pa nih tling hliah hliah, Mizo hnam hi a hmangaih bur a, ama thuin Mizoram map te pawh a lo duang ve hial tawh a ni âwm e. Ramhnuaiah rammuin Zo hnam tân hna thawk thei tawh lo mah se, amah hi nationalist tak mai a ni a, Zo Re-unification Organisation (ZoRO)-ah Vice President te, Mizo Zirlai Pâwl (MZP) Gen. Hqrs. Senior Adviser nihna te a lo chelh tawh a ni. 

A rammut lai ata tawha tlangvâl senior lo ni tawh chu a lo chhuah hnu rei fêtah pawh kawppui nei lovin a la mal lên reng a, kum 2004 khân kum 73 mi a nihin nâk ruh bo a chhar ve ta chauh a ni. RK.Lianzuala’n Zonet studio-a a kawm ṭum khân, “Kum 115 thleng dam ka la tum; a bâk a awm lo,” tiin thu tâwp chu siam mah se, nunna chunga thu neitu kan nih lohna a lang leh ṭhîn. Keini’n ngaiin ui hle mah ila, nunna petu chuan A lamah min sengsak ta si a le! 

Kan hnam pasalṭha, a nunna atân pawha hlauhawm, a in chhûng lum nuam tak pawh thlahlel zo lova kalsan, eng pawh huama rammu, Pu L.Malsawma Colney hi Mizo hnam a awm chhûng zawng, Zo hnam tâna a thâ leh a hna­thawh zozai te hi Zofate thin­lungah a châm reng tawh ang.

Hawh u, kan hnam pasalṭha hi a phu ang ngeiin Zofate hian i sûn ang u. A kalna ramah chuan angel-te’n thla khâwngin lo hmuak rawh se. Mangṭha, Pu Malsâwm.