Home Minister-in eiruk a hua...

Kan Home Minister thar Pu Lalchamliana hi ka mi hriat ngai a ni lem lo a, mahse amah hi MNF term hmasa lamah te an khaipa a nih ve bawk avangin chiang lo riai ruai chuan ka ralkhat hriat ve ringawta ni. 

Pu Chama hian Police Headquarters-a Arya Mess-ah hmanni lawk khan thu a sawi a. Vanglaini phek hma lamah hian a thlalak nen an rawn dah nghe nghe a. Chutah chuan Pu Lalchamliana hian, eiruk leh discipline ṭha lo a huat thu a sawi a ni. 

Amah Pu Chama hi chu ka hre chiang lo ka tih tawh kha. Kan hriat tlanglawn zawk tur erawh chu Pu Chama neitu ho kan Mizoram police-te hi an displine a ṭha em tih leh kan police hotute hian dan dik loin thil an ti em tih lai hi mipui lam chuan kan lo chik ve theih langsar deuh chu a ni mai awm e. 

Hman deuh kha chuan check gate vela duty ṭhin police force te kha an hausa chak bik riaua sawi te pawh kha a awm ṭhin a. Khatiang thil kha tak tak te a nih ngai chuan dan dik lo takin thil an ti a nih ngei hmel. 

Chutiang bawkin, Mizoram police hotu­te pawh an naute eiruk lakah an fihlim loh phawt chuan police hotute pawh hi an fihlim bik dawn lo tih a chiang a, an lakah mipuiin rinna kan nghat ngam lo ang. 

Kan Home Mi­nister hian India rama police ṭha ber ni ṭhin Mizoram police a enkawl dan hi mipuiin kan lo thlir dawn a ni. India rama police ṭha berah a chhuah leh thei ang em, nge police vannei an rawn awm leh sup sup ang a, hausa chak deuh deuh an awm thar leh zawk dawn tih hi mipuiin kan lo thlir dawn a ni. 

Amah Pu Chama hi chu mi sawi danin pa ṭha pangngai tak a nih hmel a, Mizo pa tak, tlawmngai lawh mi fel tak niin an sawi. Pu Chama hi pa ṭha leh fek tak ni mahse a naute hi a enkawl ṭha thei dawn em tih hi thil pawi­mawh zawk chu a ni. 

Mizo mipuiten kan police-teah rinna kan nghah ngam loh a, rangkachak tawlh ru duh tawk lek leh, thamna pawisa ita post ṭha inchuah kual mai mai ṭhin police kan nei anga a lan chuan sorkar tan pawh mualphona lian tak a ni dawn si a.