Khawpui roreltu tur party pathum

Inthlan result hriat hmá hi a nawm hun lai tak a ni pakhat ve a. Ram changkáng záwkah te chuan a riruang (predict) a hriat thei fú ṭhin a. Keini ang ram chhangchhe deuhah chuan rin dan sawi huai tak tak kárah, ‘zawlnei’ tih angreng nen thu lawilo a tam tawh ṭhin a. Chuvangin, inthlan thlirláwkna atan chuan inthlan hmasa (latest) result aṭangtein kan tinzáwn dik thei deuh mahna, i’n thlir chhin teh ang. 

Mizoram congress party hian Aizawl Municipal Corporation (AMC) inthlan 2010 leh 2015-ah te thawhpui neia inthlan a chuh ṭhin avangin AMC kal tawh aṭang chuan an mipui neih zat (vote share) dah thiam a har a. Chutih rualin kum hnih kalta 2018 MLA inthlan result leh thla nga liam ta, August ni 27, 2020 Aizawl Local Council result aṭang tein an dinhmun a ngaihruat theih tho mai. 

MLA inthlanpui 2018-ah Congress party hi khawpui chhung, AMC huamchin MLA bial 11-ah an che ṭha lo hle a. MLA pasarih an neihna Aizawl Municipal huam chhúng chu an hloh (Nil) fai vek a! Kum 2019 MP (Lok Sabha) inthlanah Zoram Peoples’ Movement (ZPM) nena an candidate inṭawm Lalnghinglova Hmar chuan khawpui chhung vote za zelah 53.34% hmuin an khingpui, MNF khan za zelah 37% emaw chauh a hmu phák a. AMC ward anga chhútin ward 18 laiah party pahnih ṭangrual kha an chak zawk bawk a. An MP candidate vote hmuh kha party pahniha han semsawm erawh chuan congress party chu a ropui viau chuang lo.

Hetiang a nih lai hian 2020 Aizawl Local Council veng 83 inthlanah Congress party hian 2018 MLA inthlanpuia an chetchhiatna kha an khûm leh ta hle a. Kártin chhuak chanchinbu, The Frontier Despatch(TFD) chuan, Cogress party-in kum 2019 MP inthlana ZPM a thawhpuina kha Aizawl-a Congress party tan inkaihthawh lehna hun ṭha tak a ni, a ti. 

Kum 2018 MLA inthlanah Congress party hian AMC huamchhunga vote tla zawng zawng hmun li-a ṭhena hmun khat a hmu pha ṭáwk a. AMC ward anga chhútin ward 16 ah pathumna niin vote a hmu hniam ber bawk. Nimahsela, 2020 Local Council seat 545 ah seat 122 a rawn la pha leh ta a, chu chu seat awmzat za zela chhútin 22.4% a tling a. Local Council veng 83-ah veng panga(5)-ah chakin za zela 6% a hauh pha bawk.

Zoram Peolpes’ Movement (ZMP) hian kum 2018 MLA inthlanpuiah AMC huam chhunga MLA bial 11-ah 6-1 = 5 MLA an nei a, khawpui chhungah a che ṭha hle. Sawi tawh angin 2019 MP(LS) inthlanah Congress party nen an thawhho avangin an vote neih zat (vote sharing) sawi theih a ni lo a. Zat leh zata insem rálah chuan MP-a an vote hmuh kha a tam lem lo.

Kum 2018 MLA inthlanpuiah ‘movement’ anga an kal vang nge, ZPM hian khawpui chhúng AMC bikah ward ang zéla chhútin ward 11 laiah hnehna an chang thei a. Ward paruk dangah pahnihna an la hauh pha cheu va! ZPM tan hian 2018 kha AMC inthlan ni zawk ta se, khawpui chhúng AMC-ah rorelna an chang dawn tihna a ni.

Nimahsela, hmanni lawka Aizawl Municipal Corporation (AMC) huam chhunga Local Council inthlan result-ah chuan kum hnih kal ta 2018-a an mipui neih zat (vote share) an hauh pha ta lo mai pawh ni loin, khata an vote hmuh zatve pawh an hmu pha tawh lo a. AMC ward anga chhútin congress party-in Ward 16-ah party pathum zinga vote hmu hniam ber nia an tlakchhiat lai aí pawhin, 2020 local council result-ah ZPM hi an tlachhe nasa tawh zawk a. 

Local Council member 545-ah Congress party-in member 122 a neih laiin, ZPM chuan 39 chauh a nei a, chu chu za zéla chhútin 7.2% a ni. AMC huamchhunga local council veng 83-ah ZPM chuan veng pahnih Mission veng leh Vaivakawn-ah te chauh hnehna a chang a. Chu chu za zela chhútin  2.4%-ah an sorkar tihna a ni. 

ZPM hian AMC ward anga chhútin 2020 local council result-ah khawi ward ah mah 2018 MLA result an phá tawh lo mai pawh ni loin, ward pasarihah te phei chuan a hmáa an hmuh zatve pawh an hmu pha tawh lo. Ward pahnih ward -V leh X-ah te phei chuan a hmáa an vote hmuh; hmun thuma ṭhena hmun khat pawh an hmu pha tawh lo a ni. 

Rorellai MNF hian kum 2018 MLA inthlanpuiah MLA 26+1 = 27 an nei a, chu chu za zelah 68% ang vel a ni. Chutih rualin AMC huam chhunga an MLA bial vawn lai pahnih West -I leh South -II te chu an hloh ve tho mai!

Khawpui sorkarna chelh méktu MNF hian kum 2015 khan amahin AMC ward 11-ah chakin sorkarna hneh takin a siam thei a. Kum 2018 MLA inthlanah bial paruk(6)-ah hnehna an chang zui bawk. 

Hetiang a nih lai hian Councillor 11 an neihna; AMC bíkah kum 2019 MP (LS) inthlanah ZPM leh Congress ṭangrual vote hmuh a phâk lo hle. AMC ward anga chhútin ward pakhatah chauh an chak. Chuti chungin beihrawnna kárah chaklo zawk mah se, August 27, 2020-a Aizawl Local Council inthlanah hma a rawn sáwn nasa hle thung a. AMC ward zawng zawngah MNF hian vote a hmu tam ber fai vek a. AMC ward pariata an vote hmuh phei chu kum 2015 AMC aiin, kum 2020-ah a tam tawh zawk. 

Thla nga(5) kal ta maia Local Council inthlanah khan MNF hian hnehna a chang sáng hle a. Aizawl Local Council veng 83-ah veng 71-ah hnehna a chang phák a. Mipui vote pawh za zéla chhûtin 45.5% an hmu phák bawk. A hma kum (2019 MP inthlan)-a Aizawl mipui vote 37% chauh hauh phak si khã; kil thum aṭanga inbeihnaah chuan a rawn sáng leh ta hle a. Party mal ang pawhin khawpui chhung vote MNF hian a hauh tam ber bawk. 

MNF party hian Aizawl Local Council veng 83-a seat awm zawng zawng 545 ah 368 lai a la phak a, chu chu za zéla chhútin 67.7% a tling. Local Council veng 71-ah chakin rorelna a kalpui thei a, chu chu za zela chhútin 85.5% lai a tling pha bawk.