Inthlan hmasa leh AMC

Tahrik February 16, 2021-a Aizawl Municipal Council (AMC) inthlan lo awm tur ah hian tu nge tling dawn tih hi tumahin hre lo mahse inthlan lo awm tawh aṭang hian a 'risk' theih dan dan a awm a, he inthlan lo awm turah hian party pathum in tlin theih an inbeisei tlat avangin tlem azawng chu i han thlir dawn teh ang hmiang.

Rorel lai MNF tan Aizawl khawpuiah hian innghahna tur a awm dawn a nih chuan Local Council inthlan hnuhnung ber result kha a ni a, hetah hi chuan MNF in hnehna sang takin an chang a ni. 'Marawhchu Local Council/Village Council inthlan hi chu party inthlanna a ni lo tih hre chiangtu vek kan ni a, veng chhung tana ṭha ber turah miin vote an thlak avangin Local Council result aṭanga ngaih ṭhat ngawt chu a fuh lova, a chhan chu MNF-in state-a sorkarna an chan hlim khan MP inthlanah khan Aizawlah hian independent candidate Pu Lalnghinglova Hmar khan bial pakhat MLA by-election neihna tih chauh lovah khan hnehna a chang vek tlat a, rorel lai MNF kha MLA inthlana an chak zawh hlimah khan Chief Minister Pu Zoramthanga bialah meuh pawh khan MP inthlanah kha chuan an chak lo tlat a ni, hei vang hian MNF chuan AMC hi MP inthlan aṭanga teh an duh dawn lova, chutiang bawkin AMC hi LC inthlan aṭanga teh ngawt theih pawh a ni bik si lovang.

Congress hian AMC inthlanah hian innghahna tur an nei lo lehzual dawn a, Local Council inthlanah an che ṭha lova, MLA inthlanah phei kha chuan an nil ṭhak a ni tuna AMC inthlanna tur area chhung bikah hian. 'Marawhchu Congress chuan an sawi theih chu MP inthlan bawk kha a ni a, mahse kha chu Congress party a nih tawh loh avangin an tan chuan inthlanna aṭanga teh tur chuan beiseina a chau a, chutih rual chuan Congress hi chuan member nghet sa an ngah tih MLA lama an tlak hnu khan LC leh VC inthlan lamah an rawn ti lang a, state sorkar MNF hi an performance a lo ṭha lo ve bawk nen candidate an neih ṭhatna bial ah chuan an la beiseiawm ve thei tho a ni.

ZPM hi ngaihdan siam thiam harsa ber an ni a, MLA inthlanah khan miin Pu Lalduhoma bak kha Aizawlah tling turin an ring vak lova mahse kan han inthlang zo kha chu tuna AMC area chhunga MLA ngah ber an ni tlat mai a ni. Party member chhiar dawnin veng tinah, "He mite chhung hi ZPM" tih tur kha an tlem em em a, mahse MLA an ngah viau thei tlat a, MP inthlanah an candidate thlawp khan Aizawlah vote a hmu sang fal leh bawk a, ZPM hi mipuiin an en chhin duh ve leh dawn pawh a ni mai thei ti dawn ila mahse LC inthlanah khan an che chhe leh si a, hriatthiam a harsa a ni. AMC ah hian ZPM hi an chet chhiat vaih chuan Serchhip lama By-election ah pawh hian an chet chhiat phah vang vang thei a, chu chuan 2023 inthlanah pawh a nghawng thei ve thova, an chet ṭhat chuan 2023 ah Mizoramah sorkarna siam an in beisei dawna chuvangin ZPM tan chuan inthlan pawimawh tak a ni.

BJP tih loh party pathum hi chuan Sap ṭawnga 'fighting chance' an tih ang hi an nei vek a ni.