Zirtirtu lak dan a rinhlelhawm

Zirtirtu lak kha a tira an sawi khan ‘buana hmaa kherh’ tiin kan ngawi mai mai a. Mahse a taka an han la tur tehna an han zam ta tak tak kha chu, “Heti deuh hian duhsak zawng kan dah thei ang,” ti ang chiah chiah khan an zam a, theihtawpa lehkha lo zira sorkar hna beisei ve tan chuan result chhuah hma aṭangin a luhaithlak dawn a ni. 

Hei hi sawifiah dan ka thiam tawkin ka rawn nei dawn e. Zirtirtu lak kha Muster Roll a ni tih hre ta phawt ila, an lak zat tur kha 881 a ni tih lo hre fuh leh ta bawk ila. Thil lo lang ta chu a latu lam chuan ‘hna nghet kan la dawn lo’ tiin MPSC kaltlanga lak an han duh lo phawt a, Department lamin DPC an nei sa reng a, DPC kutah pawh chuan a awm ta chiah bawk si lova, rinhlelhnain kan khat ta lo thei lo a ni. 

Zirtirtu laknaa mark put dan tak hi a nia interview zinga tel ve ngeiten hriatthiam harsa an tih chu le -  MTET-in mark 10 a pu ang an ti a, Intelligence Quotient (IQ) test-in mark 20 a pu leh a, locality (tualchhung mi)-in mark 20 a pu Personal Interview-in mark 50 a pu bawk a ni. Keini hriatthiam ve danah IQ Test hi Personal Interview nen an han dah hrang ta a, hei hi ṭhen hran dan tur kan hriat loh mai bakah interview hmachhawntu ngei zirtirtu nih tumte pawh a bo. A chhan chu a khawi aṭang khan nge IQ an teh dawn, an zawhna a mawlmang (simple) si a, IQ phawk chhuak thei tak tak zawh loh an nei a, tlai lam deuha interview tura lut ṭhenkhat phei chu midang aia zawhna zawh tlem, hun hmang rei lote an awm a ni. 

Thil hi kan ti tak tak dawn a nih chuan kan ram hian dikna, langtlang, fal fei leh rin tlak hi a mamawh a ni. Rilrua lo lang chu hman deuhah khan Hrangbana College zirtirtu tur lak a ni dawn a, NET nei chinin dil theih a ni a, NET nei lo pawhin an dil ve a, an tling ta thova. Court-a kal te kha an awm a, a kal zel dan hre tawh lo mah ila zirtirtu atana tling lo tlin theihna kawng hawngtute erawh kha chu mipuiin kan la hre reng a ni.