AMC sum mamawh uchuak hi!

Aizawl Municipal Council hmalakna hrang hrang ṭha tak tak a awm rualin, sum an zawng lutuk hi chu a buaithlak ṭan ta deuhin ka hre mai mai a. AMC avang hian hmun tam takah kawngpui a chêp a, tukluih hnatlang an ko bawk a, nakin zelah chuan pawisa hi a khawnin an la khawn mai tih hlauhawm tak a ni.

Aizawl khawpui chhungah kawng a chêpzia te, motor tam si ziate hi kan buaipui a ni. Traffic Police lamin theihtawp an chhuah mek laiin, traffic tiziaawm lam ni lo, traffic titawt thei zawngin AMC-in parking lot a siam ṭeuh mai hi zawng ngaihtuah ṭhat theih ni se a ṭha hle ang. Hmun lûnlai tak hi motor park-na tur ṭha lai tak a nih rual rualin, kawngpui titawttu a ni zawk thei bawk a; heng zawng zawng hi AMC hian a ngaihtuah chiang lo nge sum hmuhna tur hrim hrim a zawng tih turin hmun tin maiah parking lot a siam hi chu a fuh viau lo.

Aizawl chhunga tlang dung kawngpuiah phei hi chuan, tlêma kawng kual zau ve deuh hlek anga lang apiang mai hi parking lot atana hauh a ni zel mai a. Motor ding ngar ngar hian buaina a thlen tam lo a nih pawhin, motor park tur han inher leh, motor tlân chhuak tur han insiamrem hian harsatna a siam tam ta hle mai. Hmun tam takah traffic jam siamtu a ni tawh a ni. AMC hian parking fee aṭanga sum hmuh a tum dan hi chu a uchuak hret tawhin a lang.

Hman deuhah lah khan Holiday pawh ni loah hnatlang a ko a, phatna leh rûnna a siam bawk a. Sorkar hnathawkte chauh hnatlan a dilpui a, hnatlan a dilpui loh zawng zawng nen hnatlang turin a phût leh bawk si a. Khatiang hnatlang a ko leh dawn a nih chuan bazar te pawh khartir law law se, bazara ṭhute leh muṭia thlengin hnatlang an phat a ngai a, chu chuan an chhungkaw khawsak a tibuai a, sorkar hnathawkte chhungkaw khawsak erawh a buai eih lo thung ang. 

Mi rethei rahbehna leh sum chhuhluihna chi khat a ni. Anni tan ni khat pawh a uihawm tehreng nen. AMC hian sorkar aṭang sum a dawng ṭha ta lo nge, heti em ema sum a zawng ta mai hi a khawngaihthlak hle. A nih loh pawhin anmahni chhungah sum an hmang thiam lo emaw a ni ang. AMC hi mipui tana thil ṭha tur ngaihtuahtu tur nge, harsatna siamtu tur zawk? Mipuite tana phurrit siamtu nge? tih hi inenfiah se a va ṭha êm!.