Tu Candidate nge i vote dawn?

Aizawl Municipal Corporation inthlan chu kan thleng dawna ruai chu a ni ta mai a, Aizawl kahwpui meuh enkawl tu tur a nih bawk avangin party tinin candidate ṭha leh chhuanawm tak tak an rawn vawrh chhuak a, heng candidate zingah hian tunge ṭha ber pawh hriat harsa khawpin an ṭha hlawm a ni. 

An tehna tur nia lang chu tu kaihhruai AMC nge din kan duh, Pu Zoramthanga kaihhruai AMC kan duh em? Pu Lalthanhawla kaihhruai AMC kan duh em? Pu Lalduhoma kaihhruai AMC kan duh em? tih hi Aizawl khawpuiin kan ngaihtuah tur chu a ni ta a ni.

Pu Zorama kaihhruai AMC - 

AMC inthlang tur hi politics inthlanna a nih avangin a tawp khawka thuneitu sang tur chu political party hotu a nih avangin tuna AMC-a MNF candidate vote tu apiang hian a tawpah Pu Zoramthanga an vote chhuak dawn a ni. Hei hi politics kalphung chiang sa reng a ni a, BJP a sorkar chuan Narendra Modi a lal dawn tih kan hriat ang tho khan inthlanna tenau deuha lang zawk AMC ah pawh hian MNF kan thlan tlin chuan Pu Zorama hnuaia kun tur tho AMC an ni dawn a ni.

MNF hi state sorkarna changtu an ni mek a, MNF hian tun term chhung hian state tan eng thil nge an tih tawh? tih zawhna inzawhna hun a ni lova, AMC chu sum leh pai kalphung a hranpaa awm a nih avangin AMC enkawl tur hian Pu Zoramthanga lam ṭang kan la duh a nih chuan MNF Coucillor ṭha tak tak an rawn chhawp chhuah te hi vote tur a ni a, Pu Zorama hnuaia kun lo tur AMC kan duh a nih chuan MNF Councillor te hi vote loh mai tur a ni.

Khaw chhuak nih avanga in vote liam liam kan tih ang chi te pawh hi Aizawlah chua seng lut lo ila, chhungte an nih avanga vote kher tumte pawh hi tih loh atana ṭha a ni a, kan vote chhan tur chu an party hruaitu ber kan duh chuan vote mai tur a ni. AMC ah hian kan venga candidate kha kan duh vang ringawta vote dawn chuan candidate duhawm tak tak an ni ṭheuh si a, chuvangin tunge an zawmpui tih chhui tur a ni a, kum 10 zet Chief Minister a nih hnua a term thumna atana Chief Minister ni leh thei Pu Zoramthanga hnuaia mi AMC duh tan MNF Councillor te vote tur a ni.

Pu Hawla kaihhruai AMC - 

Congress hi Mizorama rorel rei ber an ni a, chumi chhung zawng zawng chuan Pu Lalthanhawla hi Chief Minister a ni thei a, Mizorama Chief Minister ni rei ber a ni a, Mizoram political history hi ziak dawn ta ila mipuiin kan thlan tlin ngun ber a nih avangin Pu Hawla hi politics lama sulhnu nei lian ber a ni ang a tih ngam a ni.

Pu Lalthanhawla hi Congress President niin Congress-a thuneitu sang ber ang a ni a, AMC-ah hian Congress councillor Candidate kan vote chuan Pu Hawla thuneihna pek kan duh leh tihna a ni. Pu Hawla kan Chief Minister ni rei thei ber hnuaia mi tur AMC kan duh chuan Congress hi vote mai tur a ni a, Pu Hawla inrawlh theih lohna AMC kan duh chuan Congress ni lo hi vote tur a ni ve leh mai a, thil thuk tak inphum a awm lova, kan vote kan thlakna hi a tawpah tunge kan vote chhuah dawn tih kan ngaihtuah ran a ngai a ni.

Pu Hawla hnuaiah Congress-in state ah ro an rel rei tawh a, AMC term hmasa ber pawh kha Congress kaihhruai a ni a, an rorel dan ki leh Congress hnuaia kan kalphung kha kan duh a nih chuan AMC-a Congress Councillor te hi kan thlang leh mai tur a ni. Kan venga mi chu kan duh zawng tak a lo nih loh palh pawhin Congress hi AMC ah sorkar tir kan tum chuan Congress Councillor kha vote hmiah tur a ni dawn a, Congress lam reng reng kan duh tawh loh chuan Councillor Candidate kha kan ṭhianpa pawh ni se vote loh mai tur a ni.

Pu Lalduhoma hi tuna party pathum zinga Chief Minister la ni ve lo awm chhun a ni a, 2018 MLA inthlan dawn khan ZPM in Chief Ministerial Candidate atan an chhawp chhuah a ni a, ZPM kha tling se chu Pu Duhoma kha Mizoram Chief MInister a ni ang. ZPM in sorkarna an siam zo ta lova, chu ahnekin MNF lam chuan Pu Duhoma chet dan chu 'Independent candidate ni si a ZMP lutuk a, ZPM party thilah a inrawlh," tiin an hek a, MLA a nihna pawh an ban tir tak avangin Pu Duhoma chu MLA pawh ni tawh lo a ni.

Pu Zorama leh Pu Hawla te angin a rorel dan ṭha leh ṭha lo sawi tur a la nei ve lova, MNF hnuaia Mizoram dinhmun kan hmuh ang chi, Congress hnuaia Mizoram awm dan kan lo hriat tawh ang hi ZPM hnuaiah chuan kan la hmu ve lova, Pu Duhoma hi a ṭhat hmel emaw a chhiat hmel emaw pawh neutral taka thlir chuan sawi thiam harsa tak a ni. 

Engpawhnise Pu Duhoma mimal lam chhui tawh lovin tuna ZPM Candidate te hi kan vote tlin chuan AMC-ah Pu Duhoma lam pawl AMC kan nei dawn tihna a ni a, Pu Zorama pawl nge Pu Hawla pawl nge Pu Duhoma pawl AMC neih kan duh tih hi Aizawl mipuiin kan thliar a ngai dawn a ni.

MNF Candidate kha fel viau mahse Pu Zorama i duh loh chuan MNF vote loh mai tur a ni a, chutiang chiah chuan Congress candidate kha fel hle mahse Pu Hawla i duh loh chuan vote loh mai tur a ni a, ZPM candidate kha ṭha engang mahse pu Duhoma i duh loh chuan vote loh mai tur a ni. A letling ciah hian Pu Zorama i duh leh in venga MNF candidate kha lo vote la, Pu Hawla i duh leh in venga Congress candidate kha lo vote la, Pu Duhoma i duh leh in venga ZPM candidate kha lo vote mai rawh.