Aizawl pawisa thleng nawitu AMC tih kha...

Lalmuanpuia thu ziak, "Aizawl pawisa thleng nawitu AMC" tih khan kan ngaihtuahna sen ngai miah lohna lamah min hruai lut a. Aizawl tlangvalte hian kan khaw hmasawnna tur pawisa luang ral hi kan ngaihtuah miah lova, thingtlang tlang­valte chuan an khaw deve­lopment sum kalphung hi an ngaihtuah zawk a, AMC pawisa khawih chet vel dan hmuh khan lung a awi lo thar hle a ni. 

"Aizawlah Aizawl Muni­cipal Corporation kan nei ve ta a, an pawisa hman dan en hi chuan Aizawl chei tumna a awm lova, pawisa tam tham tak an hmuh hi an thleng nawi a, party worker te inhlawhna an siam mai mai a ni. Luikawr siam hna VC thawh ṭhin kha pawisa tam zawk hretin an thawk ni maiin a lang a, AMC avanga hausa ta sawi tur an tam nen AMC avanga hmasawnna hmuh tur a vang hle tih hi Aizawl nula leh tlangvalte hian an hriat a hun ta," tia a rawn ziah kha 105 in ka thlawp a ni. 

Kan Councillor te chuan anmahni pawisa aṭanga pek niawm takin Ambulance an sem a, Local Council House an sa a, CCTV an leisak a, YMA pawisa an pe a, inkhelhna jersey an sem a, sports competition hrang hrang ṭhalai hipna turin an buatsaih a. Kohhran property thleng thlengin AMC pawisa aṭangin an lei sak a, heng pawisate hi mipui pawisa a ni sa vek a, "Kan Councillor hi a fel, a bengvar, hei hi min tih sak," tiin chhuang takin kan sawi leh si a; nimahsela India hmun dang khawpuiah chuan an Municipal Corporation chuan bawlhhlawh hi door to door-in an khawn a, in tinah lutin an khawn - hei hi jersey lai aiin kan duh zawk a, hei hi Local Council in sak leh Sports Competition siam aiin mipui tan a ṭha zawk lo maw? 

Lalmuanpuia ziaka, "Ward XI-a MNF Councillor... hian Rs 78,77,700 chu hna head 169-ah a hmang a, a pawisa hi a hmanna zat hian han sem ta ila, hna pakhat hi Rs 46,000 man bawr vel tihna a ni. He bialah hi chuan hmasawnna lam aiin mi tih lawmna lam an kalpui tihna a ni" a tih hi ngun taka kan en chuan, kan AMC term hman zawh takah khan Aizawl tana ro tur din si lovin cheng vaibelchhe tam an hmang ral a, party mi leh sa pawisa an sem kual a ang hle a ni. 

AMC-in Tours & Travels (zin chhuahna senso) atan Rs 1,15,33,037 an hmang ral a, Aizawl ṭhalaiten PUBG kan khelh mai mai hlanin kan khawpui enkawltu tura kan thlante chuan cheng vaibelchhe chuang hmangin an zin kual a, huat nachang pawh kan hre lo. Hei hi AMC kalphung tur a nih chuan vote thlak pawh a phur awm tawh lo a ni. AMC thar kan neih dawn loh phei chuan ṭhalaite chuan phurna pawh kan nei hlawm lovang.