Zan curfew tawp tawh se

Covid-19 do kawng­­ah Mizoram sorkar a fakawm. Kan hmanraw neih, health care worker neih leh kan ram economy ngaih­tuahin fak loh rual an niin ka hre lo. 

A bikin kan Health Minister leh a team-te an fakawm takzetin ka hria. Covid-19 len chhoh ṭan aṭang khan nitin maiin chanchinbu leh TV lamah an mee­ting thu hmuh/ chhiar tur a awm reng a, an rim takzet tih a tilang. Sorkar bakah koh­hran, khawtlang leh mipui kan ṭangrual ṭha a, kan ṭanrual rah kan sengte pawh a ni ngei ang, statistics aṭangin kan dinhmun a ziaawm dan chiang takin a lang. 

Covid-19 avangin tun hma-a kan tih ngai loh tam tak tih a ni a, dan leh thupek kenkawh lamah pawh thil chi hrang hrang duan a ni. He hripui, ram changkang leh hausa zawkte pawhin an ngam loh dona atan hian kawng hrang hranga hma lak a ṭul a. Mizoram sorkar pawhin ruahmanna chi hrang hrang a siam a, fuh tawk lo deuhte pawh a awm ang. 

Khawvel pawhin a do hneh loh a nih miau avangin Mizoram sorkarin ruahmanna a siamah fuh tawk lo a awm a nih pawhin an demawmin ka hre lo. Covid-19 avanga thil thar zingah chuan zan curfew hi a ni awm ta. Curfew hi keini ang rual phei chuan kan nu leh pate'n min hrilh bak kan hre mumal ve lo a ni. Rambuai laiin curfew an puang ṭhin a, chumi hnu lamah chuan tun ṭum ang baka zan curfew rei hi a awmin a rinawm lo. Kan boruakin a zir chhoh hnuah thupek tam tak sut a ni tawh a, zan curfew erawh kalpui zel a la ni.

Kan boruakin ziaawm lam a pan a, Covid-19 kan hmelhriat tirh lakah chuan kan zalen sawt tawh hle. Covid-19 avanga kan economy chhiat zel a hlauh­awm miau avangin inthlahdul telh telh loh theih a ni lo. Tunah chuan biak-inah inkhawm theih a ni tawh a, sikul naupangte pawhin sikul an kai ta. 

Mizo zingah hian zan lama eizawng, zan lama sum thawk chhuak tam tak an awm ve tawh a. Chung mite tan chuan Covid-19 hi a huatthla la awm rei zual viauin a rinawm. A chhan chu zan curfew a nih miau avangin nunphung pangngaiin an la awm thei lo. Heng mite tan hian zalenna dar vuak rik sak ve a chakawm tawh. 

Tin, ṭhalai chhun lama hnathawkte'n zan lama hun thawl an neih ve ṭhin pawh a awm thei tawh lo. Kan society nena inzawm tlat nula rim pawh a theih mumal loh a ni. Zan dar 8:30 hma-a haw hman tur chuan veng hla deuha ngaihzawng nei tan chuan hun a tlem hle. 

Kan dinhmun ngun taka ngaihtuah hian zan curfew hi hlip ta ila, hripui a len nasat phah hauhin ka ring ta lo. Chuvangin, thupek dang ang bawkin zan curfew hi sut ve a hun tawh takzetin ka hria.