Kohhran leh Khawtlang

Zofate hnamdang laka kan danglam­na em em chu kan Kristianna piah lamah khawtlang mitin kan tel theihna, mitin huap pawl kan nei hi a ni. An sawi fo ṭhin khawtlang leh Kohhran a inhmang chu misual tak an awm ngai lo tih thu pawh hi ngaihtuah chuan a dikna chen a awm áwm e. Kohhran leh khawtlang a inhman hian min chher puitling a, rawngbawlna a ni emaw khawtlang thila chet chhuah a ngaih chang a awm fo ṭhin, mi insiamrem thiam leh mi tlawmngai nih a ngai hle a ni. 

Pawl anga telna reng rengah chet chhuahna tur a tam ṭhin avangin leh pawl thil tum anga chet chhuah a ngaih fo ṭhin avangin Kohhran leh khawtlanga inhmang tak takte hi in chhungah hun an hmang tam thei lo ṭhin. Midang tana an hun hmang tam zawk te, a ṭul hun apianga che chhuak thei leh Kohhran rawngbawlna lamah pawh nise mahni hna ṭhulh khawpa mi inpete an nih chawk avang hian Mizo society tan hian an va thawhhlawk tak em. 

Khawtlang a inhmangte avang hian kan khawtlang a ralmuang a, an inpekna avangin thlamuang takin kan awm theih phah. Rawngbawlna lamah pawh nise kohhrana inhmang tak takte avangin member nawlpuiin kan tih theih loh leh kan tih hman loh kan tih ai tam zawkte mawhphurhna hrang hrang min hlen sak ṭhin. Heng mi inpe mi tlawmngaite hi an duh reng avanga hruaitu nihna dinhmun chelh an ni lo tih hi kan hriat thar leh a va ngai em. 

Kan hman loh laiin an ni chuan hman lo chung chungin an tih  a ngai a, kan peih lo lai pawhin an ni chuan an tih ṭau ṭau a ngai a, keini anga awm hmun aṭanga thlir a, duh leh hman huna chet chhuah mai, peih lo changa ṭhulh mai te pawh an chak ve ngawt ngei ang - keini anga hringnun hmang ve tho, famkim lo mihring an nih miau avangin. Kohhran leh khawtlanga hruaitu atana kan mi thlanchhuahte hian mi zawng zawng an ti lawm seng bîk lovang, keini anga ze nei mihring an ni miau, tung chhova kal mihring zingah hian tu pawh hian nun hlui kan nei vek, tunge nun hlui nei lova  seilian ang le? Nunna nei, ze nei, hriatna nei mi chuan nun hlui an nei vek ang. 

Hun kal tawh chu siamṭhat theih a ni tawh lo, chuvangin kan tun hun tluka pawimawh hi a awm lo. Mi nuna zir tur aiin an chhiatna lamin kan beng a verh zawk tlat te, midangte lawmpui a hneka kan ze ṭha lo kan tih chhuah fo hian sawtna aiin sualna a chhuah zawk fo ṭhin. 

Kohhran leh khawtlanga hruaitu dinhmun chelhte kan mil loh deuh emaw kan thawhpui theih loh kan thlang tling a nih pawhin, a ṭha zawnga thawhpui tum zawk ila, kan in sel fo hian rah ṭha a chhuah ang em? Lunga deng theitu kan ni bîk chiah em tih hi in chhut nawn fo a va ngai em. 

Dik bera kan in ngaih aṭang hian lawm in enfiah ve kan ngaih ṭhin. Tu pawh hian dawhtheihna nei ila, kan chenna khawvel hi a va nuam leh zual dawn em. Kan mihringpuite tlin lohna lai kan kher kan kher ringawt hian hmasawn aiin kan hnungtawlh zawk. Tu pawh in hrethiam a, in dawm thiam a, kan tlin lohna laite kan in haider tawn hian kan chenhonaah lungrualna a thlen mai ṭhin. 

Kohhran emaw khaw­tlanga kan hruaitute hian kan hma min hruai sak a, an hnung kan dawl tel a ngai fo ṭhin bawk. An diklohna lai emaw kan mit an tlin tawk lohna a awm chuan midang hnena sawi emaw midang hmuh theiha tarlan kher lo hian hmaichhanah in hrilh mai ila, a tu ve ve tan pawh in dawnsawn a nuam zawk ngei ang. Tu pawh hian ṭhatna lai leh tlin lohna kan nei vek a, midang chhiatna sawi thei bîk khawpa famkim kan ni bîk em tih te in zawt nawn fo ang u. 

Kohhran leh khawtlanga mi inhmang tak takte avang hian kan khawtlang leh Kohhran a mawi a, an ni tel lo chuan chet a har ṭhin. Anni avangin kan lusun ni emaw kan ṭhatniah te min tuam mawiin min ti mawi ṭhin a, kan tana angel hawlhthlak ang mai an ni. Anni chuan mi rethei emaw mi hausa thliar hrang lovin tumah thlei bîk lovin inang tlang takin min khai rual ṭhin a, hei vang tak hian Zofa nih hi a va nuam em. 

Tlawmngaihna thil a ni emaw rawngbawlna thil a ni emaw kan chet hmain min chet khalh a, kan tih ve theih tawk tam takah hma min hruai sak a, an hnung rinawm taka zui mai hi kan tih tur a ni. Inhman dan tawk thiam a ngai tih erawh chu kan hre fo tawh awm e. Tu pawh hian dam khaw chhuah nan kan thawh a ngai a, midang aia an hman bîk avanga inhmang an ni lo, tlawmngai bik an ni lo, an hun neih ang ang kohhran leh khawtlang tan an pe ṭhin mai a ni zawk. 

Heti chung hian mi ṭhen­khat erawh chuan an ṭhat tawk lohna lai te, an chetsualna te emaw an nunhlui te kan phawrh chhuah sak fo ṭhin zawng a nih hi, an ni thlawp zawnga ṭawng aiin an ṭhat lohna lai zawk kan thai lang fo ṭhin. Tute pawh hi hruaitu dinhmuna la ding thei vek kan ni a, kan hruaitu ni mekte hi keini ang thoa hringnun hmang ve tho an ni. Selna aiah fakna, midang aia ṭha zawk nun hmang dik zawk anga kan inngaihna ze ṭha lo tak hi bansan a va hun em. 

Luka 6:41 - Tin, engati nge mahni mita khanchhuk awm chu ngaihtuah si lovin, i unau mita hmawlh te tak te awm chu i hmuh ni? 

Pathian thu in a tarlan ang hian midang sawisel hmasa lovin, mahni ṭheuh in enfiah hmasa zawk ṭhin ila. Kan hruaitute tlin tawk lohna aiin an tlinna in kan beng verh zawk se, an ni pawhin chona leh phurna a hma aia ṭha zawka nun tumna nun an nei ngei ang.