MLA MAWHPHURHNA

MLA te hi kan aiawha kan thlan an nih avangin mipuite pawhin an chungah rinna kan nghat nasa a, an lakah kan beisei a sâng bawk. 

MLA te hian ṭha taka hna an thawh a, an tih tur dik taka an hlen chuan MLA te tluka Mizoram hmasawnna atana hna thawk tam thei hi an awm kher lo ang. MLA tinin an MLA fund dik taka an hman chuan MLA bial tin a lo changkâng ang a, MLA bial tin a lo changkân chuan Mizoram chu a ṭhang zawt mai dawn a ni. 

Mizo tam zawk hi chuan kan MLA te chu kan dam loh min rawn kan a, kan lusùn nia min rawn telpui chuan chu MLA chu MLA ṭha leh bengvar tak angah kan ngai a ni ber tawh a. Chung thil te pawh chu MLA te tih tur chu a ni ve nachungin, MLA tan chuan a ho lam lutuk a, ngaihsân chhan tur a awm lo a, MLA ṭha tehna tlak pawh a ni lo. MLA chuan an bial chhungah an MLA fund hmangin hmasawnna engnge an thlen? An MLA fund mai bakah anmahni mimal sumin engtianga nasa in nge an luan chhuah? tih te hi MLA ṭha tehna atana hman tur chu a ni zawk. 

Kan MLA tam tak te hi chu YMA hruaitu emaw tih mai tur an ni. Chutihrual chuan, chhiatni ṭhatni a an ṭhathnem ang aiin, an bial chhunga hmasawnna hna thawh erawh a ṭhahnem lem lo. Mipuiin kan sawm pawh ni loa anmahni rawn ding a, rawn inpe an nih avangin MLA te hi an taimak a ngai a, dân an zir peih a ngai a, opposition MLA te ngat phei chu awm mai mai hman an ni lo. Sawrkar chak kan neih loh pawhin, opposition an nep lutuk avangin sawrkar chak nei angin kan lan phah thei a ni tih te hi i hria ang u. 

MLA te hi Assembly House a ṭhu ngawi mai mai tura thlan an ni lo a, inzir peih se, sawrkar kalphung leh hmalakna zawng zawng te, a kal dan leh thil tih te hi hre kilh kelh vek tura beisei  an ni. Tin, kal dan phung ngai ringawt lo, kan hmasawnna tur dan leh hmalakna thar te hi mipuite hnenah hian rawn chhawp chhuak thei se a lawmawm ngawt ang. 

MLA te hian mitthi phurh­na senso tum te, damlo kan te, khawhar in kal vel mai bakah hian, an bial chhungah motor kawngpui leh agricultural link road ṭha awm lo te hi mut mawh hnar mawhah nei se, dap in tam lutukna bial MLA chuan a bial chhûngah hmasawnna hna thawh tur a ngah hle tih hria se. 

A bial chhunga phone signal leh internet signal ṭha lo MLA chu khawhar ina a hun hmang zo hman a ni lo, thawh tur a ngah lutuk. Kawlphetha leh phone signal reng reng luh hleih theih lohna bialtu MLA chuan zah nachang hre rawh se. 

Mipuite pawh hian in­khawmpui ṭanpuina tih vel mai mai hi chu i dil buai tawh lo ang u, an tan a nep lutuk bakah mipuite min hmuhsit phah ang tih a hlauhawm a, corruption rawng te pawh a kai hial asin. An mawhphurhna a ni lo a, bial chhunga hmasawnna tur hna an thawh a dal phah phei chuan mipuite thiam loh a ni ang. 

Hawh u, mipuite pawh hi i harh ang u. Kan MLA te hi Mizo pa an nihna zawnah chuan, kan chhiat ṭhat changa kan ina rawn lut tur chu an ni na meuh mai, mah se chu ber chu an hna a ni lo, kan mamawh kan va dilna tur te pawh an ni e. 

Chutih rual chuan, an hna ber chu ram hmasawnna tur dan siam a, hna thawk a, an hnuaia hna thawktute thlenga an thawh ṭhat leh ṭhat loh viltu tur an ni. Chuvangin, an lakah thikthu tichhia ila, ti kher kher ila, kan bial chhungah hmasawnna hna engtiangin nge an thawh tih uluk taka vengin i lo melh ran ang u.